भुवनेश्वरम्, 19 अगस्तमासः (हि.स.)।पूर्वलांजीगढविधानसभाक्षेत्रस्य विधायकः शिवाजी माझी इत्यस्य मङ्गलवासरे रात्रौ विलम्बेन कालाहाण्डीजनपदस्य बिजेपुरक्षेत्रान्तर्गते तस्य पैतृकग्रामे दानरगुडायां निधनम् अभवत्। सः वक्षःस्थलस्य पीडायाः शिकायतया चिकित्सां प्राप्नुवन् आसीत्। तस्य निधनात् सम्पूर्णे कालाहाण्डीजनपदे शोकस्य वातावरणं वर्तते।

राजनीतिक्षेत्रे प्रवेशं कृत्वा शिवाजी माझी नवगठितस्य लांजीगढविधानसभाक्षेत्रस्य प्रथमविधायकरूपेण प्रतिनिधित्वम् अकरोत्। सः २००९ तमवर्षात् २०१४ तमवर्षपर्यन्तं विधायकस्य रूपेण क्षेत्रस्य प्रतिनिधित्वम् अकरोत्। स्वकार्यकालस्य अवधौ आदिवासीबहुलस्य दुर्गमस्य च लांजीगढक्षेत्रस्य तथा थुआमूलरामपुरक्षेत्रस्य विकासाय स्थानीयसमुदायानां कल्याणाय च तेन अनेकाः योजनाः प्रवर्तिताः। तेन क्षेत्रस्य मूलभूतसुविधानां विकाससम्बद्धानां च विषयाणां प्राथमिकतया समाधानाय प्रयासाः कृताः।

कालाहाण्डीजनपदे विशेषानुसूचितजात्यनुसूचितजनजातिपरिषदः गठनानन्तरं शिवाजी माझी तस्याः परिषदः प्रथमाध्यक्षः अभवत्। स्वकार्यकालस्य अवधौ तेन जनपदस्य अनुसूचितजातीनां जनजातीनां च समुदायानां विकासाय कल्याणाय च अनेकाः महत्त्वपूर्णाः योजनाः प्रवर्तिताः।

तस्य निधनस्य वार्तया कालाहाण्डीजनपदे शोकस्य वातावरणं व्याप्तम् अस्ति। विभिन्नराजनीतिकदलानां नेतारः, जनप्रतिनिधयः, सामाजिककार्यकर्तारश्च तस्य निधनं प्रति गभीरं दुःखं व्यक्तवन्तः तथा दिवंगतनेतुः श्रद्धाञ्जलिं समर्पितवन्तः।

---------------

Hindusthan Samachar / Dheeraj Maithani