‘जॉइन आरएसएस’-माध्यमेन सङ्घेन सह सम्बद्धतां प्राप्तुम् इच्छुकानां संख्या अढैगुणिता अभवत्, ६५ प्रतिशतं याचकाः त्रिंशद्वर्षेभ्यः न्यूनवयस्काः

विशाखापत्तनम्, १८ अगस्तमासः (हि.स.)। राष्ट्रीयस्वयंसेवकसङ्घस्य वार्षिक-अखिलभारतीय-समन्वयसभायां देशे जायमानस्य जनसाङ्ख्यिकीय-परिवर्तनस्य, सामाजिकपरिवर्तनस्य, नशामुक्तेः, समग्रस्य भारतीयविकास-प्रतिरूपस्य इत्यादिभिः सह विभिन्नेषु सामयिकविषयेषु चर्चा भविष्यति। इयं सभा अगस्तमासस्य १९ दिनाङ्कात् २१ दिनाङ्कपर्यन्तं विशाखापत्तनस्य समीपे गुडीलोवा-स्थिते विज्ञानविहारविद्यालये आयोजिता अस्ति।

सङ्घस्य अखिलभारतीयप्रचारप्रमुखः सुनील-आम्बेकरः मङ्गलवासरे अत्र सभायाः पूर्वम् आयोजितायां वार्ताहर-सम्मेलन्यां अवदत् यत् सभा अगस्तमासस्य १९ दिनाङ्के प्रातः नववादने प्रारभ्य २१ दिनाङ्कस्य सायङ्कालपर्यन्तं प्रचलिष्यति। अस्यां सङ्घस्य प्रेरणया कार्यं कुर्वतां ३२ सङ्घटनानां प्रमुख-पदाधिकारिणः भागं ग्रहीष्यन्ति।

सः अवदत् यत् सभायां सङ्घस्य सरसङ्घचालकः डॉ. मोहनभागवतः, सरकार्यवाहः दत्तात्रेयहोसबाले, सर्वे सहसरकार्यवाहाः तथा अन्ये केन्द्रीय-पदाधिकारिणः च उपस्थिताः भविष्यन्ति। भारतीयमजदूरसङ्घः, विश्वहिन्दूपरिषद्, भारतीयजनतापक्षः, अखिलभारतीय-विद्यार्थिपरिषद्, भारतीयकिसानसङ्घः, राष्ट्रसेविकासमितिः इत्यादीनां विभिन्न-सङ्घटनानां राष्ट्रियाध्यक्षाः, महामन्त्रिणः, अखिलभारतीय-सङ्घटनमन्त्रिणः तथा चयनिताः कार्यकर्तारः सभायां सम्मिलिताः भविष्यन्ति।

आम्बेकरः अवदत् यत् विभिन्न-सङ्घटनानां ४९ महिलाप्रतिनिधिभिः सह २५३ प्रमुखकार्यकर्तारः तथा सङ्घस्य पदाधिकारिणः सम्मिल्य ३२७ प्रतिनिधयः सभायां भागं ग्रहीतुं सम्भाव्यन्ते। सः स्पष्टं कृतवान् यत् इयं कार्यकारी वा निर्णयग्राहिणी वा सभा नास्ति, अपितु विभिन्नसङ्घटनानां मध्ये अनुभव-विनिमयः तथा परस्परसमन्वयस्य सुदृढीकरणम् अस्याः सभायाः प्रमुखम् उद्देश्यम् अस्ति।

सभायां देशस्य वर्तमानस्थितेः, सामाजिकपरिवर्तनस्य तथा विभिन्नानां सामाजिकसमस्यानां विषये विचारविमर्शः भविष्यति। जनसङ्ख्यायाः असन्तुलनात् तथा जनसाङ्ख्यिकीयपरिवर्तनात् उत्पद्य-मानानां चिन्तानां तेषां समाधानोपायानां च विषये अपि चर्चा भविष्यति। यूनः नशात् दूरे स्थापयितुं उपायानां तथा नशामुक्त्यर्थं विभिन्न-सङ्घटनानां भाविभूमिकायाः विषये अपि विचारः भविष्यति। एतदतिरिक्तं युवकेषु जागरूकतावर्धनसम्बद्धेषु अन्येषु विषयेषु अपि चर्चा भविष्यति।

सङ्घस्य शताब्दिवर्षस्य अवसरे निर्धारितेषु पञ्चपरिवर्तनविषयेषु अपि सभायां चर्चा भविष्यति। तेषु सामाजिकसमरसता, पर्यावरणानुकूलजीवनशैली, कुटुम्ब-प्रबोधनम्, ‘स्व’-भावना तथा नागरिक-कर्तव्यपालनम् इत्येते विषयाः सम्मिलिताः सन्ति। एतेषु विषयेषु स्वयंसेवकैः विभिन्नसङ्घटनानां कार्यकर्तृभिश्च क्रियमाणानां प्रयत्नानां समीक्षा भविष्यति। शताब्दिवर्षस्य अनन्तरम् एतान् विषयान् अग्रे नेतुं रणनीतिः तथा विभिन्नसङ्घटनानां भूमिका इत्येतयोः विषये अपि विचारः भविष्यति।

आम्बेकरः अवदत् यत् विकासः केवलं आर्थिकवृद्धिपर्यन्तं सीमितः न भवितुं शक्नोति। तस्य विभिन्नाः आयामाः सन्ति तथा सन्तुलितविकासः आवश्यकः अस्ति। सभायां आर्थिकपक्षैः सह समाजस्य अन्येषां क्षेत्राणां सन्तुलनं कुर्वतः समग्रस्य ‘भारतीयविकासप्रतिरूपस्य’ अवधारणायाः विषये अपि चर्चा भविष्यति तथा आगामिकाले विभिन्नसङ्घटनानि स्वकीयाः योजनाः निर्मास्यन्ति।

सः अवदत् यत् सङ्घस्य शताब्दिवर्षस्य अवधौ सङ्घं प्रति जनानाम् आकर्षणं वर्धते। सङ्घस्य जालपुटे ‘जॉइन आरएसएस’ इत्यस्य माध्यमेन जनवरीमासात् जुलाईमासपर्यन्तं २०२५ तमे वर्षे ५५,४२३ जनैः पञ्जीकरणं कृतम् आसीत्, यदा तु २०२६ तमे वर्षे समानावधौ एषा संख्या वर्धित्वा १,२३,२८७ अभवत्। जुलाईमासे २०२५ तमे वर्षे ९,७१८ जनाः सङ्घेन सह सम्बद्धतां प्राप्तुम् इच्छां प्रकटितवन्तः, यदा तु जुलाईमासे २०२६ तमे वर्षे एषा संख्या वर्धित्वा २४,०८६ अभवत्। आवेदनं कृतवत्सु प्रायः ६५ प्रतिशतजनानां वयः त्रिंशद्वर्षेभ्यः न्यूनम् अस्ति तथा प्रायः ८५ प्रतिशतजनानां वयः चत्वारिंशद्वर्षेभ्यः न्यूनम् अस्ति।

वार्ताहरसम्मेलने दक्षिणमध्यक्षेत्रस्य सहसङ्घचालकः दूसी रामकृष्णः तथा अखिलभारतीयसहप्रचारप्रमुखः प्रदीपजोशी च अपि उपस्थितौ आस्ताम्।

Hindusthan Samachar / Divya Ranjan