नवदिल्ली, 23 अगस्तमासः (हि.स.)।

विश्वहिन्दुपरिषदः राष्ट्रियप्रवक्ता विनोदबंसलः रविवासरे उक्तवान् यत् लोकसभायां विपक्षनेता राहुलगान्धिनः कृते हिन्दुधर्मग्रन्थेषु भावार्थम् अविज्ञाय वक्तुं सुकरम् अस्ति, किन्तु सः कुरान्, बाइबल् अन्यान् च अब्राह्मिकग्रन्थान् प्रति वक्तुं भीतिम् अनुभवति।

विहिप् नेता बंसलः एक्स इत्यत्र लिखितवान्, राहुलगान्धिनः कृते अविज्ञाय मनुस्मृतेः एकं श्लोकं चित्वा हिन्दुसमाजं कटघरे स्थापयितुं अत्यन्तं सुकरम् अस्ति। किन्तु एतावदेव स्पष्टतया साहसेन च कुराने, बाइबले अन्येषु च अब्राह्मिकग्रन्थेषु स्त्रीणां विषये यत् कथितम् अस्ति, तत् सार्वजनिकरूपेण वक्तुं शक्नुवन्ति किम्?

सः उक्तवान् यत् चयनितानाम् उद्धरणानां तेषां विकृतार्थानां च माध्यमेन दूषिता राजनीतिः तु भवितुं शक्नोति, किन्तु सत्यं न प्रकाशते। किं भवद्भिः ज्ञातं यत् यत्र नार्यस्तु पूज्यन्ते रमन्ते तत्र देवताः इत्ययमपि मनुस्मृतेः एव श्लोकः अस्ति। अतः राहुलः प्रथमं सम्पूर्णं ग्रन्थं पठतु, सन्तानां व्याख्यातॄणां च चरणयोः उपविश्य तदनन्तरं हिन्दुसमाजाय प्रमाणपत्राणि वितरतु। किन्तु तस्मात् पूर्वं देशस्य युवानां विशुद्धेषु मनस्सु स्वकीयायाः अशुद्धमानसिकतायाः विषं मा प्रक्षिपतु।

सः उक्तवान् यत् स्त्रीणां सम्मानस्य गौरवस्य च विषये भारताय भवतः शिक्षायाः आवश्यकता नास्ति। अत्रत्याः नारीशक्तिः अस्माकं सभ्यतायाः परिचयः एव अभवत्। तां राजनीतिकभाषणानां कृते मनुस्मृतिः विरुद्धा संविधानम् इति संघर्षे परिवर्तयितुं इतिहासस्य संस्कृतेश्च उभयोः अन्यायः भवति।

उल्लेखनीयं यत् कांग्रेसनेता राहुलगान्धी विगतेभ्यः कतिपयदिनेभ्यः छात्राणां प्रतिध्वनिः इति नाम्ना एकम् अभियानं सञ्चालयति। अस्य अन्तर्गतं सः विभिन्नैः विश्वविद्यालयैः महाविद्यालयैश्च सम्बद्धैः छात्रैः सह संवादं करोति। अस्यैव क्रमस्य अग्रे विस्तारं कुर्वन् सः शनिवासरे महाराष्ट्रस्य पुणेनगरे महिलाः सम्बोधयन् मनुस्मृतेः एकस्य श्लोकस्य उल्लेखं कृतवान्। सः उक्तवान् आसीत् यत् मनुस्मृतौ महिलायाः कदापि स्वतन्त्रं न भवितव्यम् इति कथितम् अस्ति। अस्यैव कथनस्य विषये कतिपयाः जनाः तस्य विरोधं कुर्वन्ति।

---------------

Hindusthan Samachar / Dheeraj Maithani