कोलकाता, 18 अगस्तमासः (हि.स.)। पश्चिमबङ्गराज्ये मुख्यमन्त्रिणः शुभेन्दु-अधिकारिणः नेतृत्वे भाजपा-सर्वकारेण मङ्गलवासरे स्वस्य शतदिनानि पूर्णानि कृतानि। सर्वकारेण एतेषां शतदिनानां उपलब्धीनां विभागवारं विवरणं सिद्धं कृतम् अस्ति। सत्तापक्षः एतत् निर्वाचनसमये कृतानां प्रतिज्ञानां शीघ्रं कार्यरूपेण परिणतस्य उदाहरणम् इति कथयति। अपरतः कतिपयासां योजनानां क्रियान्वयनं, लाभार्थिनां संख्या, भूमौ तासां प्रभावश्च प्रति प्रश्नाः अपि उत्पद्यन्ते। अतः सर्वकारस्य प्रथमशतदिनानां कार्याणि दृष्ट्वा सीमासुरक्षा, आधारभूतसंरचना, बन्दानां पट्टवस्त्रनिर्माणशालानां पुनरुद्घाटनम्, महिलाभ्यः आर्थिकसहायता, केन्द्रीययोजनानां विस्तारः, निवेशाकर्षणं च प्रमुखविषयत्वेन समक्षम् आगच्छन्ति।

शुभेन्दु-सर्वकारस्य सर्वाधिकचर्चितेषु प्रयत्नेषु भारत-बाङ्गलादेशयोः सीमायां भूम्युपलब्धीकरणस्य निर्णयः अन्तर्भवति। भाजपा दीर्घकालात् आरोपं कुर्वती आसीत् यत् राज्यसर्वकारेण भूम्युपलब्धिं न कृतत्वात् सीमायाः अनेकासु स्थलेषु प्राकारनिर्माणकार्यं स्थगितम् अस्ति। सत्तां प्राप्तस्य अनन्तरं नूतनसर्वकारेण सीमासुरक्षायै प्राथमिकतां प्रदाय सीमा-सुरक्षाबलाय बृहद्प्रमाणेन भूमिः हस्तान्तरिता। सर्वकारीय-आङ्कडानुसारं राज्यस्य नव सीमावर्तिजनेषु ७६७ एकरात् अधिका भूमिः सीमा-सुरक्षाबलाय प्रदत्ता अस्ति, यदा प्रायः ३६२ एकरपरिमितायाः अतिरिक्तभूमेः हस्तान्तरणाय मन्त्रिमण्डलेन अनुमोदनमपि प्रदत्तम् अस्ति। एवं सीमा-सुरक्षाबलाय उपलब्धीकृतभूमेः कुलक्षेत्रफलं ११०० एकरात् अधिकं जातम् अस्ति।

सीमासुरक्षायै दार्जिलिङ्ग, जलपाइगुडि तथा अलीपुरद्वार इत्येतेषु ४४ एकरात् अधिका भूमिः सशस्त्र-सीमा-बलाय अपि प्रदत्ता अस्ति। दार्जिलिङ्गे भारत-तिब्बत-सीमा-पुलिसस्य बटालियनस्य मुख्यालयनिर्माणाय प्रायः ११० एकरा भूमिः उपलब्धीकृता अस्ति। सर्वकारः एतत् राष्ट्रियसुरक्षायाः दृष्ट्या महत्त्वपूर्णं पदक्षेपम् इति वर्णयति।

भूमिविभागेन आधारभूतसंरचनापरियोजनाभ्यः भूम्युपलब्धीकरणे अपि वेगः वर्धितः अस्ति। सेवक-रङ्गपो-विस्तृतमाप-रेलपरियोजनायै रेलविभागाय २० एकरा भूमिः प्रदत्ता अस्ति। पश्चिममेदिनीपुरे शतशय्यायुक्तस्य ईएसआई-चिकित्सालयस्य निर्माणाय प्रायः षड् एकरा भूमिः उपलब्धीकृता अस्ति। तदतिरिक्तं सर्वकारीयभाण्डागाराणां, विद्युत्-उपकेन्द्राणां तथा अन्यासां आधारभूतसंरचनापरियोजनानां कृते भूमेः हस्तान्तरणप्रक्रिया अपि तीव्रतया प्रचलति।

