मंडी, 24 अगस्तमासः (हि.स.)।

हिमाचलस्य सांस्कृतिकराजधानी मण्ड्याः पञ्जेठ्यां कलायाः विविधविधाभ्यः समर्पिते कलाग्रामे नवनिर्मितं मुक्तनाट्यगृहम् लोककलायाः सङ्गीतस्य नृत्यस्य अभिनयस्य च आकर्षकप्रस्तुतिभिः सह प्रारब्धम्। स्वर्गीयस्य टेकचन्द्रकपूरस्य जन्मशताब्दिवर्षस्य उपलक्ष्ये तस्य पुत्रेण कालरूकायथफाउण्डेशनस्य संस्थापकेन प्रोफेसरेण डॉ. राकेशकपूरेण च अयं मुक्तनाट्यगृहः स्वपूर्वजेभ्यः समर्पितः। अस्मिन् अवसरे कलायाः सर्वासु विधासु पारङ्गताः कलाकाराः उपस्थिताः आसन्, येन कार्यक्रमे उत्साहपूर्णं वातावरणम् अभवत्।

कालरूकायथफाउण्डेशनस्य स्थापनया सह तस्य युवा सदस्यौ उज्ज्वलाकपूरः सुदीपकपूरश्च फाउण्डेशनस्य दूरदृष्टिं उद्देश्यानि च प्रस्तुतवन्तौ। कलायाः, रूपाङ्कनस्य, चलचित्रमाध्यमस्य च साहाय्येन एतेषाम् उद्देश्यानां कथं प्राप्तिः शक्या इति विषये अपि ताभ्यां स्वविचाराः प्रस्तुताः।

उल्लेखनीयं यत् उज्ज्वलाकपूरः स्कॉटलैण्डदेशस्य यूनाइटेडकिङ्गडमस्थितस्य एडिनबर्गविश्वविद्यालयस्य एडिनबर्गकलाविद्यालये सृजनात्मकवृत्तचित्रनिर्माणविषये विद्यावारिधिशोधकार्यं करोति। अपरत्र सुदीपकपूरः अहमदाबादस्थिते राष्ट्रियविन्याससंस्थाने स्नातकोत्तरस्तरीयां शिक्षां प्राप्नोति।

फाउण्डेशनस्य सदस्या मञ्चसञ्चालिका च डॉ. लतेशकपूरः अवदत् यत् मण्ड्याः समीपे स्थितस्य अस्य सुन्दरस्य कलाग्रामस्य तत्र च मुक्तनाट्यगृहस्य परिकल्पना फाउण्डेशनस्य युवा सदस्या उज्ज्वलायाः आसीत्। डॉ. राकेशकपूरेण तु तस्याः स्वप्नं भूमौ साकारं कृतम्।

मुक्ताकाशस्य अधः प्रकृतेः सान्निध्ये आयोजितस्य अस्य कार्यक्रमस्य सर्वप्रमुखं वैशिष्ट्यम् आसीत् यत् अत्र न कोऽपि मुख्यातिथिः आसीत्, न च कोऽपि कार्यक्रमाध्यक्षः। सर्वप्रकारस्य औपचारिकताभ्यः विमुक्ते अस्मिन् कार्यक्रमे सम्मिलितः प्रत्येकः जनः स्वयमेव विशिष्टः विशेषश्च आसीत्। कलाग्रामस्य स्थापनायाः शुभारम्भः स्वकीयया विशिष्टया पद्धत्या अभवत्। अस्मिन् मुक्ताकाशस्य अधः शास्त्रीयनृत्यस्य, गायनस्य वादनस्य च, लोकनृत्यस्य, लोकगाथायाः, रङ्गमञ्चस्य च प्रभावशालिन्यः प्रस्तुतयः अभवन्।

कार्यक्रमस्य शुभारम्भः विद्यायाः अधिष्ठात्रीदेव्याः सरस्वत्याः वन्दनया अभवत्, या मण्डीस्थितैः सङ्गीतसदनस्य कलाकारैः प्रस्तुतिता। ततः लोककलाकारेण भीष्मेण वादितायाः वंशिकायाः मधुरध्वनेः कारणेन सम्पूर्णं वातावरणं सङ्गीतमयं जातम्। तपस्सङ्गीतनृत्य-अकादम्याः बालिकाभिः गुरुवन्दनारूपेण नृत्यप्रस्तुतिः कृता। तदतिरिक्तं लोककलारूपेण माण्डव्यकलामञ्चस्य लोकनृत्यं लुड्डी इति प्रस्तुतीकरणम्, कृष्णठाकुरेण लोकगायनस्य भौरू इति प्रस्तुतीकरणं, लोकसाहित्यकारेण प्रकाशचन्द्रधीमानेन निर्देशितायाः ऐतिहासिकायाः लोकगाथायाः झेहड़ा इत्यस्य गायनं च स्वपरम्परां विरासतं च संरक्षितुं विशिष्टः प्रशंसनीयश्च प्रयासः आसीत्।

Hindusthan Samachar / Dheeraj Maithani