रायपुरम्, 21 अगस्तमासः (हि.स.)।

मुख्यमन्त्री विष्णुदेवसायः उत्तराखण्डस्य चमोलीजनपदे घटिते भीषणसुरङ्गदुर्घटनायां छत्तीसगढस्य चतुर्णां श्रमिकाणां दुःखदनिधनं प्रति गहनं दुःखं व्यक्तवान्। मृतकश्रमिकाणां परिजनेभ्यः पञ्च पञ्चलक्षरूप्यकाणाम् आर्थिकसहायतां प्रदातुं घोषणां कृतवान्। मृतकेषु चत्वारः श्रमिकाः छत्तीसगढस्य कोंडागांवजनपदस्य निवासिनः आसन्।

सुरङ्गदुर्घटनायां छत्तीसगढस्य लापतश्रमिकाणां पार्थिवशरीराणि पूर्णतया प्राप्तानि तथा च तेषां परिचयः सुनिश्चितः जातः। ततः मुख्यमन्त्रिणा विष्णुदेवसायेन गतस्य रात्रेः विलम्बितसमये प्रभावितपरिवाराणां कृते आर्थिकसहायतायाः औपचारिकघोषणा कृता। दुर्घटनां प्रति शोकं व्यक्तं कुर्वता मुख्यमन्त्रिणा मृतकश्रमिकाणां परिजनेभ्यः पञ्च पञ्चलक्षरूप्यकाणि तथा द्वाभ्यां घातितश्रमिकाभ्यां चिकित्सायै पञ्चाशत् पञ्चाशत् सहस्ररूप्यकाणि प्रदातुं निर्देशाः दत्ताः।

मृतकेषु छत्तीसगढस्य लोकेश्वरः, भुवनेश्वरः, देवनाथः तथा चेतनपोयामः इत्येतेषां श्रमिकाणां पार्थिवशरीराणि उद्धारकार्यस्य अन्तिमदिने अगस्तमासस्य १८ दिनाङ्के प्राप्तानि। एते सर्वे श्रमिकाः मुख्यतः छत्तीसगढस्य कोंडागांवजनपदस्य समीपवर्तिनां बस्तरक्षेत्राणां च निवासिनः आसन्। अस्मिन् दुर्घटनायां छत्तीसगढस्य अन्यौ द्वौ श्रमिकौ सुनीलदीवानः तथा पेनसिंहः घातितौ भूत्वा सुरक्षितौ उद्धारितौ, तयोः चिकित्सोपचारः प्रचलति।

अस्मिन् सुरङ्गदुर्घटनायां समग्रतया दश श्रमिकाणां मृत्युः अभवत् तथा द्वादश श्रमिकाः सुरक्षिततया उद्धारिताः। मुख्यमन्त्री सायः उक्तवान् यत् राज्यसर्वकारः दुःखस्य अस्मिन् समये शोकसन्तप्तपरिवारैः सह पूर्णसंवेदनशीलतया स्थितः अस्ति तथा च तेभ्यः सर्वसम्भवा सहायता उपलब्धा करिष्यते। अस्मिन् दुर्घटनायां कोंडागांवजनपदस्य धनसुलीग्रामस्य द्वौ, मदनारग्रामस्य एकः तथा दहीकोंगाग्रामस्य एकः श्रमिकश्च मृतः अस्ति, यदा जनपदस्य द्वौ श्रमिकौ घातितौ स्तः। दिवङ्गतश्रमिकाणां पार्थिवशरीराणि कोंडागांवम् आनीतानि, यत्र परिजनानां उपस्थितौ तेषाम् अन्त्येष्टिसंस्कारः सम्पन्नः।

मुख्यमन्त्री श्रीसायः पुनः उक्तवान् यत् राज्यसर्वकारः दुःखस्य अस्मिन् समये शोकसन्तप्तपरिवारैः सह पूर्णसंवेदनशीलतया स्थितः अस्ति तथा च तेभ्यः सर्वसम्भवा सहायता प्रदास्यते।

मुख्यमन्त्रिणा ईश्वरं प्रति दिवङ्गतात्मनां शान्त्यै तथा शोकसन्तप्तपरिजनानाम् एतत् असीमदुःखं सोढुं शक्तिप्रदानाय च प्रार्थना कृता। तेन दुर्घटनायां घातितयोः उभयोः श्रमिकयोः शीघ्रस्वास्थ्यलाभस्य कामना अपि कृता।

उल्लेखनीयं यत् उत्तराखण्डस्य चमोलीजनपदे निर्माणाधीनायां मायापुर पीपलकोटीसुरङ्गायां अगस्तमासस्य १३ दिनाङ्के सायं प्रायः सार्धषड्वादने भीषणभूस्खलनस्य पर्वतीयजलस्य च रिसावस्य कारणेन द्वाविंशतिः श्रमिकाः सुरङ्गायाम् अन्तः फसिता आसन्। सूचनाप्राप्तेः अनन्तरं तत्क्षणमेव उद्धारकार्यक्रमः प्रारब्धः, येन द्वादश श्रमिकाः सुरक्षिततया बहिः उद्धृत्य चिकित्सालयं प्रेषिताः। प्रथमदिने चतुर्णां श्रमिकाणां पार्थिवशरीराणि प्राप्तानि, ततः परदिने त्रीणि अन्यानि पार्थिवशरीराणि उद्धृतानि। अगस्तमासस्य १५ दिनाङ्के एकं तथा १६ दिनाङ्के द्वे पार्थिवशरीरे प्राप्ते।

Hindusthan Samachar / Dheeraj Maithani