सर्वकारस्य शतदिनानां प्रमुखासु आधारभूतसंरचनापरियोजनासु चिङ्गडीघाटा-मेट्रो-परियोजनायाः कार्यमपि अन्तर्भवति। दीर्घकालात् स्थगितमिदं कार्यं नूतनसर्वकारस्य निर्देशानन्तरं तीव्रगत्या अग्रे प्रवृत्तम्। निर्माणकार्यसंस्था आरवीएनएल इत्यनया सह समन्वयं कृत्वा मईमासे द्वयोः सप्ताहान्तयोः चिङ्गडीघाटा-मोड् इत्यत्र यातायातस्य नियन्त्रणं कृत्वा वायाडक्ट्-स्थापनस्य कार्यं पूर्णं कृतम्। तदनन्तरं बेलेघाटा तथा गौरकिशोर-घोष-स्थानकयोर्मध्ये रेलसम्पर्कस्य कार्यमपि अग्रे प्रवृत्तम्। भाजपा एतत् प्रशासनिक-सङ्कल्पशक्तेः उदाहरणम् इति कथयति।

रोजगारस्य क्षेत्रे बन्दानां पट्टवस्त्रनिर्माणशालानां पुनरुद्घाटनस्य दावा सर्वकारस्य प्रमुखेषु उपलब्धिषु अन्तर्भवति। श्रमविभागस्य अनुसारं हुगलीनद्याः उभयतटेभ्यः विगतेषु शतदिनेषु १६ बन्दाः पट्टवस्त्रनिर्माणशालाः पुनरुद्घाटिताः। सर्वकारस्य दावानुसारं तेन ३५ सहस्रात् अधिकानां श्रमिकाणां जीविकायाः पुनः संरक्षणं जातम्। दीर्घकालात् सङ्कटग्रस्तस्य राज्यस्य पट्टोद्योगस्य कृते एतत् महत्त्वपूर्णं पदक्षेपम् इति मन्यते।

परिवहनक्षेत्रेऽपि सर्वकारेण निर्वाचनसमये कृतं प्रतिज्ञानं कार्यान्वितुं प्रयत्नः कृतः। सर्वकारीयेषु बसयानेषु महिलाभ्यः निःशुल्कयात्रा प्रारब्धा अस्ति। तेन सह बहुषु मार्गेषु नवीनानि सर्वकारीयबसयानानि अपि सञ्चालितानि। तथापि आवश्यकतायाः तुलनया सर्वकारीयबसयानानां संख्या अद्यापि न्यूना अस्ति इति कथ्यते। अतः सार्वजनिकपरिवहनव्यवस्थां पूर्णतया व्यवस्थितां कर्तुं सर्वकारस्य पुरतः अग्रे अपि बृहद्पदक्षेपाणां चुनौती वर्तते।

महिलाभ्यः ‘अन्नपूर्णा-योजना’ सर्वकारस्य प्रमुखासु निर्वाचनघोषणासु आसीत्। योजनायाः अन्तर्गतं पात्राभ्यः महिलाभ्यः प्रतिमासं ३००० रुप्यकाणि दीयन्ते। भाजपा एतत् निर्वाचनप्रतिज्ञायाः पूर्तेः उदाहरणम् इति कथयति। तथापि योजनायाः आवेदनप्रक्रियायाः जटिलतां तथा बहूनां पात्रमहिलानां अद्यापि लाभं न प्राप्तवतीनां विषये शिकायताः अपि समक्षम् आगताः। द्वादशतः त्रयोदशपृष्ठपर्यन्तस्य आवेदनपत्रस्य विषये अपि प्रश्नाः उत्थापिताः। सर्वकारस्य कथनम् अस्ति यत् मिथ्यालाभार्थिनः निष्कासयितुं वास्तविकपात्रजनानां परिचयं सुनिश्चितं कर्तुं च विस्तृता प्रक्रिया स्वीकृता अस्ति।

स्वास्थ्यस्य सामाजिकसुरक्षायाश्च क्षेत्रे केन्द्रीयसर्वकारस्य योजनानां राज्ये क्रियान्वयनमपि नूतनसर्वकारस्य प्राथमिकतासु अन्तर्भवति। आयुष्मान्-भारत-योजनायाः अन्तर्गतं निःशुल्कचिकित्सा, प्रधानमन्त्री-कृषकसम्माननिधिः, प्रधानमन्त्री-विश्वकर्मा-योजना तथा प्रधानमन्त्री-सूर्यघर-योजना इत्येताः योजनाः राज्ये कार्यान्विताः कर्तुं दिशि पदक्षेपाः गृहीताः। सर्वकारेण एतासां योजनानां क्रियान्वयनाय केन्द्रसर्वकारेण सह सम्झौताः अपि कृताः। तथापि आगामिकाले एतासां योजनानां वास्तविकलाभः कियद्भ्यः जनाभ्यः प्राप्नोति, एतत् सर्वकारस्य कृते महती परीक्षा भविष्यति।

