Enter your Email Address to subscribe to our newsletters
पूर्वी सिंहभूमः, 20 अगस्तमासः (हि.स.)।शिक्षाक्षेत्रे पूर्वीसिंहभूमजनपदेन उल्लेखनीया उपलब्धिः प्राप्य सम्पूर्णे झारखण्डराज्ये प्रथमस्थानं प्राप्तम् अस्ति। अगस्तमासे २०२६ तमे वर्षे प्रकाशितायां जनपदीयशिक्षाप्रदर्शनसमीक्षाप्रतिवेदने राज्यस्य सर्वेषां चतुर्विंशतिजनपदानां प्रदर्शनस्य मूल्याङ्कनं कृतम्, यस्मिन् पूर्वीसिंहभूमः सर्वेषां जनपदानां मध्ये अग्रस्थाने अभवत्।
जनपदस्य एषा श्रेणी विद्यार्थिनां अधिगमक्षमता, विद्यालयानां नियमितनिरीक्षणम्, शैक्षणिकगतिविधीनां समीक्षा, शिक्षासम्बन्धितानां दत्तांशानां समये संकलनम्, प्रशासनिकव्यवस्था इत्यादीनां समग्रतया त्रयोविंशतिमुख्यमानकानां उपमानकानां च आधारेण निर्धारिताऽस्ति। एतेषु सर्वेषु क्षेत्रेषु पूर्वीसिंहभूमस्य प्रदर्शनं श्रेष्ठं प्राप्तम् अस्ति।
गुरुवासरे प्रकाशितप्रतिवेदनानुसारं जनपदे विद्यार्थिनां शैक्षणिकस्तरस्य सुधाराय क्रियमाणानां प्रयत्नानां सह विद्यालयानां नियमितनिरीक्षणस्य शिक्षणव्यवस्थायाः समीक्षायाश्च सकारात्मकः प्रभावः दृश्यते। शिक्षाविभागस्य पक्षतः दत्तांशानां सम्यक् समये च अभिलेखनस्य तथा विद्यालयानां गतिविधीनां निरीक्षणस्य व्यवस्था अपि अस्याः उपलब्धेः महत्त्वपूर्णः आधारः मन्यते।
राज्यस्य श्रेणीक्रमे पूर्वीसिंहभूमस्य अनन्तरं लोहरदगाजनपदस्य कोडरमाजनपदस्य च प्रदर्शनमपि श्रेष्ठं दृष्टम्। अपरतः केषुचित् जनपदेषु शैक्षणिकगतिविधीनां निरीक्षणे, दत्तांशानां नियमितप्रतिवेदने, प्रशासनिकसमन्वये च सुधारस्य आवश्यकता निर्दिष्टा अस्ति।
पूर्वीसिंहभूमस्य राज्ये प्रथमस्थानप्राप्तौ जनपदप्रशासनस्य शिक्षाविभागस्य च अधिकारिभिः सह प्रखण्डस्तरीयैः सङ्कुलस्तरीयैश्च पदाधिकारिभिः, प्रधानाचार्यैः शिक्षकैश्च कृतानां प्रयत्नानां महत्त्वपूर्णा भूमिका अभवत्। विभागीयाधिकारिणां अनुसारम् एषा उपलब्धिः जनपदस्य शिक्षाव्यवस्थां अधिकं सुदृढां कर्तुं प्रेरणारूपेण कार्यं करिष्यति।
आगामिदिनेषु विद्यार्थिनाम् अधिगमस्तरं अधिकं श्रेष्ठं कर्तुं, विद्यालयानां निरीक्षणव्यवस्थां सुदृढां कर्तुं तथा शैक्षणिकगतिविधीनां नियमितसमीक्षायै विशेषं बलं प्रदास्यते। राज्ये प्रथमस्थानप्राप्तिः जनपदस्य शिक्षाविभागाय विद्यालयेभ्यश्च गौरवपूर्णा उपलब्धिः मन्यते।
---------------
Hindusthan Samachar / Dheeraj Maithani