जौनपुरम्, 24 अगस्तमासः (हि.स.)।उत्तरप्रदेशस्य जौनपुरजनपदे राष्ट्रियक्रीडादिवसस्यावसरे अगस्तमासस्य सप्तविंशतितमे दिनाङ्के वीरबहादुरसिंहपूर्वाञ्चलविश्वविद्यालयपरिसरे ‘खेलो इण्डिया संवादः क्रीडाविषयकं वार्तालापं प्रधानमन्त्रिणा सह’ इति कार्यक्रमस्य आयोजनं भविष्यति। कुलपतिः प्रो. वन्दनासिंहस्य नेतृत्वे राष्ट्रियसेवायोजनायाः, वीरबहादुरसिंहपूर्वाञ्चलविश्वविद्यालयस्य, मम युवाभारतस्य जौनपुरस्य च संयुक्ततत्त्वावधाने आयोजिते अस्मिन् राष्ट्रव्यापिकार्यक्रमे प्रधानमन्त्री नरेन्द्रमोदी युवभ्यः आभासीयमाध्यमेन सम्बोधनं करिष्यति।

युवकार्यक्रमक्रीडामन्त्रालयस्य निर्देशानुसारम् आयोजितस्य कार्यक्रमस्य प्रारम्भः प्रातः एकादशवादने प्रधानमन्त्रिणः आभासीयसम्बोधनेन भविष्यति। अस्य कार्यक्रमस्य सम्प्रसारणं देशस्य सर्वेषु जनपदेषु एकस्मिन्नेव समये प्रत्यक्षरूपेण भविष्यति। कार्यक्रमे युवकार्यक्रमक्रीडामन्त्री डॉ. मनसुखमाण्डवियायाः स्वागतसम्बोधनं तथा राष्ट्रियक्रीडादिवसमाधारितानां लघुचलचित्राणां प्रदर्शनमपि भविष्यति।

राष्ट्रियसेवायोजनायाः कार्यक्रमसमन्वयकः डॉ. शशिकान्तयादवः अवदत् यत् वीरबहादुरसिंहपूर्वाञ्चलविश्वविद्यालयपरिसरं तथा राजकीयमहिलास्नातकोत्तरमहाविद्यालयं गाजीपुरं च ‘क’ वर्गाय चयनिते स्तः। अत्र प्रत्यक्षप्रसारणेन सह द्विपक्षीयसंवादस्य सुविधा उपलब्धा भविष्यति। तत्रैव सल्तनतबहादुरस्नातकोत्तरमहाविद्यालयः बदलापुरः जौनपुरं तथा महात्मागान्धीशतीस्मारकमहाविद्यालयः गरुआ मकसूदपुरं गाजीपुरं च ‘ख’ वर्गे चयनिते स्तः। अत्र प्रत्यक्षप्रसारणेन सह एकपक्षीयसंवादस्य व्यवस्था भविष्यति।

युवाधिकारी तन्मयमोहनः अवदत् यत् प्रधानमन्त्रिणः सम्बोधनानन्तरं स्थानीयक्रीडकैः सह सञ्चालिता परिचर्चा, जनप्रतिनिधीनां सम्बोधनं तथा युवानां विचारानाम् आकाङ्क्षाणां च ज्ञातार्थं पञ्चदशमिनिटपरिमितः ‘युवासंवादः’ इति सत्रः आयोजितः भविष्यति। अस्मिन् समये युवानः चतुर्षु प्रमुखेषु विषयेषु स्वकीयाः सुझावान् प्रस्तुतयिष्यन्ति। तेषु देशे क्रीडापरितन्त्रस्य सुदृढीकरणम्, द्विसहस्रषट्त्रिंशत्तमवर्षस्य ओलिम्पिक्क्रीडायै प्रतिभानां विकासः, शासनव्यवस्थायां युवनेतृत्वस्य सहभागितायाश्च वर्धनम् तथा विकसितभारताय युवानां सशक्तीकरणम् इत्येते विषयाः प्रमुखाः सन्ति।

कार्यक्रमे युवानः ‘मम भारतम्’ इति जालपुटे पञ्जीकरणाय अपि प्रेरयिष्यन्ते। राष्ट्रियसेवायोजनायाः कार्यक्रमाधिकारिभिः ‘मम युवा भारतम्’ इत्यस्य जिलासंयोजकैश्च जनपदस्य छात्रछात्राभ्यः युवभ्यश्च कार्यक्रमे अधिकाधिकसंख्यया सहभागितां कर्तुं समाह्वानं कृतम्।

Hindusthan Samachar / Dheeraj Maithani