कृषकसम्माननिधेः लाभार्थिनां क्षेत्रस्य विस्तारं तथा अन्यासां केन्द्रीययोजनानां राज्ये शीघ्रं क्रियान्वयनं भाजपा-सर्वकारः स्वस्य प्रमुखाम् उपलब्धिं मन्यते। केन्द्रे राज्ये च एकस्यैव दलस्य सर्वकारः अस्तित्वात् एतासां योजनानां क्रियान्वयने लाभः प्राप्यते इत्यपि सत्तापक्षस्य दावा अस्ति।

विधिव्यवस्थायाः विषयः अपि सर्वकारस्य शतदिनीयकार्यक्रमस्य महत्त्वपूर्णः भागः आसीत्। मुख्यमन्त्री शुभेन्दु-अधिकारी अनेकासु अवसरासु राज्ये विधेः शासनं स्थापितमिति दावं कृतवान्। सः एतदपि उक्तवान् यत् यदि भाजपा-कार्यकर्तृष्वपि अवैधक्रियाकलापानाम् आरोपाः भवन्ति, तर्हि विधिः स्वकार्यं करिष्यति। तथापि तृणमूल-काङ्ग्रेस-पक्षतः वामदलेभ्यश्च विधिव्यवस्थां प्रति प्रश्नाः उत्थाप्यन्ते। सर्वकारसमर्थकानां दावा अस्ति यत् विगतेषु शतदिनेṣu पुलिसप्रशासनयोः निष्पक्षतां प्रति पूर्ववत् व्यापकाः शिकायताः समक्षं न आगताः।

निवेशस्य क्षेत्रेऽपि सर्वकारः स्वस्य प्रथमशतदिनानि उपलब्धिपूर्णानि इति वर्णयति। वस्त्रोद्योगे बृहन्निवेशसम्बद्धानां परियोजनानां शिलान्यासः कृतः अस्ति। हावडायां अमूल्-संस्थायाः बृहद्दुग्धसंयन्त्रस्य आधारशिला स्थापिता अस्ति। इस्पातोद्योगेऽपि निवेशसम्बद्धाः परियोजनाः समक्षम् आगताः। सर्वकारस्य शतदिनानि पूर्णानि जातानि इत्यस्य अवसरस्य उपलक्ष्ये पुरुलियायां इस्पातक्षेत्रसम्बद्धायाः अन्यस्याः परियोजनायाः शिलान्यासः प्रस्तावितः अस्ति, यस्मिन् मुख्यमन्त्रिणः सहभागितायाः सम्भावना कथ्यते।

एतेषु शतदिनेṣu सर्वकारेण अनेकासु दिशासु स्वस्य निर्वाचनकार्यक्रमं शीघ्रतया कार्यान्वितुं प्रयत्नः कृतः। सीमायां भूमेः हस्तान्तरणात् आरभ्य चिङ्गडीघाटा-मेट्रोपरियोजनां, बन्दानां पट्टवस्त्रनिर्माणशालानां पुनरुद्घाटनं, महिलाभ्यः आर्थिकसहायतां, केन्द्रीययोजनानां विस्तारं च यावत् सर्वकारेण स्वस्य प्राथमिकताः स्पष्टाः कृताः। किन्तु एतेषां पदक्षेपाणां वास्तविकपरीक्षा अधुना प्रारभिष्यते। योजनाः कियत्कालं स्थायिरूपेण सफलाः भवन्ति, कियद्भ्यः जनाभ्यः तासां लाभः प्राप्यते, रोजगारस्य निवेशस्य च दावानां भूमौ कियान् प्रभावः दृश्यते तथा सर्वकारीयघोषणानां सामान्यजनजीवने कियत् परिवर्तनं भवति, एतेषामेव प्रश्नानां आधारेण शुभेन्दु-सर्वकारस्य आगामिशतदिनानां सम्पूर्णकार्यकालस्य च मूल्याङ्कनं भविष्यति।

Hindusthan Samachar / Dheeraj Maithani