- मुख्यमंत्रिणा नवदिल्ल्यां निवेशकेभ्यःदत्ताः मध्यप्रदेशस्य प्रशंसानां शुभाशयाः

भोपालम्, 22 अगस्तमासः (हि.स.)।

मध्यप्रदेशस्य मुख्यमन्त्री डॉ. मोहनयादवः अवदत् यत् देशेन सह प्रदेशोऽपि परिवर्तते। कदाचित् मध्यप्रदेशस्य उपरि रोगग्रस्तप्रदेशस्य इति कलङ्कः आरोपितः आसीत्। वयं तं कलङ्कं पूर्णतया दूरीकृतवन्तः। आव्हानानि तु आसन्, किन्तु वयं तानि आव्हानानि ज्ञात्वा प्रगतेः अवसररूपेण परिवर्तितवन्तः। अद्य अस्माकं मध्यप्रदेशः देशे सर्वाधिकतीव्रगतिना प्रगतिं कुर्वत्सु प्रदेशेषु अग्रणीभूतः अस्ति।

मुख्यमन्त्री डॉ. यादवः शनिवासरे नवदिल्ल्यां एकस्मिन् निजीप्रासादे आयोजिते ‘द इकॉनॉमिक टाइम्स वर्ल्ड लीडर्स फोरम २०२६’ इत्यस्मिन् ‘मध्यप्रदेशसत्रे’ सम्बोधनं कुर्वन् आसीत्। सत्रस्य विषयः ‘मध्यप्रदेशविषये अग्निकुण्डसंवादः भारतस्य हृदयस्थलस्य सम्भावनानां उद्घाटनं च’ इति आसीत्।

मुख्यमन्त्री डॉ. यादवः अवदत् यत् अद्य मध्यप्रदेशे प्रत्येकस्मिन् क्षेत्रे विकासः भवति। कृषिक्षेत्रे वयं पूर्वमेव अग्रे आस्म, अधुना औद्योगिकप्रगत्यामपि तीव्रगत्या अग्रे वर्धामहे। गतवर्षे वयं भोपालनगरे वैश्विकनिवेशकशिखरसम्मेलनम् आयोजितवन्तः। तदतिरिक्तं प्रदेशस्य सर्वेषु अञ्चलेषु क्षेत्रीयोद्योगसम्मेलनानि सफलतया आयोज्य निवेशकानां विश्वासं प्राप्तवन्तः।

सः अवदत् यत् एतत् देशस्य अमृतकालं वर्तते। वयं सर्वे राज्याः मिलित्वा देशस्य प्रगत्यै अग्रे वर्धामहे। राष्ट्रियं नदीसंयोजनाभियानं भवतु अथवा सिञ्चनपरियोजनाः, वयं समीपस्थैः राज्यैः सह मिलित्वा प्रत्येकस्य आव्हानस्य प्रत्येकस्य समस्यायाश्च सकारात्मकं समाधानं निष्पादयामः।

मुख्यमन्त्री निवेशकान् सम्बोधयन् अवदत् यत् मध्यप्रदेशः असीमसम्भावनानाम् अनन्तावसराणां च प्रदेशः अस्ति। मध्यप्रदेशस्य संस्कृतिः एव तादृशी अस्ति यत् यः एकवारम् अत्र आगच्छति, सः पुनः न निवर्तते। अत्र आगत्य भवन्तः कदापि निराशाः न भविष्यन्ति। अतः मध्यप्रदेशम् आगच्छन्तु, सर्वकारस्य उद्योगानुकूलनीतीनां अधिकाधिकं लाभं स्वीकुर्वन्तु, निःसंकोचं निवेशं कुर्वन्तु, स्वव्यापारं व्यवसायं च चतुर्गुणं वर्धयन्तु तथा मध्यप्रदेशस्य सह देशस्यापि प्रगतौ योगदानं ददतु।

