कानपुरम्, 24 अगस्तमासः (हि.स.)।

अभियांत्रिकी, प्रौद्योगिक्याः चिकित्साविज्ञानस्य च क्षेत्रेषु अनुसन्धानस्य नवाचारस्य च सम्भावनाः दृष्ट्वा भारतीयप्रौद्योगिकीसंस्थानेन कानपुरे २०२१ तमे वर्षे चिकित्साविद्यालयस्य स्थापनायाः निर्णयः कृतः आसीत्। वर्षे २०२२ तमे राकेशगङ्गवालस्य शतकोटिरूप्यकाणां सहयोगेन अस्य दिशि कार्यारम्भाय सहायता प्राप्ता। अधुना तेन प्रदीयमानेन त्रिशतकोटिरूप्यकाणाम् अतिरिक्तसहयोगेन अस्माकं स्वप्नं शीघ्रतरं साकारं भविष्यति। अयं सहयोगः संस्थानं प्रति तस्य विश्वासं प्रतिबद्धतां च प्रदर्शयति। भारतीयप्रौद्योगिकीसंस्थानस्य कानपुरस्य पक्षतः अहं तस्मै कृतज्ञतां प्रकटयामि। इमानि वचनानि सोमवासरे भारतीयप्रौद्योगिकीसंस्थानस्य कानपुरस्य निदेशकः प्रो. मणीन्द्रअग्रवालः उक्तवान्।

भारतीयप्रौद्योगिकीसंस्थानस्य कानपुरस्य विशिष्टः पूर्वछात्रः इण्डिगो-सहसंस्थापकश्च राकेशगङ्गवालः गङ्गवालचिकित्साविज्ञानप्रौद्योगिकीविद्यालयस्य विकासाय अतिरिक्तत्रिशतकोटिरूप्यकाणां दानस्य घोषणा कृतवान्। वर्षे २०२२ तमे सः विद्यालयाय शतकोटिरूप्यकाणां योगदानं पूर्वमेव दत्तवान् आसीत्। नूतनघोषणया सह गङ्गवालस्य विद्यालयाय कुलयोगदानं चतुःशतकोटिरूप्यकाणि अभवत्।

नूतनप्रतिबद्धतायाः अन्तर्गतं राकेशगङ्गवालः अन्येषां सहयोगिनां पक्षतः प्रदीयमानस्य योगदानस्य समतुल्यां अधिकतमं त्रिशतकोटिरूप्यकाणां यावत् सममूल्यदानरूपेण राशिं प्रदास्यति। अस्याः पहलस्य उद्देश्यं भारतीयप्रौद्योगिकीसंस्थाने कानपुरे चिकित्साशिक्षायाः, अनुसन्धानस्य, नैदानिकनवाचारस्य, चिकित्साप्रौद्योगिक्याः च क्षेत्रेषु विकासस्य गतिं वर्धयितुम् अस्ति। तेन सह पूर्वछात्रान्, समाजसेवकान् अन्यान् च शुभचिन्तकान् विद्यालयस्य विकासाय योगदानं दातुं प्रेरयिष्यते।

गङ्गवालचिकित्साविज्ञानप्रौद्योगिकीविद्यालयस्य विकासयोजनासु भारतीयप्रौद्योगिकीसंस्थानस्य कानपुरस्य परिसरे पञ्चशतशय्यायुक्तस्य अतिविशिष्टचिकित्सालयस्य तथा द्विशतशय्यायुक्तस्य प्रस्तावितस्य कर्करोगचिकित्सासन्धानकेन्द्रस्य स्थापनं सम्मिलितम् अस्ति। एताभिः सुविधाभिः चिकित्साशिक्षायाः, नैदानिकानुसन्धानस्य, उत्कृष्टस्वास्थ्यसेवानां च प्रोत्साहनस्य योजना अस्ति।

विद्यालयस्य माध्यमेन चिकित्सकान्, अनुसन्धानकर्तॄन्, अभियन्तॄन्, प्रौद्योगिकिविशेषज्ञान् च एकत्र आनयित्वा स्वास्थ्यक्षेत्रस्य समस्यासु समाधानविकासे विशेषं बलं प्रदास्यते। अस्य उद्देश्यं चिकित्साविज्ञानं भारतीयप्रौद्योगिकीसंस्थानस्य कानपुरस्य अभियांत्रिकीविज्ञानप्रौद्योगिकीनां च विशेषज्ञतया सह संयोजयितुम् अस्ति।

गङ्गवालचिकित्साविज्ञानप्रौद्योगिकीविद्यालयस्य नवनियुक्तः अधिष्ठाता प्रो. अनिलः के. लालवानी उक्तवान् यत् राकेशगङ्गवालस्य योगदानम् अस्य तथ्यस्य उदाहरणम् अस्ति यत् एकः व्यक्तिरपि बृहद्परिवर्तनस्य आरम्भं कर्तुं शक्नोति। चिकित्सां, प्रौद्योगिकीं नवाचारं च समाजसेवायै एकत्र आनयितुं विद्यालयस्य दृष्टिः भारतीयप्रौद्योगिकीसंस्थानस्य कानपुरात् दूरमपि प्रभावं जनयितुं शक्नोति।

राकेशगङ्गवालः उक्तवान् यत् अस्य अभिनवस्य स्वप्रकारस्य प्रथमस्य च चिकित्सासंस्थानस्य भागी भवितुं तस्य कृते सम्मानस्य गौरवस्य च विषयः अस्ति।

गङ्गवालचिकित्साविज्ञानप्रौद्योगिकीविद्यालयस्य उद्देश्यं चिकित्साविज्ञानं भारतीयप्रौद्योगिकीसंस्थानस्य कानपुरस्य अभियांत्रिकीविज्ञानप्रौद्योगिकीनां च विशेषज्ञतया सह संयोजयितुम् अस्ति। विद्यालयः उन्नतशैक्षणिककार्यक्रमान्, बहुविषयकानुसन्धानम्, भविष्यस्य चिकित्सां चिकित्साप्रौद्योगिकीनवाचारं च प्रोत्साहयितुं केन्द्रितः अस्ति।

Hindusthan Samachar / Dheeraj Maithani