मीरजापुरम्, 24 अगस्तमासः (हि.स.)।

श्रावणमासस्य विदायायाः रक्षाबन्धनस्य चागमनस्य मध्ये मीरजापुरनगरे पुनरपि स्वस्य समृद्धां सङ्गीतपरम्परां स्वरैः संवर्धयितुं सज्जता क्रियते। गजियाटोलास्थिते गौघाटे श्रीरामजानकीमन्दिरपरिसरे सोमवासरात् पञ्चदिवसीयस्य सङ्गीतसमारोहस्य शुभारम्भः भविष्यति। अत्र लोकगीतस्य कजरीतः आरभ्य भजनं, गजल्, शास्त्रीयसङ्गीतं च यावत् विविधाः प्रस्तुतयः श्रोतॄन् सङ्गीतस्य विभिन्नैः रूपैः परिचाययिष्यन्ति।

मीरजापुरलोककलासङ्गीतसंस्कृतिप्रचारिणीसमित्या आयोजिते अस्मिन् समारोहे प्रायः अश्यीतिः कलासाधकाः स्वकीयाः प्रस्तुतयः प्रदास्यन्ति। आयोजकः राजकुमारखत्री इत्यस्य अनुसारं कार्यक्रमस्य उद्देश्यं केवलं मनोरञ्जनं न, अपि तु विन्ध्यक्षेत्रस्य पारम्परिकसङ्गीतविरासतां नूतनां संततिं प्रति प्रेषयितुम् अपि अस्ति।

समारोहस्य मुख्यातिथिः बूढेनाथमन्दिरस्य महन्तः स्वामी डॉ. योगानन्दगिरिमहाराजः भविष्यति। मार्गदर्शकमण्डले पद्मश्रीकजरीगायिका उर्मिलाश्रीवास्तवा, नगरपालिकाध्यक्षः श्यामसुन्दरकेसरी, वरिष्ठसाहित्यकारः सलिलपाण्डेयः तथा सङ्गीतानुरागी ओमप्रकाशमिश्रः सम्मिलिताः सन्ति।

कजर्या आरप्स्यते स्वरयात्रा

समारोहस्य प्रथमौ द्वौ सायंकालौ अर्थात् अगस्तमासस्य चतुर्विंशतितमं पञ्चविंशतितमं च दिनं कजर्यै समर्पितौ भविष्यतः। मीरजापुरस्य परिचयेन सम्बद्धायां कजर्यां श्रावणमासस्य, प्रेम्णः, प्रकृतेः ग्रामीणजीवनस्य च विविधाः झलकाः दृश्यन्ते। ततः अगस्तमासस्य षड्विंशतितमे सप्तविंशतितमे च दिनाङ्के सुगमसङ्गीतस्य, भजनस्य, गजलस्य, उपशास्त्रीयसङ्गीतस्य च प्रस्तुतयः भविष्यन्ति। अन्तिमे दिने अगस्तमासस्य अष्टाविंशतितमे दिनाङ्के शास्त्रीयसङ्गीतेन सह समारोहस्य समापनं भविष्यति। सर्वे कार्यक्रमाः सायं अष्टवादनात् प्रारभ्यन्ते।

नूतनकलाकाराणामपि अवसरः प्राप्स्यते

आयोजनस्य विशेषता इयं वर्तते यत् प्रतिष्ठितकलाकारैः सह नवोदितप्रतिभाभ्यः अपि मञ्चः प्रदास्यते। नगरे समीपवर्तिक्षेत्रेषु च सङ्गीतसाधकानां अतिरिक्तं बहिःप्रदेशेभ्यः आगच्छन्तः कलाकाराः अपि स्वकीयां कलां प्रस्तुतं करिष्यन्ति। मन्दिरपरिसरे मातुः विन्ध्यवासिन्याः आराधनया सह भगवान् शिवस्य प्रभोः श्रीरामस्य च महिम्नः गुणगानमपि भविष्यति।

---------------

Hindusthan Samachar / Dheeraj Maithani