-दायित्वबोधाय, दलभावनायै नागरिक केंद्रिताय शासनाय च देया प्राथमिकता : उपराष्ट्रपतिः

मसूरी, 20 अगस्तमासः (हि.स.)। उपराष्ट्रपतिः सी. पी. राधाकृष्णन् गुरुवासरे मसूरीस्थिते लालबहादुरशास्त्री राष्ट्रियप्रशासन-अकादम्यां २०२४ तमस्य वर्षस्य भारतीयप्रशासनिकसेवायाः अधिकारि-प्रशिक्षुणां प्रशिक्षणस्य द्वितीयचरणस्य समापनसमारोहे सम्बोधनम् अकरोत्। सः अधिकारि-प्रशिक्षुभ्यः ‘सेवाभावः’ ‘कर्तव्यबोधश्च’ स्वमार्गदर्शकमन्त्ररूपेण स्वीकरणस्य आह्वानम् अकरोत्।

राधाकृष्णन् प्रशिक्षणं सफलतया सम्पन्नवतः अधिकारि-प्रशिक्षुणः अभिनन्द्य अवदत् यत् देशस्य विकासे नागरिकप्रशासनसेवानां महत्त्वपूर्णं योगदानं विद्यते। सः अवदत् यत् नागरिकसेवकाः नीतिनां धरातलस्तरे क्रियान्वयनस्य तथा च सर्वकारस्य विकासयोजनानां लाभं अन्तिमजनपर्यन्तं प्रापयितुं महत्त्वपूर्णाः कडिरूपाः सन्ति।

‘विकसितभारत@२०४७’ इति लक्ष्यस्य उल्लेखं कुर्वन् उपराष्ट्रपतिः अधिकारिभ्यः विकासं समावेशिनं कृत्वा तस्य लाभं अन्तिमसीमापर्यन्तं प्रापयितुम् आह्वानम् अकरोत्। सः अवदत् यत् अधिकारिभिः एतत् सुनिश्चितं कर्तव्यं यत् प्रत्येकनागरिकपर्यन्तं शासनस्य पहुँचः भवेत् तथा च कोऽपि पात्रव्यक्तिः विकासस्य लाभात् वञ्चितः न भवेत्।

सः अधिकारिभ्यः व्यक्तिगतसमूहरूपलब्धीनां स्थाने ‘दलोत्कृष्टतायै’ कार्यं कर्तुम् आग्रहं कृतवान्। सः अवदत् यत् सुदृढस्य समन्वितस्य च दलस्य निर्माणम्, सहकारिणां प्रेरणम् तथा पूर्ववर्तिनाम् अधिकारिणां उत्तमपरम्पराणां कार्यप्रणालीनां च अग्रे संवर्धनं प्रशासनं अधिकं प्रभावशालिनं करोति।

उपराष्ट्रपतिः नागरिकप्रशासनसेवासु महिलानां वर्धमानभागीदारीम् अपि उल्लिखितवान्। सः अवदत् यत् २०२४ तमस्य वर्षस्य प्रशिक्षुबैचमध्ये प्रायः ४१ प्रतिशतं अधिकारिण्यः महिलाः सन्ति। सः एतत् ‘नारीशक्तेः’ प्रभावशालिनं उदाहरणम् इति वर्णयन् अवदत् यत् प्रतिभा रूढिभ्यः अग्रे गच्छति तथा दृढसङ्कल्पः बाधाः अतिक्रामति।

राधाकृष्णन् अधिकारिभ्यः कृत्रिमबुद्धिमत्ता, प्राकृतिकभाषासंसाधनम्, यन्त्राधिगमः तथा ब्लॉकचेन इत्यादीनां उद्भावनशीलप्रौद्योगिकीनाम् अङ्गीकरणस्य आह्वानम् अकरोत्। सः अवदत् यत् एतासां प्रौद्योगिकीनां प्रभावपूर्णः उपयोगः प्रशासनस्य कार्यक्षमतायाः पारदर्शितायाः तथा नागरिकसेवानां श्रेष्ठप्रदायस्य च सुनिश्चित्यै सहायकः भवितुम् अर्हति। सः अधिकारिभ्यः निरन्तराध्ययनं, परिवर्तमानपरिस्थितीनाम् अनुरूपं स्वस्य अनुकूलनं तथा भविष्यस्य आव्हानानां कृते सज्जतां च कर्तुं परामर्शं दत्तवान्।

सार्वजनिकसेवायां चरित्रस्य सत्यनिष्ठायाश्च आधारत्वं प्रतिपादयन् उपराष्ट्रपतिः अवदत् यत् वास्तविकनेतृत्वस्य मूल्याङ्कनं सत्तया पदेन वा न भवति, अपि तु कठिनपरिस्थितिषु नैतिकरूपेण निर्णयग्रहणस्य क्षमतया भवति।

सः अधिकारिभ्यः देशस्य दूरवर्तिक्षेत्रेषु जनानां जीवने सकारात्मकपरिवर्तनं आनेतुं तथा प्रत्येकां परिवेदनां श्रोतुं प्रत्येकं नागरिकं च सशक्तं कर्तुं कार्यं कर्तुम् आह्वानम् अकरोत्।

कार्यक्रमे उत्तराखण्डस्य राज्यपालः लेफ्टिनेन्ट जनरल् निवृत्तः गुरमीतसिंहः, प्रदेशस्य कृषिमन्त्री सैनिककल्याणमन्त्री च गणेशजोशी तथा एलबीएसएनएए इत्यस्य निदेशकः डॉ. बी. राजेन्द्रः इत्यादयः अन्ये अधिकारिणश्च उपस्थिताः आसन्।

Hindusthan Samachar / Dheeraj Maithani