सूरतम्, 23 अगस्तमासः (हि.स.)।

गुजरातस्य राज्यव्यापिनः सप्तसप्ततितमस्य वनमहोत्सवस्य अन्तर्गतं रविवासरे सूरतजनपदस्य कामरेजतालुकास्थिते गलतेश्वरमहादेवमन्दिरपरिसरे जनपदस्तरीयवनमहोत्सवस्य आयोजनं कृतम्। स्वास्थ्यराज्यमन्त्रिणः प्रफुल्लभाईपानशेरियस्य अध्यक्षतायाम् आयोजिते कार्यक्रमे एकं वृक्षं मातुः नाम्ना ३.० इति अभियानस्य अन्तर्गतं वृक्षारोपणं कृत्वा पर्यावरणसंरक्षणस्य जनसहभागितायाश्च सन्देशः प्रदत्तः।

पवित्रतापीनद्याः तीरे स्थिते गलतेश्वरमहादेवमन्दिरपरिसरे सामाजिकवनीकरणविभागस्य सूरतस्य जनपदप्रशासनस्य च संयुक्ततत्त्वावधाने आयोजिते कार्यक्रमे बहुसङ्ख्यकाः जनप्रतिनिधयः, अधिकारिणः, छात्राः, ग्रामीणाः, प्रकृतिप्रेमिणश्च सम्मिलिताः।

अस्मिन् अवसरे वनसंरक्षणक्षेत्रे उत्कृष्टकार्यं कृतवद्भ्यः वनरक्षकेभ्यः पर्यावरणसंरक्षणे योगदानं दत्तवद्भ्यश्च स्वयंसेवकेभ्यः सम्मानः प्रदत्तः। सामाजिकवनीकरणविभागस्य सूरतस्य पक्षतः प्रकाशितायाः विशेषसूचनापुस्तिकायाः कृषकेभ्यः ग्रामीणेभ्यश्च वितरणमपि कृतम्। पुस्तिकायां जनपदस्य ग्रामीणक्षेत्रेषु विभिन्नप्रजातीनां पौधानां प्राप्तेः तेषां रोपणस्य च विषये सूचना प्रदत्ता अस्ति।

कार्यक्रमं सम्बोधयन् स्वास्थ्यराज्यमन्त्री प्रफुल्लभाईपानशेरियः उक्तवान् यत् प्रधानमन्त्री नरेन्द्रमोदिना वनमहोत्सवं वनीकरणगतिविधीश्च पर्यावरणसंरक्षणेन सह संयोज्य जनसहभागितायाः व्यापकं अभियानं कृतम् अस्ति। तेन उक्तं यत् भारतीयसंस्कृतौ प्रकृतेः सम्मानस्य परम्परा प्राचीनकालात् एव वर्तते। केवलं वृक्षारोपणमेव न, अपि तु सार्वजनिकस्थलेषु स्वच्छतायाः संरक्षणम्, प्लास्टिककचरेण परिसरस्य दूषणं न करणम्, पर्यावरणस्य प्रति उत्तरदायित्वपूर्णं व्यवहारं च वनमहोत्सवस्य सार्थकतायाः अङ्गानि सन्ति।

तेन उक्तं यत् वृक्षाः केवलम् आक्सीजनस्य स्रोतांसि न सन्ति, अपि तु पर्यावरणसन्तुलनेन, जलचक्रेण, पशुपक्षिभिः मानवजीवनेन च प्रत्यक्षरूपेण सम्बद्धाः सन्ति। अतः वनमहोत्सवं केवलम् एकदिवसीयकार्यक्रमे सीमितं न कृत्वा रोपितानां पौधानां संरक्षणस्य पालनपोषणस्य च सङ्कल्पं कर्तुम् आवश्यकम् अस्ति।

मन्त्रिणा उक्तं यत् गुजरातः तीव्रगत्या औद्योगिकविकासं करोति तथा राज्ये वनक्षेत्रं सीमितम् अस्ति। अतः उपलब्धायां भूमौ व्यापकस्तरे वृक्षारोपणं कृत्वा पर्यावरणसन्तुलनं संरक्षितुम् आवश्यकम् अस्ति। तेन जनान् सर्वकारीययोजनानां लाभं स्वीकृत्य अधिकाधिकान् पौधान् रोपयितुं तेषां च उत्तरदायित्वेन संरक्षणं कर्तुम् आह्वानं कृतम्। तेन उक्तं यत् आगामिसन्ततये स्वच्छं स्वस्थं हरितं च गुजरातं प्रदातुम् इच्छामः चेत् जलसंरक्षणं, वृक्षारोपणं, प्रकृतिसंरक्षणं च सामूहिकदायित्वरूपेण स्वीकरणीयम्।

कार्यक्रमे जनपदपञ्चायत्प्रमुखः समीरमोदी, विधायकः गणपतभाईवसावा, सूरतवनवृत्तस्य वनसंरक्षकः पुनीतनायरः, भरूचवनवृत्तस्य वनसंरक्षकः आनन्दकुमारः, उपवनसंरक्षिका मीनलसावन्तः इत्यादयः वनविभागस्य अधिकारिणः कर्मचारिणश्च, प्रकृतिप्रेमिणः, बहुसङ्ख्यकाः छात्राः स्थानीयग्रामीणाश्च उपस्थिताः आसन्।

---------------

Hindusthan Samachar / Dheeraj Maithani