कोलंबिया (दक्षिण कैरोलिना) अमेरिका, 18 अगस्तमासः (हि.स.)।

अमेरिकी-अभिनेत्री हेडन पैनेटीयरस्य रविवासरे षट्त्रिंशद्वर्षीयायां वयसि ग्रीनविले-नगरे निधनम् अभवत्। सा स्वगृहे अन्तिमश्वासं त्यक्तवती। ग्रीनविले-काउण्टी-कोरोनर-कार्यालयेन एतत् सूचितम्। मृत्योः कारणस्य अन्वेषणं कोरोनर-कार्यालयेन क्रियते। प्रारम्भिक-सूचनानुसारं हृदयाघातजनित-हृदयक्रियानिरोधस्य सम्भावना व्यक्ता अस्ति। हृदयक्रियानिरोधे हृदयस्य स्पन्दनं सहसा विरमति, येन शरीरस्य विभिन्नाङ्गेषु मस्तिष्के च रक्तसञ्चारः अवरुध्यते। एषा अवस्था हृदयाघातात् भिन्ना भवति। तथापि मृत्योः आधिकारिकं कारणम् अतिरिक्तान्वेषणस्य परिणामानन्तरमेव निश्चितं भविष्यति।

सीएनएन-सूचनानुसारं पैनेटीयरः २००० दशकस्य प्रारम्भे अभिनयक्षेत्रे विशेषां ख्यातिं प्राप्तवती। अनन्तरं मादकद्रव्यव्यसनस्य मानसिकस्वास्थ्यसम्बद्धानां च कठिनतासां कारणेन सा सार्वजनिकजीवनात् किञ्चित् दूरे अभवत्। अद्यतनकाले तस्याः आत्मकथात्मकं पुस्तकं प्रकाशितम् अस्ति, यस्मिन् सा स्वजीवनस्य कठिनानुभवान् तथा स्वभ्रातुः निधनजनितं दुःखं च स्पष्टतया वर्णितवती।

ग्रीनविले-काउण्टी-कोरोनर-कार्यालयेन सोमवासरे प्रकाशिते वक्तव्ये उक्तं यत् रविवासरे अपराह्णे ग्रीनविले-नगरे अभिनेत्री अचेतनावस्थायां पतिता इति सूचना ९११ सङ्ख्यायां प्राप्ता। चिकित्सकैः पैनेटीयरस्य चेतनां पुनरानेतुं प्रयत्नः कृतः। उन्नत-हृदयजीवनरक्षणोपचारादयः उपायाः अपि प्रयुक्ताः। प्रायः अर्धघण्टानन्तरं तां मृतां घोषितवती। सोमवासरे सम्पन्ने शवपरीक्षणे तस्याः शरीरे मृत्योः कारणं भवितुम् अर्हति इति प्रकारस्य कस्यापि आघातचिह्नस्य दर्शनं न अभवत्। मृत्योः अन्तिमं कारणं अतिरिक्तपरीक्षणानां परिणामेषु निर्भरं भविष्यति।

हेडनस्य पिता स्किप् पैनेटीयरः दुःखेन उक्तवान् यत् तेषां प्रियायाः हेडनस्य निधनस्य वार्ता अत्यन्तं दुःखदायिनी अस्ति। सा अद्भुतव्यक्तित्वसम्पन्ना ऊर्जापूर्णा च महिला आसीत् तथा स्वप्रशंसकानां जीवने अपारं प्रेम आनन्दं च पूरितवती। अभिनेता-सङ्घेन एएजी-एफटीआरए इत्यनेन अपि हेडन पैनेटीयरस्य निधनं प्रति शोकः व्यक्तः। सङ्घस्य अनुसारं सा १९९४ तमवर्षात् तस्य सदस्यत्वं धारयति स्म। बालकलाकाररूपेण तस्याः दूरदर्शने चलचित्रेषु च दीर्घः अभिनयप्रवासः अभवत्। ‘हीरोज’ तथा ‘नैशविल’ इत्यादिषु तस्याः भूमिकाः विशेषतया स्मरणीयाः सन्ति। सङ्घेन तस्याः पुत्र्यै, परिवाराय, मित्रेभ्यः, प्रशंसकेभ्यश्च संवेदनाः प्रकटिताः।

हेडन पैनेटीयरस्य जन्म २१ अगस्त १९८९ तमे वर्षे न्यूयॉर्क-प्रदेशस्य पालिसेड्स-नगरे अभवत्। तस्याः अभिनयजीवनस्य प्रारम्भः केवलं एकादशमासीयायाः अवस्थायां विज्ञापनैः अभवत्। अनन्तरं बालकलाकाररूपेण तस्याः अभिनययात्रा निरन्तरं प्रवृत्ता। १९९० तमे वर्षे सा विज्ञापनेषु दृश्यते स्म तथा ततः दूरदर्शनस्य विभिन्नकार्यक्रमेषु अभिनयम् अकरोत्। ‘द गाइडिङ्ग लाइट’ इत्यस्मिन् धारावाहिके १९९६ तः २००० तमवर्षपर्यन्तं सा लिजी स्पॉल्डिङ्ग इति पात्रस्य भूमिकां निर्वहति स्म।

