नव दिल्ली, 20 अगस्तमासः (हि.स.)।

जेन जी इत्यस्य युवजनानां मध्ये स्वकीयां प्रभावशक्तिं सुदृढां कर्तुं युवभिः सह प्रत्यक्षं संवादं स्थापयितुं च भारतीयजनतापक्षेण नूतननीतिः सज्जीकृता अस्ति। पक्षः अधुना पारम्परिकैकपक्षीयसन्देशानां स्थाने इन्स्टाग्राम्, स्नैपचैट्, रेडिट् इत्यादिषु सामाजिकमाध्यममञ्चेषु परस्परसंवादं वर्धयितुं सहैव महाविद्यालयेषु, विश्वविद्यालयेषु, प्रशिक्षणसंस्थानेषु च छात्रैः सह प्रत्यक्षं मिलितुं योजनां क्रियान्वयति।

नीट् परीक्षाविवादानन्तरं छात्रान्दोलनानां युवजनानां मध्ये निर्मितस्य वातावरणस्य च दृष्ट्या पक्षेण चतुर्दशतः द्वाविंशतिवर्षपर्यन्तस्य आयुवर्गस्य युवजनानां समीपं गन्तुं निर्णयः कृतः। अस्य कृते सर्वेषां राज्येषु पक्षसङ्गठनेभ्यः निर्देशाः प्रेषिताः सन्ति तथा च अभियानं सम्पूर्णवर्षं प्रचलिष्यति।

पक्षस्य सूत्राणामनुसारम् अभियानमिदं द्विस्तरीयरूपेण प्रचलिष्यति। प्रथमं डिजिटल् सम्पर्कः। इन्स्टाग्राम्, स्नैपचैट्, रेडिट् इत्यादिषु मञ्चेषु युवजनानां भाषाशैल्यनुसारं संवादः स्थापितः भविष्यति। लिखितसन्देशानां स्थाने रील्, लघुवीडियो, दृश्यसामग्री च विशेषरूपेण प्रयुज्यन्ते। युवजनानां मतं प्रतिक्रियां च ज्ञातुं द्विपक्षीयसंवादस्य रणनीतिः स्वीक्रियते।

द्वितीयं प्रत्यक्षसंवादः। केन्द्रीयमन्त्रिणः, सांसदाः, विधायकाः, सङ्गठनस्य पदाधिकारिणः कार्यकर्तारः च शिक्षणसंस्थासु गत्वा छात्रैः सह प्रत्यक्षं संवादं करिष्यन्ति। महाविद्यालयेषु, विश्वविद्यालयेषु, विद्यालयेषु, प्रशिक्षणसंस्थानेषु, क्रीडाक्लबेषु च छात्रैः सह अनौपचारिकः संवादः भविष्यति। संवादः अराजनैतिकरूपेण स्थापयिष्यते तथा पक्षस्य ध्वजपताकानां प्रचारपट्टानां च प्रयोगः न भविष्यति। सञ्चारमाध्यमान् कार्यक्रमेभ्यः दूरं स्थापयिष्यन्ते तथा संवादानन्तरं किमपि सार्वजनिकं वक्तव्यं न प्रदास्यते। यदि छात्राः संवादं ध्वनिचित्ररूपेण अभिलेखयन्ति तर्हि तस्मिन् प्रतिबन्धः न भविष्यति। युवजनानां सुविधानुसारं संवादस्य पद्धतिः स्थानं च निर्धारितं भविष्यति।

परीक्षा, पाठ्यक्रमः, रोजगारः, प्रतियोगितापरीक्षाः, व्यवसायः भविष्यं च सम्बद्धेषु विषयेषु चर्चा भविष्यति। अस्य अभियानस्य अन्तर्गतं छात्रेभ्यः शिक्षाव्यवस्थायां सुधारार्थं सुझावाः स्वीकरिष्यन्ते। समस्यासु पूर्ववर्तिसर्वकारान् दोषी कर्तुं स्थाने समाधानकेन्द्रितायां चर्चायां विशेषः बलः दीयते। राष्ट्रियान्तर्राष्ट्रीयविषयेषु अपि युवजनानां मतं ज्ञातुं प्रयासः क्रियते।

युवनेतृत्वस्य निर्माणेऽपि विशेषं बलं दीयते। पक्षसङ्गठने सर्वकारे च अधिकान् युवचेहरान् अग्रे आनेतुं रणनीतिः अपि सज्जीकृता अस्ति। भारतीयजनतायुवमोर्चायाः कार्यकर्तारः प्रत्येकं विधानसभाक्षेत्रे विशेषयुवदलानि निर्मास्यन्ति तथा शिक्षणसंस्थासु निरन्तरं संवादं स्थापयिष्यन्ति।

सूत्राणामनुसारं बृहद्विश्वविद्यालयेषु, भारतीयप्रौद्योगिकीसंस्थानेषु, भारतीयप्रबन्धनसंस्थानेषु, प्रमुखेषु अनुसन्धानसंस्थानेषु च स्थानीयसांसदैः सह केन्द्रीयस्तरस्य वरिष्ठनेतारः अपि प्रेषयिष्यन्ते। कोटा, पटना, प्रयागराज, बेङ्गलूरु, विशाखापत्तनम्, तिरुवनन्तपुरम् इत्यादिषु प्रमुखेषु प्रशिक्षणकेन्द्रेषु विशेषं ध्यानं दीयते, यतः पक्षस्य मतानुसारं शिक्षकाः प्रशिक्षणसंस्थाः च व्यापकसंख्याकान् युवजनान् प्रभावीरूपेण सम्प्रापयितुं समर्थाः भवन्ति।

---------------

Hindusthan Samachar / Dheeraj Maithani