Enter your Email Address to subscribe to our newsletters
राज्यमन्त्री गौर् बरखेडा भेल् तः सन्तरविदासकलशवन्दनयात्रायाः शुभारम्भं कृतवती
भोपालः, १८ अगस्त। मध्यप्रदेशस्य पिछडावर्गीय-अल्पसंख्याककल्याणराज्यमन्त्री कृष्णा गौर् सन्तशिरोमणेः श्रीगुरुरविदासमहाराजस्य षट्शततमस्य पञ्चाशदधिकस्य जन्मजयन्तीवर्षस्य पावनावसरे मङ्गलवासरे राजधानीभोपालस्थस्य श्रीसन्तरविदासमन्दिरस्य डी-सेक्टर् बरखेडा भेल् परिसरात् दिव्यायाः ‘कलशवन्दनयात्रायाः’ शुभारम्भं कृतवती। अस्मिन् अवसरे बहवः श्रद्धालवः सन्तरविदासस्य भक्तिभावेन स्मरणं कुर्वन्तः यात्रायां स्वकीयां सहभागितां प्रदत्तवन्तः।
अन्तिमव्यक्तेः उत्थानेन साकारं भवति सन्तरविदासस्य सङ्कल्पम्
राज्यमन्त्री गौर् उक्तवती यत् सन्तशिरोमणिः रविदासः समाजे व्याप्तां विषमतां दूरीकृत्य समरसतां भ्रातृभावं च स्थापयितुं सन्देशं प्रदत्तवान्। सम्पूर्णः समाजः तस्य जयन्तीम् अगाधश्रद्धया समर्पणभावेन च आचरति। अद्य महती आवश्यकता अस्ति यत् तस्य कालजयी उदात्तविचाराः भाविपीढीनाम् अन्तर्मनसि सम्प्रेषिताः भवेयुः।
राज्यमन्त्री गौर् रेखाङ्कितवती यत् प्रधानमन्त्री नरेन्द्रमोदिनः मूलमन्त्रः “सर्वेषां सहकारः, सर्वेषां विकासः” सन्तरविदासस्य विचाराणामेव प्रतिध्वनिः अस्ति। समाजस्य अन्तिमसोपाने स्थितं व्यक्तिं विकासस्य मुख्यधारायाम् आनीय प्रथमपङ्क्तौ प्रतिष्ठापयितुमेव सन्तरविदासस्य सङ्कल्पानां वास्तविकं साफल्यम् अस्ति। तस्य चरणकमलेषु शिरः नत्वा तस्य शिक्षाः आत्मसात्कर्तुं सर्वेषां कृते परमगौरवस्य विषयः अस्ति।
सागरे १०२ कोटिरूप्यकाणां व्ययेन निर्मीयमाणं भव्यं सन्तरविदासमन्दिरम्
राज्यसर्वकारेण सन्तरविदासस्य विचाराणां व्यापकप्रसाराय तस्य सम्मानाय च क्रियमाणानां कार्याणाम् उल्लेखं कुर्वती गौर् उक्तवती यत् सागरे १०२ कोटिरूप्यकाणां व्ययेन सन्तरविदासस्य अलौकिकस्य मन्दिरस्य स्मारकस्य च निर्माणं क्रियमाणम् अस्ति। एतदतिरिक्तं सम्पूर्णप्रदेशे स्थितानां धार्मिकस्थलानां देवालयानां च पुनरुद्धारस्य जीर्णोद्धारस्य च कार्यमपि निरन्तरं प्रचलति।
१५ लक्षरूप्यकाणां विकासकार्याणां भूमिपूजनम्
समारोहे श्रीसन्तरविदासमन्दिरपरिसरे १५ लक्षरूप्यकाणां व्ययेन क्रियमाणानां विविधविकाससौन्दर्यीकरणकार्याणां भूमिपूजनं कृतम्। अस्मिन् अवसरे उपस्थितैः श्रद्धालुभिः नागरिकसमाजेन च सन्तरविदासेन प्रदर्शिते मार्गे चलितुं सामाजिकसमरसतायाः तन्तुं अधिकं सुदृढं कर्तुं च सामूहिकः सङ्कल्पः कृतः।
Hindusthan Samachar / Dheeraj Maithani