पूर्वी सिंहभूमः, 19 अगस्तमासः (हि.स.)।ब्रह्माकुमारीभिः आगामी २५ अगस्त् दिनाङ्के दादीप्रकाशमणिजी इत्यस्याः पावनस्मृतौ आयोज्यमानस्य महतीरक्तदानमहाभियानस्य विषये बुधवासरे बिष्टुपुरस्थिते ब्रह्माकुमारीकेन्द्रे वार्ताहरसम्मेलनम् आयोजितम्। अस्मिन् अवसरे संस्थायाः वरिष्ठराजयोगशिक्षिका तथा कोल्हानप्रभारी बीके अञ्जुदीद्या उक्तं यत् एतदभियानं केवलं रक्तदानपर्यन्तं सीमितं नास्ति, अपितु मानवतायाः, विश्वबन्धुत्वस्य, आध्यात्मिकजागरूकतायाश्च सन्देशं प्रदातुं राष्ट्रियसेवाभियानरूपेण आयोजितम् अस्ति।

तया सूचितं यत् दादीप्रकाशमणिजी इत्यस्याः पावनस्मृतौ आयोजितस्य अस्य अभियानस्य अन्तर्गतं भारतस्य नेपालस्य च विभिन्नेषु नगरेषु एकस्मिन् समये रक्तदानशिबिराणि आयोजयिष्यन्ते। जमशेदपुरे मुख्यकार्यक्रमः २५ अगस्त् दिनाङ्के मरीनड्राइव, सोनारीस्थिते यूनिवर्सलपीसपैलेस इत्यत्र भविष्यति। कार्यक्रमस्य उद्देश्यं अधिकाधिकान् जनान् रक्तदानाय प्रेरयितुं तथा आवश्यकताग्रस्तरोगिभ्यः रक्तस्य उपलब्धतां सुनिश्चितं कर्तुम् अस्ति।

बीके अञ्जुदीद्या उक्तं यत् अस्मिन् वर्षे रक्तदानं “रक्तदानेन आध्यात्मिकसशक्तीकरणम्” इति विषयेन सम्बद्धं कृतम् अस्ति। शिबिरम् आगच्छद्भ्यः प्रतिभागिभ्यः प्रथमं सकारात्मकजीवनमूल्यानां राजयोगध्यानस्य च विषये सूचना प्रदास्यते, ततः ते रक्तदानं करिष्यन्ति। अनेन सेवायाः सह आत्मिकसन्तोषस्य मानसिकशान्तेश्च अनुभूतिरपि भविष्यति।

तया सूचितं यत् गतवर्षे दादीप्रकाशमणिजी इत्यस्याः स्मृतौ भारतस्य नेपालस्य च आयोजितेषु रक्तदानाभियानेषु अष्टाशीतिसहस्राधिकाः रक्तस्य मात्रकाः सङ्गृहीताः आसन्, यत् विश्वविक्रमरूपेण अभिलिखितम् अभवत्। अस्मिन् वर्षे तस्मादपि बृहत्तरं लक्ष्यं निर्धारितम् अस्ति तथा देशव्यापिनः सहस्रशः स्वयंसेवकाः अभियानस्य सफलतायै प्रयतन्ते।

वार्ताहरसम्मेलने नशामुक्तिभारत-अभियानस्य विषये अपि चर्चा कृता। सूचितं यत् अभियानस्य जागरूकतायानं नगरस्य विभिन्नेषु क्षेत्रेषु गत्वा जनान् मादकद्रव्येभ्यः दूरं स्थातुं सन्देशं ददाति। अद्यावधि ५१,३३५ अधिकैः जनैः नशामुक्तेः सङ्कल्पः स्वीकृतः अस्ति। एतदभियानं २७ अगस्त् दिनाङ्कपर्यन्तं जमशेदपुरे तदनन्तरप्रदेशेषु च प्रचलिष्यति।

अस्मिन् अवसरे बीके रेनुदीदी, प्रशासिका हरिमुखी तथा ब्रह्माकुमारीपरिवारस्य अन्ये सदस्याः उपस्थिताः आसन्। संस्थया नगरवासिभ्यः २५ अगस्त् दिनाङ्के आयोज्यमाने रक्तदानमहाभियाने वर्धमानरूपेण भागं ग्रहीतुं तथा मानवसेवायाः अस्मिन् पुण्यकार्ये सहयोगं प्रदातुं च आह्वानं कृतम्।

---------------

Hindusthan Samachar / Dheeraj Maithani