अभिनेत्री ईशा कोप्पिकरेण सामाजिक-माध्यमे एकं दृश्यकलिकाचित्रं प्रकाश्य स्वं गर्विताम् ‘अन्धभक्ताम्’ इति उक्तवती। तथापि सा स्पष्टं कृतवती यत् तस्याः एषा भक्तिः न कस्यचित् राजनैतिकदलस्य अथवा नेतारं प्रति अस्ति, अपितु देशस्य तस्य प्रगतिं च प्रति अस्ति। ईशायाः अस्य कथनस्य अभिनेत्री तथा सांसद् कङ्गनारनौतः इत्यनया अपि समर्थनं कृतम्। कङ्गनया ईशायाः प्रकाशनं पुनः प्रकाश्य उक्तं यत् सापि एतादृशेन राष्ट्रभक्तिभावेन स्वं सम्बद्धं मन्यते।

ईशा स्वस्य दृश्यकलिकाचित्रे देशं प्रति प्रेम्णः राजनैतिकसमर्थनस्य च मध्ये भेदं स्पष्टीकर्तुं प्रयत्नं कृतवती। सा अवदत् यत् देशं प्रति प्रेम्णः अर्थः न भवति यत् नागरिकाः स्वकीयनेतॄन् प्रश्नान् न पृच्छेयुः। तस्याः मतानुसारं देशस्य प्रगतौ योगदानं दातुं प्रत्येकं नागरिकस्य दायित्वम् अस्ति तथा आवश्यकेषु विषयेषु प्रश्नान् पृच्छणमपि अस्य दायित्वस्य एकः भागः अस्ति। सा जनान् राजनीतेः नेतृभ्यः च उपरि देशं स्थापयितुं तथा देशस्य प्रगतौ स्वकीयां भूमिकां निर्वोढुं च आह्वानं कृतवती।

अन्यतः कङ्गनारनौतः इत्यनया ईशायाः विचाराणां समर्थनं कुर्वती स्वकीयैः सामाजिकैः सार्वजनिकैः च सक्रियता-सम्बद्धैः अनुभवैः सह एतत् मतं प्रकाशितम्। सा २६/११ मुम्बई-आक्रमणानन्तरं आयोजितानां विरोध-प्रदर्शनैः सह विभिन्नेषु सामाजिक-विषयेषु स्वकीयां वाणीं उत्थापितवती इति उल्लेखं कृतवती। कङ्गना अवदत् यत् स्वदेशस्य अत्रत्यानां जनानां च ‘भक्ता’ भवितुं सा गौरवान्विता अस्ति।

उभयोः अभिनेत्र्योः वक्तव्येषु राष्ट्रभक्तिः कस्यचित् राजनैतिकदलस्य अथवा नेत्रा सह सम्बद्धा न भवेत्, अपितु देशस्य तस्य नागरिकान् च प्रति समर्पणमेव प्राथमिकतया भवेत् इति विचारः प्रमुखतया प्रकटितः।

Hindusthan Samachar / Divya Ranjan