नव दिल्ली, 23 अगस्तमासः (हि.स.)।

कांग्रेसदलस्य महासचिवः जयरामरमेशः लोकसभायाः वर्षाकालीनसत्रस्य अनिश्चितकालाय स्थगनस्य दशदिनानन्तरमपि सदनस्य सत्रावसानं न कृतं प्रति प्रश्नम् उत्थापितवान्। सः आरोपं कृतवान् यत् किं केन्द्रीयगृहमन्त्री परिसीमनसम्बद्धं संविधानसंशोधनविधेयकं विशेषसत्रे पारयितुं द्वितीयांशबहुमतं सङ्गृहीतुं प्रयासं कुर्वन् अस्ति।

रमेशः रविवासरे एक्स इत्यत्र प्रकाशिते सन्देशे उक्तवान् यत् सामान्यतः लोकसभायाः अनिश्चितकालाय स्थगनस्य सत्रावसानस्य च मध्ये द्विदिनतः चतुर्दिनपर्यन्तं अन्तरं भवति। तथापि बहुषु अवसरेषु उभे प्रक्रिये एकस्मिन्नेव दिने सम्पन्ने अभवताम्।

सः उक्तवान् यत् वर्तमानलोकसभायाः अनिश्चितकालाय स्थगनात् दश दिनानि व्यतीतानि, तथापि अद्यापि तस्याः सत्रावसानस्य विषये कापि सूचना नास्ति। रमेशः अस्य विलम्बस्य असामान्यत्वं निर्दिश्य सर्वकारात् तस्य कारणं स्पष्टं कर्तुं आग्रहं कृतवान्।

कांग्रेसनेता उक्तवान् यत् वर्षे २०१५ तमे वर्षाकालीनसत्रस्य स्थगनस्य सत्रावसानस्य च मध्ये अष्टाविंशतिदिनानां तथा वर्षे २०२१ तमे विंशतिदिनानां अन्तरम् आसीत्, किन्तु तयोः उभयोः अवसरयोः कापि गम्भीरा षड्यन्त्ररचना न प्रचलिता आसीत्।

रमेशः उक्तवान् यत् अस्मिन् समये असामान्यस्य विलम्बस्य कारणं किम् अस्ति। सः आरोपपूर्वकं प्रश्नं कृतवान् यत् किं केन्द्रीयगृहमन्त्री विशेषसत्रम् आहूय परिसीमनसम्बद्धं संविधानसंशोधनविधेयकं पारयितुं अद्यापि द्वितीयांशबहुमतं सङ्गृहीतुं प्रयासं कुर्वन् अस्ति।

---------------

Hindusthan Samachar / Dheeraj Maithani