नव दिल्ली, 19 अगस्तमासः (हि.स.)।

मलेशियादेशस्य पर्यटनविभागेन अगस्तमासस्य द्वादशदिनाङ्कतः विंशतिदिनाङ्कपर्यन्तं चेन्नई, मुम्बई, नवदिल्ल्यां च स्वस्य विक्रयमिशनशृङ्खलायाः द्वितीयचरणस्य आयोजनं कृतम्। अस्य उद्देश्यं भारतीयपर्यटनव्यावसायिकैः सह सम्बन्धान् सुदृढान् कर्तुं, नवीनव्यावसायिकावसरान् अन्वेष्टुं, भारतीययात्रिकाणां मध्ये मलेशियादेशं प्रियपर्यटनस्थलरूपेण स्थापितुं च अस्ति।

अस्मिन् विक्रयमिशने मलेशियादेशस्य पर्यटनक्षेत्रसम्बद्धाः सप्तचत्वारिंशत् प्रतिनिधयः भागं गृहीतवन्तः। तेषु यात्रासञ्चालकाः, होटलव्यवसायिनः, विमानसंस्थानां प्रतिनिधयः च सम्मिलिताः आसन्। कार्यक्रमस्य अवधौ उभयोः देशयोः पर्यटनक्षेत्रसम्बद्धप्रतिनिधीनां मध्ये व्यावसायिकोपवेशनानि, परस्परसम्पर्कः, विचारविनिमयश्च अभवत्। भारतीययात्रिकाणां कृते नवीनयात्रापुटकानि पर्यटनावसरांश्च विकसितुं विषये अपि चर्चा कृता।

अस्य विक्रयमिशनस्य नेतृत्वं मलेशियापर्यटनविभागस्य महानिदेशकः मोहम्मद अमीरुल रिजाल अब्दुल रहीम इत्यनेन कृतम्। कार्यक्रमस्य आयोजनं बाटिक एयर इत्यस्य सहयोगेन कृतम्। मलेशियादेशं प्रमुखपर्यटनस्थलरूपेण प्रवर्धयितुं सर्वकारीयस्य निजीक्षेत्रस्य च मध्ये सहयोगस्य महत्त्वपूर्णा प्रयत्नरूपेण एतत् मन्यते।

मोहम्मद अमीरुल रिजाल अब्दुल रहीमः उक्तवान् यत् भारतं मलेशियादेशस्य कृते महत्त्वपूर्णतमेषु तीव्रगत्या वर्धमानेषु च विदेशीयपर्यटनबाजारेषु अन्यतमम् अस्ति। सः उक्तवान् यत् वर्तमानभूराजनीतिकपरिस्थितीनां परिवर्तनशीलस्य अन्तरराष्ट्रीययात्रापरिवेशस्य च प्रभावः केषुचित् क्षेत्रेषु पर्यटनस्य उपरि भवितुं शक्नोति, तथापि भारतीयबाजारे स्वस्य सुदृढोपस्थितिं स्थापयितुं मलेशियादेशः प्रतिबद्धः अस्ति।

सः उक्तवान् यत् भारतीययात्रिकाणां मध्ये मलेशियादेशं प्रमुखपर्यटनविकल्परूपेण स्थापयितुं निरन्तराः लक्षिताः च प्रचाराभियानाः सञ्चालयिष्यन्ते। एते प्रयासाः विमाननकम्पनीभिः यात्राव्यवसायसम्बद्धैः सहयोगिभिश्च सहकारेण अधिकं सुदृढाः करिष्यन्ते।

मोहम्मद अमीरुल रिजाल अब्दुल रहीमः उक्तवान् यत् अस्य विक्रयमिशनस्य मुख्योद्देश्यं व्यावसायिकसहयोगिताः सुदृढाः कर्तुं, नवीनव्यावसायिकावसरान् सृजितुं, भारतीयबाजारस्य आवश्यकतानुसारं अधिकान् आकर्षकान् प्रतिस्पर्धात्मकान् च यात्रापुटकान् निर्मातुं पर्यटनक्षेत्रसम्बद्धान् सहयोगिनः प्रोत्साहितुं च अस्ति।

मलेशियादेशः भारतीयपर्यटकान् केवलं क्वालालम्पुरं जेन्टिङ्ग् हाईलैण्ड्स् च पर्यन्तं सीमितयात्राकार्यक्रमेभ्यः अग्रे गत्वा देशस्य अन्येषां पर्यटनस्थलानां भ्रमणाय प्रोत्साहितुम् इच्छति।

