— राजनाथसिंहेन नवदिल्ली इत्यत्य जापानस्य रक्षामन्त्री शिन्जिरो कोइजुमी इत्यस्य स्वागतं कृतम्

नवदिल्ली, १८ अगस्तमासः (हि.स.)। रक्षामन्त्री राजनाथसिंहेन गुरुवासरे नवदिल्ली इत्यत्र जापानस्य रक्षामन्त्री शिन्जिरो कोइजुमी इत्यस्य स्वागतं कृत्वा तेन सह द्विपक्षीयवार्ता कृता। उभयोः देशयोः मध्ये ‘जापान-भारत-विशेष-सामरिक-वैश्विक-सहभागिता’ इत्यस्य अन्तर्गतं रक्षासहयोगस्य निरन्तरं सुदृढीकरणस्य स्वागतं कृतम्। उभौ मन्त्रिणौ स्वतन्त्रस्य मुक्तस्य च हिन्द-प्रशान्तक्षेत्रस्य साकाररूपं प्रदातुं स्वनेतृत्वे रक्षासहयोगं अधिकं सुदृढं कर्तुं प्रतिबद्धतां प्रकटितवन्तौ।

द्विपक्षीयवार्तायाः अनन्तरं संयुक्तवक्तव्ये उक्तं यत् विश्वे वर्धमानानां तनावानां समये उभयोः देशयोः मध्ये क्षेत्रीयस्य अन्ताराष्ट्रियस्य च सुरक्षावातावरणस्य मूल्याङ्कनस्य आदान-प्रदानम् आवश्यकम् अस्ति। नौसञ्चालनस्य आकाशमार्गेण उड्डयनस्य च स्वातन्त्र्ये सुरक्षायां वा बाधां जनयन्तीं कस्यामपि एकपक्षीयां कार्यवाहीं तथा बलप्रयोगेन प्रभावेन वा वर्तमानस्थितिं परिवर्तयितुं प्रयत्नं च उभौ दृढतया विरोधं कृतवन्तौ। उभौ मन्त्रिणौ समुद्रीसुरक्षासहयोगं सुदृढं कर्तुं स्वप्रतिबद्धतां पुनः प्रकटितवन्तौ तथा जापानस्य भारतस्य च रक्षामन्त्रालययोः मध्ये समुद्रीसुरक्षासहयोगसम्बन्धी एकस्मिन् सन्धिपत्रे हस्ताक्षरं कृतवन्तौ। एतत् समझौतापत्रं समुद्रीसुरक्षाक्षेत्रे उभयोः देशयोः सहयोगं अधिकमग्रे नेतुं रूपरेखां प्रदास्यति।

उभौ मन्त्रिणौ सामरिकानाम् परिचालना-त्मकानां च आवश्यकतानां पूर्तिं कुर्वन्तं ठोससमुद्रीसुरक्षासहयोगं द्रुतगत्या अग्रे नेतुं सहमतिं प्रकटितवन्तौ। जापानस्य तान्त्रिकविशेषज्ञतायाः भारतस्य उत्पादन-क्षमतायाः च लाभं स्वीकृत्य नौसेनायै पोत-निर्माणस्य तेषां परिकल्पनायाश्च क्षेत्रे संयुक्तविकासस्य सम्भावनां अन्वेष्टुं आवश्यकतां तौ प्रतिपादितवन्तौ। उभौ उक्तवन्तौ यत् रक्षापोतनिर्माणे तत्सम्बद्धेषु च क्षेत्रेषु परस्परस्य सामर्थ्यस्य लाभः उभाभ्यां पक्षाभ्यां स्वीकरणीयः। उभौ मन्त्रिणौ निकटभविष्ये पोतानां मरम्मतव्यवस्थां पूर्णां कर्तुं सहितं पोत-मरम्मत-सुविधानां परस्परं प्रावधानं अग्रे नेतुम् अपि सहमतिं प्रकटितवन्तौ।

उभौ मन्त्रिणौ जापान-भारतयोः द्वारा आयोजितानां द्विपक्षीयाभ्यासानां निरन्तर-विस्तारस्य स्वागतं कृतवन्तौ। एतेषु जापान-भारत-सेनाभ्यासः ‘धर्म गार्जियन’ तथा जापान-भारत-समुद्री-अभ्यासः ‘जैमेक्स’ इत्येतौ प्रमुखौ स्तः। विशेषरूपेण अस्मिन् वर्षे उभयोः देशयोः वायुसेनयोः मध्ये आयोज्यमानस्य ‘वीर गार्जियन’ इत्यस्य कृते सहयोगे निरन्तरं प्रचलितायाः प्रगतेः स्वागतं कृतम्। अस्मिन् अभ्यासे जापानस्य वायु-स्वरक्षा-सेनायाः युद्ध-विमानानि प्रथमवारं भारतम् आगमिष्यन्ति। उभयोः देशयोः सेनयोः मध्ये सहयोगं वर्धयितुं स्व-स्वविशेषसञ्चालन-बलयोः मध्ये आदान-प्रदानं प्रोत्साहितुं तथा भारतस्य एकीकृत-रङ्गमञ्च-सेनानिर्देशानां निर्माणानन्तरं तै: सह सहयोगं वर्धयितुं च सहमतिः जाता।

राजनाथसिंहेन रक्षोपकरणानां प्रौद्योगिक्याश्च हस्तान्तरणाय जापानस्य रूपरेखायाः साम्प्रतिकसमीक्षायाः स्वागतं कृतम् तथा आशा प्रकटिता यत् जापानः हिन्द-प्रशान्तक्षेत्रे सम्पूर्णे विश्वे च शान्तौ स्थैर्ये च अधिकं योगदानं करिष्यति। उभौ मन्त्रिणौ जापान-भारत-इण्डोनेशिया-देशानां प्रथमस्य त्रिपक्षीयस्य नौसेना-भ्यासस्य स्वागतं कृतवन्तौ, यः अस्मिन् वर्षे फेब्रुवरीमासे आयोजितः आसीत्। हिन्द-प्रशान्तक्षेत्रस्य समग्रदृष्ट्या अवलोकनं कर्तुं तथा अस्मिन् क्षेत्रे विश्वे च शान्तेः स्थैर्यस्य च कृते संयुक्तरूपेण योगदानं दातुं तौ उच्चस्तरीय-आदानप्रदानैः, अभ्यासैः अन्याभिश्च आवश्यकाभिः प्रयत्नैः तृतीयदेशैः सह सहयोगं अधिकं गभीरं कर्तुं सहमतिं प्रकटितवन्तौ।

Hindusthan Samachar / Divya Ranjan