फतेहाबादम्, 19 अगस्तमासः (हि.स.)। भारतीयजनतापार्टी-महिलामोर्चादलस्य प्रदेशाध्यक्षा ऋचा पाहवया उक्तं यत् २०४७ तमवर्षपर्यन्तं विकसितभारतस्य प्रधानमन्त्री नरेन्द्रमोदिनः सङ्कल्पं पूर्णं कर्तुं महिलानां महत्त्वपूर्णा भूमिका भविष्यति। तया घोषितं यत् महिलामोर्चया विद्यालयेषु, महाविद्यालयेषु, विश्वविद्यालयेषु च छात्राणां सुरक्षायाः, अधिकाराणां, आत्मरक्षायाश्च विषये विशेषं जागरूकताभियानं सञ्चालयिष्यते। अस्मिन् अभियाने हरियाणाराज्यमहिलायोगस्य अध्यक्षा उषा प्रियदर्शी अपि सहयोगं करिष्यति।

ऋचा पाहवा बुधवासरे फतेहाबादस्थिते भाजपायाः जनपदकार्यालये कार्यकर्तॄन् सम्बोधयन्ती आसीत्। तत्र प्राप्तायाः तस्याः कार्यकर्तृभिः पुष्पमालाभिः अभिनन्दनं कृतम्।

कार्यकर्तॄन् सम्बोधयन्ती महिलामोर्चायाः प्रदेशाध्यक्षा ऋचा पाहवा उक्तवती यत् महिलासङ्गठनं अधिकं सशक्तं, सक्रियं, सुदृढं च कर्तुम् एव तस्याः प्रमुखः उद्देश्यः अस्ति। तया लखपतीदीदी तथा ड्रोनदीदी इत्येतयोः योजनयोः उल्लेखं कुर्वती उक्तं यत् एताभ्यां योजनाभ्यां महिलाः आर्थिकरूपेण सशक्ताः भवन्ति।

भाजपाजनपदाध्यक्षः प्रवीनजोडा उक्तवान् यत् दले महिलानां भूमिका सर्वदा महत्त्वपूर्णा वर्तते तथा महिलामोर्चा सङ्गठनं मतदानकेन्द्रस्तरपर्यन्तं सुदृढं कर्तुं महत्त्वपूर्णं योगदानं ददाति। महिलामोर्चायाः जनपदाध्यक्षा डॉ. सुमनबजाजः प्रदेशाध्यक्षायाः स्वागतं कुर्वती उक्तवती यत् मोर्चायाः कार्यकर्तारः सर्वकारस्य जनकल्याणकारीयोजनाः गृहे गृहे प्रापयितुं कार्यं कुर्वन्ति।

Hindusthan Samachar / Dheeraj Maithani