सीहोरः, 19 अगस्तमासः (हि.स.)।

श्रावणमासस्य अन्तिमचरणे मध्यप्रदेशस्य सीहोरतः प्रसिद्धकुबेरश्वरधामपर्यन्तं श्रद्धायाः वातावरणं अधिकं गाढं भवति। सीवननद्याः तटात् कुबेरश्वरधामपर्यन्तं प्रतिदिनं बहुसङ्ख्यकाः श्रद्धालवः कांवडं नीत्वा प्राप्नुवन्ति। अस्यैव क्रमेण आगामिनि अगस्तमासस्य पञ्चविंशतितमे दिनाङ्के प्रदोषस्य अवसरे सीवननदीतटात् कुबेरश्वरधामपर्यन्तं भव्यकांवडयात्रा आयोजयिष्यते। प्रायः एकादशकिलोमीटरदीर्घायां यात्रायां अन्ताराष्ट्रियकथावाचकस्य पण्डितप्रदीपमिश्रस्य मार्गदर्शने बहुसङ्ख्यकानां श्रद्धालूनां सम्मिलितत्वस्य सम्भावना अस्ति।

कांवडयात्राम् आधारीकृत्य सीवननदीतटात् कुबेरश्वरधामपर्यन्तं विशेषं धार्मिकवातावरणं निर्मितम् अस्ति। नदीतटे कांवडानां, पूजासामग्रीणां, अन्येषां धार्मिकवस्तूनां च आपणाः सज्जीकृताः सन्ति। अगस्तमासस्य पञ्चविंशतितमस्य दिनाङ्कस्य यात्रा यथायथा समीपं गच्छति तथा कांवडयात्रिकाणां सङ्ख्याऽपि निरन्तरं वर्धते।

शताधिकाः सेवाकेन्द्राः स्थापयिष्यन्ते

कांवडयात्रायाः सिद्धतां प्रति विठलेशसेवासमित्या प्रशासनस्य च व्यवस्थाः प्रारब्धाः सन्ति। श्रद्धालूनां सुविधायै यात्रामार्गस्य विभिन्नेषु स्थानेषु शताधिकाः सेवाकेन्द्राः स्थापयिष्यन्ते। एतेषु केन्द्रेषु पेयजलम्, चायपानं, अल्पाहारः, फलाहारी खिचडी, भोजनप्रसादी इत्यादीनि आवश्यकसुविधाः उपलब्धाः भविष्यन्ति।

तदतिरिक्तं श्रद्धालूनां सम्भावितां भीडं दृष्ट्वा वाहनस्थानकव्यवस्था, यातायातनियन्त्रणम्, चिकित्साव्यवस्था, अन्याः आवश्यकव्यवस्थाश्च अन्तिमरूपं प्राप्नुवन्ति। आयोजकानां प्रशासनस्य च प्रयासः अस्ति यत् यात्रायाः अवधौ श्रद्धालुभ्यः कापि असुविधा न भवेत्।

अनेकभ्यः राज्येभ्यः आगच्छन्ति कांवडयात्रिकाः

कुबेरश्वरधामनि सम्प्रति महाराष्ट्रात्, हरियाणात्, पञ्जाबात्, उत्तरप्रदेशात् इत्यादिभ्यः विभिन्नेभ्यः राज्येभ्यः श्रद्धालवः आगच्छन्ति। बुधवासरे कथावाचकः पण्डितराघवमिश्रः धाम प्राप्य कांवडयात्रिकाणां स्वागतं कृतवान्। अस्मिन् अवसरे श्रद्धालुभिः भजनकीर्तनं कृतम्, येन सम्पूर्णः परिसरो भक्तिमयं दृश्यते स्म।

पण्डितराघवमिश्रः उक्तवान् यत् श्रावणमासः भगवान् शिवस्य आराधनायै विशेषमहत्त्वपूर्णः अस्ति। शिवमहापुराणस्य श्रवणं मनुष्यस्य अन्तः विवेकं जागरयति तथा तस्मै उचितानुचितयोः बोधं प्रददाति। सः उक्तवान् यत् आध्यात्मिकज्ञानं भगवान् शिवस्य भक्तिश्च मनुष्यं जीवने सम्यक् दिशि प्रेरयतः।

प्रातः नववादने सीवनतटात् प्रस्थास्यति यात्रा

विठलेशसेवासमितेः माध्यमप्रभारी मनोजदीक्षितमामा इत्यनेन उक्तं यत् अगस्तमासस्य पञ्चविंशतितमे दिनाङ्के प्रातः नववादने सीवननदीतटात् कांवडयात्रायाः शुभारम्भः भविष्यति। यात्रा प्रायः एकादशकिलोमीटरपरिमितं मार्गं गत्वा कुबेरश्वरधाम प्राप्स्यति, यत्र श्रद्धालवः भगवान् शिवस्य जलाभिषेकं करिष्यन्ति।

सः उक्तवान् यत् यात्रामार्गे बहुसङ्ख्यकाः सेवकाः श्रद्धालूनां सेवायै नियुक्ताः भविष्यन्ति। समित्या प्रशासनेन च वाहनस्थानकव्यवस्था, यातायातव्यवस्था, चिकित्साव्यवस्था, पेयजलव्यवस्था, अन्याः आवश्यकव्यवस्थाश्च अन्तिमरूपं प्राप्यन्ते।

कांवडयात्राम् आधारीकृत्य सीहोरनगरात् कुबेरश्वरधामपर्यन्तं श्रद्धायाः उत्साहस्य च वातावरणं वर्तते। अगस्तमासस्य पञ्चविंशतितमे दिनाङ्के आयोज्यमानायां यात्रायां यात्रामार्गे “हर हर महादेव” इति जयघोषैः सम्पूर्णं क्षेत्रं प्रतिध्वनितं भविष्यतीति अपेक्षा अस्ति।

---------------

Hindusthan Samachar / Dheeraj Maithani