‘अ बग्स लाइफ’ इत्यस्मिन् चलचित्रे स्वरप्रदानादिना अपि तस्याः अभिनयजीवनस्य महत्त्वपूर्णः चरणः प्रारब्धः। अस्य चलचित्रसम्बद्धकार्याय सा ग्रैमी-पुरस्कारस्य नामाङ्कनं प्राप्तवती। बाल्यावस्थायामेव तस्याः अभिनयप्रतिभा व्यापकं ध्यानम् आकर्षितवती।

प्रशंसकाः पैनेटीयरं २००५ तमवर्षस्य ‘आइस प्रिन्सेस’ इति चलचित्रे मिशेल ट्राख्टेनबर्ग इत्यस्याः सह अभिनीतभूमिकायै अपि स्मरन्ति। ततः किशोरावस्थायां तस्याः विशेषं यशः प्राप्तम्। एनबीसी-दूरदर्शनस्य ‘हीरोज’ इति धारावाहिके सा स्वयमेव पुनः स्वस्थतां प्राप्तुं शक्नुवती इति विशेषशक्तियुक्तायाः चीयरलीडर-क्लेयर बेनेट इति पात्रस्य भूमिका निर्वहति स्म। एषः कार्यक्रमः २००६ तः २०१० तमवर्षपर्यन्तं प्रसारितः।

२०११ तमे वर्षे पैनेटीयरः ‘स्क्रीम ४’ इति भयप्रधान-चलचित्रे किर्बी रीड इति भूमिकायां दृश्यते स्म। बहुवर्षानन्तरं सा अस्य भयप्रधान-चलचित्रशृङ्खलायाः षष्ठे भागे अपि पुनरागता। ‘रिमेम्बर द टाइटन्स’, ‘ब्रिङ्ग इट ऑन: ऑल ऑर नथिङ’ तथा ‘आई लव यू, बेथ कूपर’ इत्यादिषु चलचित्रेष्वपि तस्याः महत्त्वपूर्णाः भूमिकाः आसन्।

एबीसी-प्रसारणस्य सङ्गीतप्रधान-नाट्यधारावाहिके ‘नैशविल’ इत्यत्र तस्याः अन्यत् महत्त्वपूर्णं पात्रम् अभवत्। २०१२ तः २०१८ तमवर्षपर्यन्तं सा कोनी ब्रिटन इत्यस्याः सह युवा-कण्ट्री-सङ्गीतकलाकारस्य जूलियट बार्न्स इति पात्रस्य अभिनयम् अकरोत्। अस्य भूमिकायै तस्याः गोल्डन ग्लोब पुरस्कारस्य द्विवारं नामाङ्कनमपि अभवत्।

कोनी ब्रिटन इत्यनया सामाजिकमाध्यमे पैनेटीयरस्य अनेकाः छायाचित्राः प्रकाशिताः तथा तस्याः निधनसमाचारं प्रति गहनं दुःखं व्यक्तम्। तया हेडनस्य स्मरणं प्रेम्णा कृतम् तथा तस्याः आत्मनः शान्तये प्रार्थना कृता।

पैनेटीयरस्य पूर्वसहचरस्य व्लादिमीर-क्लिट्स्को इत्यस्य सह एकः पुत्री अस्ति। एकादशवर्षीया तस्याः पुत्री काया इति नाम्ना ज्ञायते। व्लादिमीर-क्लिट्स्को यूक्रेनस्य पूर्वः विश्व-हैवीवेट्-मुक्केबाजी-विजेता अस्ति। काया स्वपित्रा सह निवसति।

रूसदेशेन यूक्रेनदेशे आक्रमणं कृतस्य अनन्तरं पैनेटीयरः सार्वजनिकरूपेण यूक्रेनदेशस्य समर्थनं कृतवती। २०२२ तमे वर्षे यूक्रेनदेशस्य जनानां चिकित्सोपकरणानां सुरक्षासामग्रीणां च साहाय्यार्थं धनसङ्ग्रहस्य उद्देश्येन तया राहत्-निधेः स्थापना अपि कृता। क्लिट्स्कोस्य भ्राता विटाली क्लिट्स्को कीव-नगरस्य महापौरः अस्ति।

पैनेटीयरः २०२४ तमे वर्षे ‘एम्बर अलर्ट’ इति चलचित्रे तथा २०२६ तमे वर्षे ‘स्लीपवॉकर’ इति चलचित्रे अभिनयक्षेत्रे पुनरागमनं कृतवती। अल्पायुषि एव सा अभिनयक्षेत्रे विशिष्टं स्थानं निर्मितवती तथा बालकलाकारात् सफलायाः दूरदर्शन-अभिनेत्र्याः चलचित्रकलाकारायाश्च रूपेण स्वकीयां पृथक् परिचितिं प्राप्तवती। तस्याः निधनं मनोरञ्जनजगतः कृते महती क्षतिः अस्ति।

---------------

Hindusthan Samachar / Dheeraj Maithani