हरितविनिर्माणकेन्द्रं भवितुं दिशि मध्यप्रदेशः

सः अवदत् यत् मध्यप्रदेशः हरितविनिर्माणकेन्द्रं भवितुं दिशि अपि तीव्रगत्या अग्रे वर्धते। राज्ये सौरशक्तेः पवनशक्तेश्च व्यापकसम्भावनानां उपयोगं कृत्वा स्वच्छशक्तिम् आधारेण औद्योगिकविकासस्य प्रोत्साहनं दीयते। पर्याप्तस्य स्वच्छशक्तेः उपलब्धता भविष्ये पर्यावरणानुकूलस्य प्रतिस्पर्धात्मकस्य च विनिर्माणस्य नूतनां गतिं वर्धयिष्यति। राज्यसर्वकारः उद्योगानां कृते आवश्यकायाः शक्तेः, भूमेः, आधारभूतसंरचनायाश्च उपलब्धतां सुनिश्चितं कुर्वन् स्वच्छशक्तिम् आधृतानां निवेशानां प्राधान्येन प्रोत्साहनं ददाति। एतेन मध्यप्रदेशः देशस्य विश्वस्य च नूतनायां हरित-अर्थव्यवस्थायां महत्त्वपूर्णं स्थानं प्राप्तुं समर्थो भविष्यति।

औद्योगिकोद्यानात् अर्धचालकयन्त्रेभ्यः दत्तांशकेन्द्रपर्यन्तं निवेशस्य व्यापकाः अवसराः

मुख्यमन्त्री अवदत् यत् मध्यप्रदेशे वस्त्रवस्त्रनिर्माणक्षेत्रे, औषधनिर्माणे, वाहननिर्माणे, अभियान्त्रिकक्षेत्रे, विद्युतीययन्त्रनिर्माणे, अर्धचालकक्षेत्रे, दत्तांशकेन्द्रेषु, खाद्यप्रक्रियाक्षेत्रे तथा नवीकरणीयशक्तिक्षेत्रे च निवेशस्य व्यापकाः सम्भावनाः सन्ति। राज्ये विकसित्यमानानि आधुनिकानि औद्योगिकोद्यानानि एतेषां क्षेत्राणां निवेशकेभ्यः आवश्यकसुविधाः प्रदातुं महत्त्वपूर्णं पदक्षेपं भवन्ति। सः अवदत् यत् सूक्ष्मलघुमध्यमोद्योगानां, नवोद्यन्तृणां, बृहदुद्योगानां च कृते अनुकूलं वातावरणं निर्मीयते। राज्यस्य औद्योगिकनीतेः उद्देश्यं विविधपरिमाणानां विविधक्षेत्राणां च उद्यमेभ्यः तादृशं मञ्चं प्रदातुम् अस्ति, यत्र ते स्थानीयसंसाधनानां वैश्विकविपणीनां च लाभं स्वीकर्तुं शक्नुयुः।

त्वरितानुमोदनस्य व्यापारसौकर्यस्य च प्राधान्यम्

मुख्यमन्त्री डॉ. यादवः अवदत् यत् निवेशकेभ्यः एकलद्वारव्यवस्था, अङ्कीयप्रक्रियाः, संस्थागतसुधाराः, समयबद्धानुमोदनं च प्राधान्येन प्रदीयते। निवेशप्रस्तावानां शीघ्रनिराकरणाय परियोजनानां समयबद्धक्रियान्वयनाय च सर्वकारः निरन्तरं प्रक्रियाः सरलीकरोति। “वयं इच्छामः यत् निवेशकाः मध्यप्रदेशं केवलं निवेशस्थानरूपेण न पश्येयुः, अपितु स्वविकासस्य दीर्घकालिकसहभागिरूपेण पश्येयुः। सर्वकारः निवेशकैः सह पदे पदे गन्तुं प्रतिबद्धः अस्ति।”

