कोलकाता, २३ अगस्तमासः (हि.स.)। रक्षामन्त्री राजनाथसिंहः मुख्यमन्त्री शुभेन्द्वधिकारी च रविवासरे पश्चिमबङ्गाले गार्डन रीच शिपबिल्डर्स् एण्ड् इञ्जिनियर्स् तथा यन्त्र इण्डिया लिमिटेड् इत्येतयोः पञ्चानां विस्तारपरियोजनानां आधारशिलां स्थापितवन्तौ। प्रायः ३५०० कोटि-रूप्यकाणां व्ययेन क्रियमाणाभिः एताभिः परियोजनाभिः राज्ये रक्षोत्पादन-क्षमतायाः वृद्धिः, पोतनिर्माण-क्षेत्रस्य सुदृढीकरणं, औद्योगिकविकासस्य च गतिवर्धनं भविष्यतीति अपेक्षा अस्ति।

रक्षामन्त्रिणा देशस्य सुरक्षायै युद्धपोतानां, समुद्रीयपोतानां तथा अन्येषां समुद्रीय-मञ्चानां निर्माणे आत्मनिर्भरता महत्त्वपूर्णा इति प्रतिपादितम्। तेन उक्तं यत् भारतस्य वैश्विकपोतनिर्माणकेन्द्रत्वं प्राप्तुं क्षमता अस्ति। एतदर्थं देशे पोतनिर्माण-क्षमतायाः वर्धनं, स्वदेशीयविनिर्माणस्य सुदृढीकरणं, रक्षोत्पादने आत्मनिर्भरता च वर्धयितुं आवश्यकता अस्ति।

राजनाथसिंहेन गुणवत्तायाः, समये आपूर्तेः, उत्तम-रक्षणसम्भरण-मरम्मतसेवानां च रक्षोत्पादनस्य सफलतायै आवश्यकत्वं प्रतिपादितम्। तेन उक्तं यत् भारतीय-सशस्त्रबलेषु स्वदेशीय-रक्षोत्पादानाम् उपयोगः निरन्तरं वर्धमानः अस्ति, यः देशस्य रक्षोद्योगस्य वर्धमानां क्षमतां प्रदर्शयति।

रक्षामन्त्रिणा जी.आर.एस.ई. इत्यस्य योगदानस्य उल्लेखं कुर्वता उक्तं यत् निर्माण्या विगतेषु वर्षेषु शताधिकानां पोतानां आपूर्तिः कृता अस्ति तथा च भविष्ये भारतस्य पोतनिर्माणमहत्त्वाकाङ्क्षायां सा महत्त्वपूर्णां भूमिकां निर्वोढुं शक्नोति। तेन एतदपि सूचितं यत् जी.आर.एस.ई. जर्मनीदेशाय एकस्य मालवाहकपोतस्य निर्माणं करोति, यत् भारतीयपोत-निर्माणक्षमतायाः वर्धमानस्य वैश्विक-स्वीकारस्य सूचकः अस्ति।

जी.आर.एस.ई. इत्यस्य त्रिभिः परियोजनाभिः पोतनिर्माणस्य आधारभूत-संरचनायाश्च क्षमता वर्धयिष्यते। निर्माण्या कोलकातानगरस्य श्यामा प्रसाद मुखर्जी-पत्तनस्य समीपे हुगलीनद्याः उभयतीरयोः द्वयोः लघुपोतनिर्माणकेन्द्रयोः तथा रायचके द्वात्रिंशदेकडमितायाः नदीतीरस्थभूमेः कृते पट्टासन्धय: कृताः सन्ति। एताभिः सुविधाभिः युद्धपोतानां निर्माणं, लघुमध्यमाकाराणां वाणिज्यिकपोतानां निर्माणं कर्तुं क्षमता वर्धिष्यते।

एतासां परियोजनानां कृते भूमिपूजन-कार्यक्रमः खिदिरपुरे, शालीमारे, रायचके ईशापुरे च एकस्मिन् काले आयोजितः।

ईशापुरस्थितस्य यन्त्र इण्डिया लिमिटेड् इत्यस्य धातु-इस्पात्-निर्माण्यौ द्वयोः नूतनयोः सुविधयोः कृते ७५० कोटिरूप्यकेभ्यः अधिकस्य धनस्य निवेशः करिष्यते। आधुनिक-औद्योगिक-प्रौद्योगिक्या ऊर्जादक्षप्रणालीभिश्च युक्ताभिः एताभिः सुविधाभिः उच्चस्तरीय-विनिर्माणक्षमतायाः वर्धनं, आयात-निर्भरत्वस्य न्यूनीकरणं तथा रक्षाक्षेत्रस्य, रेलक्षेत्रस्य, सामरिकक्षेत्राणां च आवश्यकतानां पूरणं कर्तुं साहाय्यं भविष्यति।

राजनाथसिंहेन यन्त्र इण्डिया लिमिटेड् इत्यस्य रक्षोत्पादनस्य सहैव अनुसन्धान-विकासस्य उन्नतधातुकर्मणश्च क्षेत्रयोः विस्तारस्य प्रशंसा कृता। तेन उक्तं यत् अनेन सामरिकविनिर्माणक्षमता सुदृढा भविष्यति तथा च देशस्य आयातनिर्भरत्वं न्यूनीकर्तुं साहाय्यं भविष्यति।

रक्षामन्त्रिणा उक्तं यत् पश्चिमबङ्गाले एतासां परियोजनानां शुभारम्भः औद्योगिकविकासस्य नूतनचरणस्य दिशि महत्त्वपूर्णं पदम् अस्ति। अनेन निवेशस्य, रोजगारस्य, आर्थिकविकासस्य च नूतनाः अवसराः उत्पत्स्यन्ते। तेन आन्तरिक-सुरक्षासम्बद्धेषु विषयेषु राज्यसर्वकारस्य सहयोगस्य अपि प्रशंसा कृता तथा च पश्चिमबङ्गाले विकासस्य नूतना गतिः आगमिष्यतीति विश्वासः प्रकटितः।

मुख्यमन्त्रिणा शुभेन्दु-अधिकारीणा केन्द्र-राज्ययोः सहयोगः पश्चिमबङ्गालस्य विकासाय महत्त्वपूर्णः इति प्रतिपादितम्। तेन आशा प्रकटिता यत् उत्तमसमन्वयेन राज्यस्य औद्योगिकस्य आर्थिकस्य च विकासस्य गतिः अधिकं वर्धिष्यते।

सर्वकारानुसारम् एताभिः परियोजनाभिः प्रत्यक्षरोजगारस्य अवसराः वर्धिष्यन्ते, रक्षाक्षेत्रसम्बद्धानाम् सहायकैककानां सूक्ष्म-लघु-मध्यम-उद्यमानां च लाभः भविष्यति। अनेन पश्चिमबङ्गाले रक्षा-विनिर्माणस्य पोतनिर्माणस्य च औद्योगिकतन्त्रं सुदृढं भविष्यतीति अपेक्षा अस्ति।

Hindusthan Samachar / Divya Ranjan