सिलीगुडी, २१ अगस्तमासः (हि.स.)। केन्द्रीयगृहमन्त्री अमितशाहः शुक्रवासरे सिलीगुडी-यात्रायाः समये देशस्य सीमासुरक्षां, विशेषतः सामरिकदृष्ट्या महत्त्वपूर्णस्य सिलीगुडी-गलियारा इत्यस्य सुरक्षां प्रति केन्द्रसर्वकारस्य प्रतिबद्धतां पुनः प्रतिपादितवान्। सः उक्तवान् यत् सीमासुरक्षासम्बद्धाः याः काश्चित् आवश्यकताः सम्मुखे आगताः, तासां पूर्तये सर्वकारः पूर्णतया प्रतिबद्धः अस्ति।

अमितशाहः सिलीगुडी-नगरे सशस्त्र-सीमाबलस्य अनेकासां विकास-परियोजनानाम् उद्घाटनस्य शिलान्यासस्य च कार्यक्रमे भागं गृहीतवान्। अस्मिन् अवसरे सः एस.एस.बी.-बलस्य सैनिकैः सह मिलित्वा तैः सह संवादमपि कृतवान्। कार्यक्रमे भाषमाणः अमितशाहः उक्तवान् यत् प्रथमवारम् एव तस्मै एस.एस.बी.-सम्बद्धे कार्यक्रमे भागं ग्रहीतुं अवसरः प्राप्तः। सः एस.एस.बी.-बलं देशस्य सार्वभौमत्वस्य सुरक्षायाश्च अखण्डं प्रहरी इति वर्णितवान्।

कार्यक्रमस्य समये गृहमन्त्रिणा सीमासुरक्षासम्बद्धकार्येभ्यः भूम्युपलब्धौ विलम्बं प्रति पूर्ववर्तिनः राज्यसर्वकारस्य आलोचना कृता। सः उक्तवान् यत् सीमासुरक्षां सुदृढां कर्तुं केन्द्रसर्वकारः २०२४ तमवर्षात् १,१२९ एकड्-परिमितां भूमिं याचमानः आसीत्, किन्तु पुनः पुनः अनुरोधं कृतवतोऽपि भूमिः उपलब्धा न कृता। सः एतदपि आरोपितवान् यत् अस्मिन् विषये पूर्वमुख्यमन्त्रिणे आमन्त्रणं प्रदत्तमपि सः कार्यक्रमे भागं न गृहीतवान्।

अस्य विपरीतम् अमितशाहः वर्तमान-मुख्यमन्त्रिणः शुभेन्दु-अधिकारी इत्यस्य कार्यकाले प्रशासनिकस्तरे सहकार्यं प्राप्तमिति कथनं कृतवान्। सः उक्तवान् यत् अधुना एतादृशी व्यवस्था निर्मिता अस्ति, यस्यां प्रशासनिकानुमोदनं पूर्वं प्राप्यते, पत्रं तु पश्चात् आगच्छति। कार्यक्रमे सः सिलीगुडी-नगरे प्रायः ८० एकड्-परिमितायां भूमौ नूतनस्य प्रशासनिकभवनस्य निर्माणस्य घोषणामपि कृतवान्।

गृहमन्त्री उक्तवान् यत् देशस्य सीमासुरक्षया सह आधारभूतसंरचनायाः सुदृढी-करणमपि केन्द्रसर्वकारस्य प्राथमिकता अस्ति। सः रक्तदुर्गे आयोजितस्य भव्यस्य ‘वन्दे मातरम्’-समारोहस्य उल्लेखं कुर्वन् उक्तवान् यत् देशस्य समग्रसुरक्षां, आधारभूतसंरचनां सीमाश्च सुदृढीकर्तुं केन्द्रसर्वकारः प्रत्येकं आवश्यकं पदक्षेपं स्वीकरिष्यति। सः उक्तवान् यत् राज्यप्रशासनेन सह उत्तमसमन्वयस्य माध्यमेन अग्रिमेषु दिनेषु देशस्य सुरक्षां अधिकं सुदृढां करिष्यते।

Hindusthan Samachar / Divya Ranjan