Enter your Email Address to subscribe to our newsletters
रायपुरम्, 19 अगस्तमासः (हि.स.)।उच्चतमन्यायालयस्य न्यायाधीशमण्डलेन अगस्तमासस्य अष्टादशतमे दिनाङ्के २०२६ तमे वर्षे सम्पन्नायां सभायां छत्तीसगढस्य उच्चन्यायालये न्यायाधीशरूपेण त्रयाणां न्यायिकाधिकारिणां नियुक्तेः प्रस्तावः अनुमोदितः।
न्यायाधीशमण्डलेन अनुमोदितेषु नामसु सन्तोषशर्मा, सुषमासावन्त तथा सुधीरकुमारः सम्मिलिताः सन्ति। त्रयः अपि सम्प्रति न्यायिकस्य विधिप्रशासनस्य च महत्त्वपूर्णेषु पदेषु कार्यरताः सन्ति।
सन्तोषशर्मा सम्प्रति कोरबाजनपदस्य प्रधानजनपदसत्रन्यायाधीशस्य पदे पदस्थः अस्ति। सः अस्य पदस्य कार्यभारं २०२५ तमस्य वर्षस्य मईमासस्य नवमे दिनाङ्कात् स्वीकृतवान्।
सुषमासावन्त सम्प्रति रायपुरे विधिविधानकार्यविभागस्य प्रधानसचिवपदे कार्यरताः सन्ति। सा २०२५ तमस्य वर्षस्य अक्टूबरमासस्य त्रयोदशदिनाङ्कात् अस्मिन् महत्त्वपूर्णे प्रशासनिके विधिसम्बद्धे च पदे पदस्थिता अस्ति।
सुधीरकुमारः सम्प्रति रायपुरस्य परिवारन्यायालयस्य प्रधानन्यायाधीशपदे पदस्थः अस्ति। सः अस्य पदस्य कार्यभारं २०२५ तमस्य वर्षस्य मार्चमासस्य सप्तविंशतितमे दिनाङ्के स्वीकृतवान्।
उच्चतमन्यायालयस्य न्यायाधीशमण्डलस्य अनुमोदनानन्तरम् अधुना एतासां नियुक्तीनां सम्बन्धिनी आगामी संवैधानिकी प्रशासनिकी च प्रक्रिया पूर्णा करिष्यते।
Hindusthan Samachar / Dheeraj Maithani