Enter your Email Address to subscribe to our newsletters
देहरादूनम्, 22 अगस्तमासः (हि.स.)।उत्तरमध्यक्षेत्रसांस्कृतिककेन्द्रस्य प्रयागराजस्य, संस्कृतिमन्त्रालयस्य तथा ग्राफिकएरा हिलयूनिवर्सिटी इत्यस्य संयुक्ततत्त्वावधाने ‘वन्देमातरम् १५० वर्षाणि’ इति विषयाधारितायाः चतुर्दिवसीयायाः लोकजनजातीयकलाकार्यशालायाः, प्रदर्शिन्याः चित्रकलाप्रतियोगितायाश्च आयोजनं करिष्यते। आयोजनम् अगस्तमासस्य चतुर्विंशतितः सप्तविंशतिदिनाङ्कपर्यन्तं भविष्यति। अस्मिन् देशस्य विभिन्नेभ्यः भागेभ्यः प्रायः पञ्चाशत् कलाकाराः सहभागं करिष्यन्ति।
कार्यशालायाः समन्वयकः डॉ. कृष्णकुमारः अवदत् यत् आयोजनस्य उद्देश्यम् लोकजनजातीयकलायाः प्रोत्साहनस्य सह पारम्परिककलाविधीनां भाविसन्तत्या सह सम्बन्धस्थापनम् अस्ति। कलाकाराः स्वकीयाभिः कलाकृतिभिः भारतीयसंस्कृतेः, परम्पराणाम्, प्रकृतेः, लोकजीवनस्य राष्ट्रप्रेम्णश्च विविधान् पक्षान् प्रस्तुतं करिष्यन्ति।
सः अवदत् यत् कार्यशालायां विभिन्नक्षेत्रेषु विविधासु कलाविधासु च सम्बद्धाः कलाकाराः स्वकीयया विशिष्टशैल्या चित्राणि अन्याः कलाकृतीश्च सृजन्ति। अस्मिन् काले कलाकाराः परस्परस्य कलापरम्पराणाम् अवबोधनस्य कलातन्त्राणां विनिमयस्य च अवसरं प्राप्स्यन्ति।
आयोजनकाले लोकजनजातीयकलाम् आधारीकृत्य प्रदर्शिनी अपि आयोजिता भविष्यति। अस्यां प्रदर्शिन्यां कार्यशालायां निर्मिताः कलाकृतयः प्रदर्शयिष्यन्ते। कलाप्रेमिभ्यः, विद्यार्थिभ्यः सामान्यजनेभ्यश्च भारतीयलोकजनजातीयकलायाः विविधतां समीपतः द्रष्टुम् अवसरः प्राप्स्यते।
चित्रकलाप्रतियोगितायां प्रतिभागिनः ‘वन्देमातरम्’ इत्यस्य भावनां, तस्य ऐतिहासिकमहत्त्वं राष्ट्रं प्रति समर्पणं च स्वकीयया सृजनात्मकतया चित्रपटे अङ्कयिष्यन्ति। प्रतियोगितायां भारतीयसांस्कृतिकपरम्परायाः, स्वातन्त्र्यचेतनायाः, मातृभूमेः सम्मानस्य भारतीयजीवनमूल्यानां च दर्शनं भविष्यति।
ग्राफिकएरा हिलयूनिवर्सिटी इत्यस्य ललितकलाविभागस्य अध्यक्षः डॉ. आनन्दकरमाकरः अवदत् यत् आयोजने अनुभवीकलाकाराः स्वकीयाः कलातन्त्राणि कलासूक्ष्मताश्च प्रतिभागिभिः सह संविभजिष्यन्ति। एतेन युवकलाकाराः पारम्परिककलाशैलीनाम् अवबोधनस्य स्वसृजनात्मकतायाः नूतनदिशासु विकासस्य च अवसरं प्राप्स्यन्ति।
सः अवदत् यत् विश्वविद्यालयस्य कुलपतेः प्रो. तबस्सुमनकवी इत्यस्याः निर्देशनानुसारम् आयोजनस्य सज्जताः पूर्णाः कृताः सन्ति। विश्वविद्यालयस्य पक्षतः डॉ. मन्दाकिनीशर्मा तथा डॉ. नीलोत्पलः नोडलाधिकारिणौ नियुक्तौ स्तः।
आयोजकानाम् अनुसारं चतुर्दिवसीयः कार्यक्रमः कलायाः संस्कृतेः राष्ट्रभावनायाश्च सङ्गमं प्रस्तुतं करिष्यति तथा लोकजनजातीयकलायाः संरक्षणस्य प्रोत्साहनस्य च दिशि महत्त्वपूर्णः प्रयासः सिद्धः भविष्यति।
----
Hindusthan Samachar / Dheeraj Maithani