-पासी समाजः सनातन धर्मस्य रक्षायै बलिदानं दत्तवान् : कौशल किशोरः

लखनऊ, 20 अगस्तमासः (हि.स.)।

उत्तरप्रदेशस्य राजधानीलखनऊनगरस्य मलिहाबादविधानसभाक्षेत्रस्य भाजपाविधायिका जयदेवी कौशलः काकोरीकस्बास्थितस्य शीतलामातामन्दिरस्य शिलान्यासभूमिपूजनकार्यक्रमस्य समये जातिगतभेदभावस्य आरोपम् अकरोत्। विधायिका जयदेवी पूर्वकेन्द्रीयमन्त्री कौशलकिशोरस्य पत्नी अस्ति। सा बुधवासरे काकोरीस्थे शीतलामातामन्दिरे शिलान्यासकार्यक्रमे सम्मिलिता अभवत्।

कार्यक्रमात् प्रत्यागत्य सा चलचित्रदृश्यं प्रसारयन्ती अवदत् यत् सा मन्दिरस्य जीर्णोद्धारसमारोहे भागं ग्रहीतुं गता आसीत्, परन्तु तत्र तस्यै पूजां कर्तुं न अनुमतम्। सा अवदत् यत् एतत् तदा अभवत् यदा अस्य मन्दिरस्य जीर्णोद्धारस्य प्रस्तावम् सा एव अनुमोदितवती आसीत्। सा अवदत्, “अहं तत्र तिष्ठन्ती आसम्। मन्दिरप्रशासनस्य पक्षतः मह्यं समुचितः सम्मानः न प्राप्तः तथा पूजामपि कर्तुं न अनुमतम्।”

विधायिकायाः पतिना पूर्वकेन्द्रीयमन्त्रिणा कौशलकिशोरेण अपि अस्मिन् विषये गम्भीरा आपत्तिः प्रकटिता। पूर्वकेन्द्रीयमन्त्री कौशलकिशोरः स्वसामाजिकमाध्यमप्रकाशने लिखितवान् यत् पासीसमाजेन सनातनधर्मस्य रक्षणाय स्वबलिदानं दत्तम् अस्ति तथा यातनाः अपि सोढाः सन्ति। किन्तु यथा काकोरीस्थिते शीतलामातामन्दिरे मलिहाबादविधानसभाक्षेत्रस्य विधायिका जयदेवी कौशलः पूर्वनिर्धारितस्य जीर्णोद्धारस्य भूमिपूजनं कर्तुं षड्यन्त्रपूर्वकं निवारिता तथा च अपमानिता, तत् कृत्यं निन्दनीयम् अस्ति।

अपरतः मन्दिरस्य प्रबन्धकेन रमाकान्तगुप्तेन विधायिकायाः आरोपाः पूर्णतया निराकृताः। तेन उक्तं यत् मन्दिरं सर्वेषां जातीनां वर्गाणां च जनानां कृते मुक्तम् अस्ति तथा अत्र कस्यापि जनस्य सह भेदभावः न क्रियते।

लखनऊग्रामीणस्य भाजपाजिलाध्यक्षः विजयकुमारमौर्यः हिन्दुस्थानसमाचाराय अवदत् यत् त्रुटिः अभवत्, किन्तु सा सकामं न कृता। स्थानीयविधायिकया पूजां कारयितव्या आसीत्। भाजपाजिलाध्यक्षेन उक्तं यत् स्थानीयकार्यकर्तृभ्यः प्राप्तसूचनानुसारं प्रतिनिधेः पक्षतः त्रुटिः अभवत्।

Hindusthan Samachar / Dheeraj Maithani