Enter your Email Address to subscribe to our newsletters
देहरादूनम्, 19 अगस्तमासः (हि.स.)।
मुख्यसचिवस्य आनन्दबर्द्धनस्य अध्यक्षतायां बुधवासरे मार्गसुरक्षासम्बद्धानुश्रवणसमितेः उपवेशनम् अभवत्। उपवेशने प्रदेशे सडकदुर्घटनानां स्थितेः, सडकसुरक्षोपायानां, दुर्घटनाप्रवणस्थलानां सुधारस्य, जनपदस्तरीयसडकसुरक्षासमितीनां च समीक्षा कृता। मुख्यसचिवेन सडकदुर्घटनानां न्यूनीकरणाय सम्बन्धितविभागेभ्यः परस्परसमन्वयेन प्रभावी समयबद्धकार्यवाही सुनिश्चितं कर्तुं निर्देशाः प्रदत्ताः।
उपवेशनकाले मुख्यसचिवेन प्रदेशे सडकदुर्घटनानां स्थितेः समीक्षां कुर्वता निर्देशितं यत् दुर्घटनानां कारणानां वैज्ञानिकरीत्या विश्लेषणं क्रियताम्। तेन सडकस्य संरचनायाः, मार्गज्यामितेः अन्येषां च प्राविधिकदोषाणां विषये विशेषं ध्यानं दातुं निर्देशाः प्रदत्ताः। तेन उक्तं यत् येषु स्थलेषु सडकस्य स्थितेः अथवा संरचनायाः कारणेन दुर्घटनायाः सम्भावना वर्धते, तत्र सम्बन्धिताधिकारिभिः समन्वयं कृत्वा आवश्यकसुधारात्मककार्यवाही सुनिश्चितं क्रियताम्।
मुख्यसचिवेन सडकसुरक्षापरीक्षणाय प्राथमिकता दातव्या इति उक्तम्। बसस्थानकानामपि दलं निर्माय नियमितं परीक्षणं कारयितुं निर्देशः प्रदत्तः। तथैव परीक्षणे प्राप्तानां सुझावानां गम्भीरतया विचारं कृत्वा आवश्यकसुधारात्मकव्यवस्थानां कार्यान्वयनं करणीयम् इति निर्देशितम्।
मुख्यसचिवेन उक्तं यत् उच्चतम-न्यायालयस्य निर्देशानां पूर्णतः अनुपालनं सुनिश्चितं क्रियताम्। तथैव द्विचक्रिकावाहनचालकैः यात्रिभिश्च हेल्मेटस्य अनिवार्यप्रयोगः प्रभावीरूपेण सुनिश्चितः क्रियताम् तथा यातायातनियमानां पालनं न कुर्वतां जनानां विरुद्धं नियमानुसारं कार्यवाही क्रियताम्। तेन परिवहनविभागाय पुलिसविभागाय च नियमितरूपेण प्रवर्तनसम्बद्धकार्यवाहीं समीक्षितुं निर्देशाः प्रदत्ताः।
मुख्यसचिवेन पर्वतीयमार्गेषु सुरक्षादृष्ट्या वंशवृक्षाणां, आघातरोधकवेष्टनानां, पारापेट् इत्यादीनां सम्बन्धे पूर्वं वनविभागाय लोकनिर्माणविभागाय च प्रदत्तनिर्देशेषु कृता कार्यवाही अपि ज्ञाता। तथैव अन्यराज्येषु प्रचलितानां श्रेष्ठसडकसुरक्षाव्यवस्थानां अध्ययनं कृत्वा तासां उत्तराखण्डे कार्यान्वयनस्य सम्भावनायाः विषये विचारं कर्तुं निर्देशाः प्रदत्ताः।
तेन दुर्घटनाप्रवणस्थलानां तथा दुर्घटनासम्भावितस्थलानां सडकसुरक्षापरीक्षणं तृतीयपक्षीयपरीक्षणं च कारयितुं तथा परीक्षणस्य सुझावानाम् आधारेण सुधारात्मककार्यवाहीं सुनिश्चितं कर्तुं निर्देशाः प्रदत्ताः।