रणनीतिकसम्पर्कव्यवस्था मध्यप्रदेशस्य प्रमुखं बलम्

सः अवदत् यत् मध्यप्रदेशस्य भौगोलिकस्थितिः राज्यं देशस्य प्रमुखैः औद्योगिकैः उपभोक्तृभिश्च विपणीभिः सह संयोजयति। मार्गाणां, रेलमार्गाणां, विमानसम्पर्कस्य च विस्तारस्य सह रसदाधारभूतसंरचनां सुदृढीक्रियते। उत्तमसम्पर्कव्यवस्थया राज्ये निर्मितानां उत्पादानां देशस्य सह वैश्विकविपणीष्वपि प्रेषणं सुकरं भविष्यति। सः अवदत् यत् मध्यप्रदेशस्य एषा क्षमता राज्यं वैश्विककम्पनीनां आपूर्तिशृङ्खलासु विनिर्माणजालेषु च महत्त्वपूर्णं स्थानं प्राप्तुं सहाय्यं करिष्यति।

निर्यातस्य वैश्विकविपणीनां च विषये विशेषं प्राधान्यम्

सः अवदत् यत् राज्यसर्वकारः विनिर्माणेन सह निर्यातक्षमतावर्धनेऽपि विशेषं ध्यानं ददाति। वस्त्राणां, औषधीनां, कृष्याधारितानां उत्पादानां, अभियान्त्रिकवस्तूनां अन्येषां च निर्मितवस्तूनां वैश्विकविपणीं प्रति प्रेषणाय नूतनाः अवसराः विकसिताः क्रियन्ते। सः अवदत् यत् ‘समृद्धमध्यप्रदेश २०४७’ तथा ‘विकसितभारत २०४७’ इत्येतयोः लक्ष्ययोः प्राप्तौ औद्योगिकविकासस्य, रोजगारसृजनस्य, निर्यातवृद्धेः, निजीनिवेशस्य च महत्त्वपूर्णा भूमिका अस्ति। मध्यप्रदेशः एतानि लक्ष्याणि प्राप्तुं स्वकीयां औद्योगिकक्षमतां निरन्तरं विस्तारयति।

मध्यप्रदेशे निवेशकेभ्यः अनुकूलं वातावरणं सिद्धम्

मुख्यमन्त्री डॉ. यादवः अवदत् यत् “मध्यप्रदेशस्य परिचयः अधुना केवलं प्राकृतिकसंसाधनैः कृषिप्रधानराज्येन च सीमितः नास्ति, अपितु आधुनिकोद्योगस्य, हरितशक्तेः, प्रौद्योगिक्याः, नवोन्मेषस्य, वैश्विकनिवेशस्य च नूतनकेन्द्ररूपेणापि जायते। वयं मध्यप्रदेशं तादृशं राज्यं कर्तुम् इच्छामः, यत्र निवेशः आगच्छेत्, उद्योगाः स्थापिताः भवेयुः, युवभ्यः रोजगारः प्राप्येत तथा प्रदेशस्य अर्थव्यवस्था नूतनान् उत्कर्षशिखरान् प्राप्नुयात्।”

सः अवदत् यत् मध्यप्रदेशे बृहदुद्योगैः सह नवोद्यमा, सूक्ष्मलघुमध्यमोद्योगाः, नूतनाश्च उद्यमाः अपि व्यापकान् अवसरान् प्राप्नुवन्ति। सर्वकारः निवेशकैः सह निरन्तरसंवादेन सहभागितया च परियोजनानां धरातले क्रियान्वयनाय प्रतिबद्धः अस्ति।

मुख्यमन्त्री देशविदेशयोः निवेशकानां स्वागतं कुर्वन् अवदत् यत् “मध्यप्रदेशः भवतां निवेशाय, भवताम् उद्योगाय, भवतां स्वप्नानां च कृते सिद्धः अस्ति। आगच्छन्तु, मध्यप्रदेशेन सह मिलित्वा औद्योगिकविकासस्य, रोजगारस्य, समृद्धेश्च नूतनस्य अध्यायस्य निर्माणं कुर्मः।”

---------------

Hindusthan Samachar / Dheeraj Maithani