मलेशियापर्यटनविभागस्य अनुसारं सारावाक्, लैङ्ग्कावी, पेनाङ्ग्, जोहोर्, सबाह् इत्यादिषु पर्यटनस्थलेषु भारतीययात्रिकाणां कृते महती सम्भावना अस्ति। एतेषु स्थलेषु प्राकृतिकसौन्दर्यम्, रोमाञ्चकारिकाः क्रियाकलापाः, समुद्रीयद्वीपानां भ्रमणम्, सांस्कृतिकविरासत्, खाद्यपदार्थाः, क्रयणम्, पारिवारिकमनोरञ्जनम्, व्यावसायिककार्यक्रमाः, गन्तव्यविवाहाः च इत्यादयः विविधाः अनुभवाः उपलब्धाः सन्ति।

एतेषां पर्यटनस्थलानां भारतदेशे व्यापकप्रचारं कृत्वा यात्रिकाणां मलेशियादेशे अधिककालपर्यन्तं निवासस्य, अधिकव्ययस्य, पुनर्यात्रायाः च प्रोत्साहनं भवितुम् अपेक्ष्यते।

भारतं मलेशियादेशस्य प्रमुखेषु विदेशीयपर्यटनबाजारेषु अन्तर्भवति। उभयोः देशयोः मध्ये प्रत्येकसप्ताहे एकोनविंशत्यधिकशतं प्रत्यक्षविमानसेवाः सञ्चाल्यन्ते। एतासु विमानसेवासु प्रत्येकसप्ताहे सप्तत्रिंशदधिकानि सहस्राणि आसनानि उपलब्धानि सन्ति। सुदृढवायुसम्पर्कस्य कारणेन भारतीययात्रिकाणां कृते मलेशियादेशस्य यात्रा सुलभा अभवत्।

भारतीयपर्यटनबाजारे मलेशियादेशस्य प्रदर्शनं निरन्तरं सुधरितम् अस्ति। २०२३ तमवर्षस्य दिसम्बरमासे भारतीयनागरिकाणां कृते वीजारहितयात्रासुविधायाः प्रारम्भानन्तरं मलेशियादेशं प्राप्तानां भारतीयपर्यटकानां सङ्ख्यायां उल्लेखनीया वृद्धिः अभवत्।

२०२५ तमे वर्षे भारतात् पञ्चदशाधिकाः लक्षपर्यटकाः मलेशियादेशं प्राप्तवन्तः। तेन सह भारतं मलेशियादेशस्य शीर्षपञ्च विदेशीयपर्यटनबाजारेषु सम्मिलितम् अभवत्। अस्यां सूच्यां सिङ्गापुरम्, थाइलैण्ड्, इण्डोनेशिया, चीनदेशश्च अपि सम्मिलिताः सन्ति। मलेशियादेशस्य अपेक्षा अस्ति यत् भारतीयपर्यटकानां एषा सकारात्मकाभिरुचिः २०२६ तमे वर्षे तदनन्तरं च निरन्तरं भविष्यति।

मलेशियादेशेन ‘विजिट् मलेशिया २०२६’ इति अभियानं २०२७ तमवर्षपर्यन्तं विस्तारितम् अस्ति। अभियानस्य कालावधिविस्तारेण सह भारतदेशे प्रचारगतिविधयः अपि अधिकं तीव्राः करिष्यन्ते।

अस्य उद्देश्यं २०२६ तमे वर्षे प्राप्तां पर्यटनवृद्धिं संरक्षितुं तथा आगामिषु वर्षेषु भारतीयपर्यटकानां सुदृढसङ्ख्यां सुनिश्चितां कर्तुम् अस्ति। अभियानस्य विस्तारेण पर्यटनउद्योगेन सह सहयोगं वर्धयितुं, मलेशियादेशस्य विभिन्नानां पर्यटनस्थलानां परिचितिं सुदृढां कर्तुं, भारतीयबाजारे विश्वासं स्थापयितुं च नवीनाः अवसराः प्राप्तुं अपेक्ष्यन्ते।

मलेशियापर्यटनविभागस्य अनुसारं ‘विजिट् मलेशिया २०२६’ इत्यस्य अभियानस्य अन्तर्गतं देशस्य प्राकृतिकसौन्दर्यं, समृद्धां सांस्कृतिकविरासतं, विविधान् पर्यटनाकर्षणान् च विश्वस्य समक्षं प्रदर्श्यते। तेन सह स्थायिपर्यटनविकासः, स्थानीयसमुदायानां सहभागिता, पर्यटनउद्योगसम्बद्धानां जनानां दीर्घकालिकहितलाभश्च अपि विशेषतया प्रोत्साह्यते।

---------------

Hindusthan Samachar / Dheeraj Maithani