सुपौलम्, 23 अगस्तमासः (हि.स.)।

नगरपञ्चायतसिमराहीनगरस्य वार्डसङ्ख्या चतुर्थे स्थिते श्रीराधाकृष्णठाकुरबाड़ीमन्दिरे रविवासरात् षड्दिवसीयस्य श्रीमद्भागवतकथायाः प्रवचनस्य च शुभारम्भः अभवत्। राधाकृष्णझूलनमहोत्सवस्य अन्तर्गतं आयोजितः अयं धार्मिककार्यक्रमः अगस्तमासस्य त्रयोविंशतितः अष्टाविंशतितमदिनाङ्कपर्यन्तं प्रचलिष्यति। प्रतिदिनं सायं पञ्चवादनतः रात्रौ अष्टवादनपर्यन्तं श्रद्धालवः कथां प्रवचनं च श्रोष्यन्ति।

महोत्सवस्य प्रथमदिने प्रातः ठाकुरबाड़ीतः भव्यकलशशोभायात्रा निष्क्रान्ता। शोभायात्रा सार्वजनिकदुर्गामन्दिरं, गुलाबदासठाकुरबाड़ी, राष्ट्रियमार्गसङ्ख्या सप्तविंशतिः, सर्वेश्वरनाथमन्दिरं च गत्वा राघोपुरपुलिसस्थानकपरिसरे स्थितं कूपं प्राप्तवती। तत्र वैदिकमन्त्राणां घोषस्य मध्ये जलं पूरितं तथा विधिविधानपूर्वकं पूजाऽर्चना कृता। ततः श्रद्धालवः कलशान् गृहीत्वा पुनः ठाकुरबाड़ीं प्रत्यागतवन्तः।

शोभायात्रायां बहुसङ्ख्याकाः महिलाः शिरसि कलशान् धारयित्वा अनवाणपादाः सम्मिलिताः। श्रद्धालवः भगवद्वस्त्राणि धार्मिकध्वजांश्च धृत्वा अग्रे अगच्छन्। प्रायः सार्धैककिलोमीटरपर्यन्तं विस्तृते यात्रामार्गे ‘जयश्रीकृष्ण’ इति घोषेण हरिनामसङ्कीर्तनेन च सम्पूर्णं वातावरणं भक्तिमयं जातम्। तीव्रतापस्य अनवधानं कृत्वापि श्रद्धालूनां मध्ये उत्साहः श्रद्धा च स्पष्टतया दृश्यते स्म।

आयोजनसमित्याः अनुसारं कलशशोभायात्रायां सहस्रशः श्रद्धालवः सहभागितां कृतवन्तः। षड्दिवसीयां श्रीमद्भागवतकथां प्रवचनं च अयोध्याधामस्य प्रसिद्धः कथावाचकः पण्डितः पङ्कजमोहनशास्त्री करिष्यति। कथायाः समये सः भगवान् श्रीकृष्णस्य लीलाभिः सह भक्तेः, धर्मस्य मानवजीवनस्य च आदर्शमूल्यानां विषये विस्तरेण प्रकाशं करिष्यति।

धार्मिककार्यक्रमस्य सफलतायै श्रीराधाकृष्णठाकुरबाड़ीपरिवारः, श्रीश्री१०८दुर्गापूजासमितिः नगरपञ्चायतसिमराहीस्य श्रद्धालवश्च समर्पितभावेन प्रवृत्ताः सन्ति। आयोजनसमित्या क्षेत्रवासिभ्यः अधिकाधिकसङ्ख्यया समागत्य कथाश्रवणं कृत्वा धर्मलाभं प्राप्तुं आह्वानं कृतम्।

राधाकृष्णझूलनमहोत्सवं प्रति सिमराहीबाजारसहितेषु समीपस्थेषु ग्रामेषु च उत्साहस्य वातावरणं वर्तते। आयोजनं प्रति श्रद्धालूनां मध्ये विशेषः उत्साहः दृश्यते तथा धार्मिकसांस्कृतिकक्रियाकलापैः क्षेत्रस्य वातावरणं भक्तिमयं जातम्।

Hindusthan Samachar / Dheeraj Maithani