कोलकाता , 23 अगस्तमासः (हि.स.)।डुरण्डकपस्य अन्तिमस्पर्धां प्रति रविवासरे कोलकातानगरस्य युवभारतीक्रीडाङ्गणे रोमाञ्चः चरमसीमां प्राप्स्यति। अन्तिमस्पर्धायां कोलकातानगरस्य द्वे पारम्परिकप्रतिद्वन्द्विदले ईस्टबङ्गाल् तथा मोहनबागान् परस्परं सम्मुखीभविष्यतः। ऐतिहासिकेन डुरण्डकपेन सह कोलकाताडर्बी इति कारणेन एषा स्पर्धा अधिकमेव विशेषा अभवत्।

क्रीडाङ्गणस्य अन्तः क्रीडकानां मध्ये प्रतिस्पर्धा भविष्यति, तर्हि प्रेक्षकदीर्घायामपि विशिष्टातिथीनां उपस्थितिः स्पर्धायाः आकर्षणं वर्धयिष्यति। निर्धारितकार्यक्रमानुसारं केन्द्रीयप्रतिरक्षामन्त्री राजनाथसिंहः पश्चिमबङ्गस्य मुख्यमन्त्री शुभेन्दुअधिकारी च अन्तिमस्पर्धां द्रष्टुं युवभारतीक्रीडाङ्गणं गमिष्यतः। मुख्यमन्त्री सायं प्रायः पञ्चवादने क्रीडाङ्गणं प्राप्तुं शक्नोति, तदनन्तरं किञ्चित्कालात् प्रतिरक्षामन्त्री राजनाथसिंहः अपि क्रीडाङ्गणे आगन्तुं शक्नोति।

तदतिरिक्तं बहवः वरिष्ठमन्त्रिणः सेनाधिकारिणश्च स्पर्धायाः समये उपस्थिताः भविष्यन्ति। राज्ये सत्तापरिवर्तनानन्तरम् एषा द्वितीया महत्त्वपूर्णा डर्बीस्पर्धा अस्ति।

यदि दलसंयोजनं क्रीडकानां च विषये विचार्यते तर्हि मोहनबागानस्य दलं ईस्टबङ्गालदलात् सुदृढतरं दृश्यते। स्वदेशीयक्रीडकैः सह विदेशीयक्रीडकानां विषयेऽपि मोहनबागानदले श्रेष्ठतराः विकल्पाः सन्ति। मैकलारेन्, अल्बर्टो तथा मिगुएल इत्यादीनां विदेशीयक्रीडकानाम् अतिरिक्तं दले भारतीयराष्ट्रीयदलस्य बहवः क्रीडकाः अपि सन्ति।

तथापि ईस्टबङ्गालदलस्य स्वप्रशिक्षके एण्टोनियोहाबासे पूर्णः विश्वासः अस्ति। हाबासः विगतेषु वर्षेषु भारतीयपादकन्दुकक्रीडायाः सफलतमेषु प्रशिक्षकेषु परिगण्यते। तस्य सुदृढा रक्षात्मकनीतिः अन्तिमस्पर्धायां ईस्टबङ्गालदलस्य कृते महत्त्वपूर्णं साधनं सिद्धं भवितुम् अर्हति।

उपान्त्यस्पर्धायां दिल्लीदलस्य विरुद्धम् ईस्टबङ्गालस्य रक्षापङ्क्त्या कतिपयाः त्रुटयः कृताः आसन्, किन्तु अन्तिमस्पर्धायां सन्दीपमण्डी तथा जयगुप्ता इत्यादिभ्यः क्रीडकेभ्यः श्रेष्ठतरप्रदर्शनस्य अपेक्षा अस्ति। ईस्टबङ्गालदलस्य कृते सर्वाधिकचिन्तायाः विषयः आक्रमणक्रीडकस्य स्थानं वर्तते। निर्णायकस्पर्धायां कस्मिन् क्रीडके विश्वासः करणीयः इति प्रश्नः हाबासस्य सम्मुखे भविष्यति।

अपरतः मोहनबागानस्य प्रशिक्षकेन उपान्त्यस्पर्धायां मैकलारेन् तथा मिगुएल इत्येतौ अल्पकालाय क्रीडाङ्गणे प्रवेशितौ, येन तौ अन्तिमस्पर्धायै स्पर्धात्मकाभ्यासमपि प्राप्तवन्तौ। अपरतः ईस्टबङ्गालस्य विदेशीयविकल्पेषु रशिदः प्रमुखं नाम अस्ति, यदा तु रैमिरेज् तथा इकोनोमिडिस् इत्येतौ अद्यापि स्वश्रेष्ठरूपे न दृश्येते।

एवं मोहनबागानस्य दलं यद्यपि सुदृढतरं दृश्यते, तथापि अन्तिमस्पर्धायां अनुभवः रणनीतिश्च निर्णायकां भूमिकां निर्वहति इति मन्यते। ईस्टबङ्गालस्य प्रशंसकानाम् अपेक्षा भविष्यति यत् एण्टोनियोहाबासस्य रणनीतिः तेषां दलं डुरण्डकपस्य विजेतृपदकं प्रति नयिष्यति।

---------------

Hindusthan Samachar / Dheeraj Maithani