नवदिल्ली, १९ अगस्तमासः (हि.स.)। उत्तरप्रदेशस्य मुख्यमन्त्री योगी आदित्यनाथः यूपी-जापान-निवेश-सम्मेलनस्य अवसरे प्रमुखकम्पनीनां मुख्यकार्यकारी-अधिकारिभिः व्यावसायिकनेतृभिश्च सह आयोजितायां गोलमेजसभायां निवेशकेभ्यः प्रदेशे निवेशं प्रति प्रदर्शितस्य उत्साहस्य कृते कृतज्ञतां प्रकटितवान्। सः अवदत् यत् विगतेषु नववर्षेषु उत्तरप्रदेशे सर्वतोमुखं व्यापकं परिवर्तनम् अभवत्। अस्य परिवर्तनस्य परिणामतः अद्य उत्तरप्रदेशः भारतस्य प्रमुखेषु तथा निवेशकानां प्रियेषु निवेशगन्तव्यस्थानेषु उदयमानः अस्ति।

मुख्यमन्त्री अवदत् यत् उत्तरप्रदेशे निवेशं कुर्वद्भ्यः उद्यमिभ्यः कम्पनीभ्यश्च सर्वकारस्य पक्षतः सर्वसम्भवं सहयोगं प्रदास्यते। सः निवेशकान् आहूतवान् यत् ते उत्तरप्रदेशम् आगत्य अत्र स्वकीयानां औद्योगिक-व्यावसायिकक्रियाकलापानां विस्तारं कुर्वन्तु। सर्वकारः एतत् सुनिश्चितं करिष्यति यत् निवेशकेभ्यः कस्मिन्नपि स्तरे अनावश्यककष्टस्य सम्मुखं न कर्तव्यं भवेत्।

निवेशकानां विचाराणां गम्भीरतया विचारः भविष्यति

योगी आदित्यनाथः अवदत् यत् निवेशसम्मेलनं प्रति प्रमुखोद्योगपतिभिः मुख्यकार्यकारी-अधिकारिभिश्च यः उत्साहः प्रदर्शितः, तदर्थं सः सर्वेभ्यः हृदयतः धन्यवादं ददाति। निवेशकैः प्रदत्ताः विचारा: प्रदेशसर्वकारस्य दलने गम्भीरतया संज्ञानं नीताः सन्ति। सः आश्वासनं दत्तवान् यत् निवेशकानां विचाराणाम् अपेक्षाणां च विषये गम्भीरतया विचारः करिष्यते तथा याः व्यावहारिकसमस्याः सम्मुखीभविष्यन्ति, तासां समाधानाय आवश्यकाः उपायाः क्रियन्ते। सर्वकारः तस्य सम्पूर्णं दलं च निवेशानुकूलं वातावरणं प्रदातुं प्रतिबद्धम् अस्ति।

युवा-मानवशक्तिः कौशलविकासश्च भविष्यतः शक्तिः

मुख्यमन्त्री अवदत् यत् उत्तरप्रदेशे विपुला युवामानवशक्तिः अस्ति। सर्वकारः युवभ्यः उद्योगानां आवश्यकतानुसारं कौशल-विकासस्य कौशलोन्नयनस्य च अवसरान् प्रददाति। अनेन निवेशकेभ्यः प्रशिक्षितः सक्षमश्च मानवसंसाधनम् उपलब्धं भविष्यति। प्रदेशे परिवर्तमानस्य औद्योगिकपरिदृश्यस्य अनुरूपं आधारभूत-संरचना, सम्पर्कव्यवस्था, कुशलमानव-शक्तिः तथा सुगमतया व्यवसाय-सञ्चालनस्य व्यवस्था निरन्तरं सुदृढीक्रियते। अस्य प्रत्यक्षलाभः प्रदेशे निवेशं कुर्वतीभ्यः निर्माणीभ्यः भविष्यति।

निवेशकेभ्यः प्रत्येकस्मिन् स्तरे सहयोगः

सः अवदत् यत् उत्तरप्रदेशे क्रियमाणः निवेशः निवेशकानां कृते अत्यन्तं लाभदायकः सिद्धः भविष्यति। प्रदेश-सर्वकारः स्वनीतीनां परिधौ निवेशकेभ्यः सर्वसम्भवं सहयोगं प्रदास्यति। सर्वकारस्य प्रयासः अस्ति यत् निवेशस्य प्रक्रिया सरला, पारदर्शिनी समयबद्धा च भवेत् तथा उद्यमिभ्यः स्वव्यापारस्य विस्ताराय ध्यानं दातुं उत्तमं वातावरणं प्राप्येत। सर्वकारस्य सम्पूर्णं दलं निवेशकैः सह तिष्ठति तथा कस्यापि समस्यायाः उत्पत्तौ तस्याः समाधानाय प्रभावीव्यवस्था सुनिश्चितं करिष्यते।

‘यत् वदामः, तत् धरातले कार्यरूपेण परिणमयामः’

मुख्यमन्त्री योगी आदित्यनाथः अवदत् यत् उत्तरप्रदेशसर्वकारः केवलं घोषणाः कर्तुं न विश्वसिति, अपि तु यत् वदति तत् धरातले कार्यरूपेण परिणमयति। विगतेषु नववर्षेषु प्रदेशे जातं परिवर्तनं निवेशकाः स्वयमेव द्रष्टुं शक्नुवन्ति। विधिव्यवस्था, सम्पर्क-व्यवस्था, आधारभूतसंरचना, औद्योगिक-वातावरणं तथा निवेशाय सज्जाः नीतयः इत्येतेषु क्षेत्रेषु जातैः परिवर्तनेः उत्तरप्रदेशस्य नूतनं स्वरूपं समक्षम् आगतम् अस्ति। सर्वकारस्य कार्यप्रणाल्यां जातमिदं परिवर्तनम् निवेशकैः अपि स्पष्टतया दृश्यते।

निवेशसम्मेलनं महत्त्वपूर्णः अवसरः इति उक्तम्

मुख्यमन्त्रिणा इदं निवेशसम्मेलनम् उत्तर-प्रदेशस्य औद्योगिकविकासस्य निवेशस्य च दृष्ट्या अत्यन्तं महत्त्वपूर्णम् अवसरं कथितम्। सः अवदत् यत् एतादृशेन संवादेन सर्वकाराय उद्योगजगतः अपेक्षाणां आवश्यकतानां च अवगमनस्य अवसरः प्राप्यते, अपरतः निवेशकेभ्यः प्रदेशे उपलब्धानां सम्भावनानां सुविधानां च विषये सूचना प्राप्यते।

योगी आदित्यनाथः विश्वासं प्रकटितवान् यत् प्रमुखोद्योगसमूहानां उत्तरप्रदेशे वर्धमानेन रुचिप्रदर्शनेन प्रदेशे नूतननिवेशानां, रोजगारस्य आर्थिक-क्रियाकलापानां च गतिः अधिका भविष्यति। सः निवेशकान् उत्तरप्रदेशस्य विकासयात्रायां सहभागीभवितुं तथा प्रदेशे निवेशस्य अवसराणां लाभं स्वीकर्तुम् आहूतवान्।

Hindusthan Samachar / Divya Ranjan