मुख्यसचिवेन जनपदस्तरीयसडकसुरक्षासमितीनां उपवेशनानि निर्धारितसमये नियमितरूपेण आयोजयितुं निर्देशितम्। तेन उक्तं यत् प्रत्येकस्य उपवेशनस्य कार्यवृत्तं सम्बन्धिते सङ्केतस्थले अनिवार्यरूपेण अध्यारोपणीयम्। तेन परिवहनसचिवाय सडकसुरक्षासम्बद्धानां नियमितकार्याणां निरन्तरं पर्यवेक्षणं कर्तुं तथा आवश्यकतानुसारं सम्बन्धितविभागैः समन्वयं कृत्वा कार्यवाहीं सुनिश्चितं कारयितुं निर्देशाः प्रदत्ताः।
मुख्यसचिवेन सडकसुरक्षायाः प्रति जनजागरूकतां वर्धयितुं जागरूकताशिबिराणि आयोजयितुं निर्देशः प्रदत्तः। तेन उक्तं यत् दुर्घटनानन्तरं उद्धारकार्यादीनां विषये जागरूकतायै पुलिसस्वास्थ्यपरिवहनविभागानां संयुक्तकार्यशाला आयोजनीया। सडकसुरक्षाजागरूकताभियानं केवलं औपचारिकतापर्यन्तं सीमितं न कृत्वा प्रत्येकं द्वित्रिमासे अभियानरूपेण व्यापकस्तरे सञ्चालयितव्यम्। अस्य कृते प्रचारप्रसारस्य वार्षिकयोजना निर्मातव्या इति निर्देशः प्रदत्तः।
मुख्यसचिवेन राहवीरयोजनायाः व्यापकप्रचारप्रसारं सुनिश्चितं कर्तुं निर्देशः प्रदत्तः। परिवहनविभागाय हिट् एण्ड् रन इत्यस्य लम्बितप्रकरणानां सूची सम्बन्धितजनपदाधिकारिभ्यः उपलब्धां कारयितुं निर्देशः प्रदत्तः। तेन उक्तं यत् जनपदाधिकारी स्वस्वजनपदे लम्बितप्रकरणानां स्वयं समीक्षा कृत्वा शीघ्रातिशीघ्रं निस्तारणं कुर्वन्तु।
मुख्यसचिवेन सडकसुरक्षाजागरूकताचित्राणां स्थानीयचलचित्रगृहेषु प्रदर्शनं कारयितुं निर्देशः प्रदत्तः। तेन उक्तं यत् जागरूकताकार्यक्रमाणां कृते विभागैः वर्षपर्यन्तस्य समेकितप्रचारप्रसारपञ्चाङ्गं निर्मातव्यम्, येन विभिन्नेषु समयेषु लक्षितसमूहेषु सडकसुरक्षासम्बद्धः सन्देशः प्रभावीरूपेण प्रापयितुं शक्यते।
मुख्यसचिवेन दुर्घटनाप्रवणस्थलानां सुधारकार्येषु वेगं वर्धयित्वा निर्धारितसमयसीमायां कार्यं पूर्णं कर्तुं निर्देशाः प्रदत्ताः। अवशिष्टेषु दुर्घटनाप्रवणस्थलेष्वपि ठोसां समयबद्धां च कार्यवाहीं सुनिश्चितं कर्तुं तेन उक्तम्। मुख्यसचिवेन शिक्षाविभागस्य परिवहनविभागस्य च समन्वयेन विद्यालयेषु सडकसुरक्षाक्लबानां स्थापनां तथा तेषां सक्रियसञ्चालनं कर्तुं निर्देशाः प्रदत्ताः। सर्वेभ्यः सम्बन्धितविभागेभ्यः सडकसुरक्षासम्बद्धकार्येषु विभागीयसमन्वयस्य, नियमितानुश्रवणस्य, कार्यान्वितकार्यवाहीप्रतिवेदनस्य च नियमितरूपेण प्रतिवेदनं सुनिश्चितं कर्तुं निर्देशितम्।
तेन उक्तं यत् सडकदुर्घटनानां न्यूनीकरणाय केवलं प्रवर्तनकार्यवाही पर्याप्ता नास्ति, अपितु सडकनिर्माणप्राविधिकव्यवस्था, वाहनस्य चालकस्य च व्यवहारः, जनजागरूकता, शीघ्रोपचारश्च इत्येतेषु सर्वेषु पक्षेषु एकस्मिन् समये समन्वितरूपेण कार्यं करणीयम्।
अस्मिन् अवसरे सचिवः रविनाथरमणः, डॉ. रणवीरसिंहचौहानः सहिताः सम्बन्धितविभागानां अन्ये वरिष्ठाधिकारिणः तथा विभिन्नजनपदेभ्यः जनपदाधिकारिणश्च उपस्थिताः आसन्।
---
Hindusthan Samachar / Dheeraj Maithani