पुत्रदैकादशी, बुधादित्यराजयोगः हंसराजयोगश्च समेतं पञ्चशुभसंयोगेषु श्रीकाशीविश्वनाथस्य पावने ज्योतिर्लिङ्गे श्रद्धायाः अखण्डा जलधारा

मन्दिरस्य मुख्यकार्यपालकाधिकारिणा शिवभक्तेषु पुष्पवृष्टिः कृता, मन्दिरस्य गर्भगृहे सायंकाले बाबा इत्यस्य रुद्राक्षशृङ्गारः भविष्यति

वाराणसी, २४ अगस्तमासः (हि.स.)। उत्तरप्रदेशस्य धार्मिकनगरी काशी श्रावणमासस्य चतुर्थे अन्तिमे च सोमवासरे केसरियावर्णमयी जाता। शिवमयीभूतायां काशीपुराधिपतेः नगर्यां सर्वत्र कङ्करे कङ्करे शङ्करस्य भावः दृश्यते। बाबास्य सुवर्णमण्डिते दरबारे ‘कैलाशी काशी के वासी अविनाशी मेरी सुध लीज्यो’ इति भावेन पावने ज्योतिर्लिङ्गे श्रद्धायाः अखण्डा जलधारा पतति। श्रावणमासस्य अन्तिमे सोमवासरे प्रातः सप्तवादनपर्यन्तं प्रीतियोगः, ततः आयुष्मान्योगः, पुत्रदैकादशी, बुधादित्यराजयोगः हंसराजयोगश्च इति पञ्चशुभसंयोगानां सुखदसमये शिवभक्ताः बाबास्य झाङ्कीदर्शनं जलाभिषेकं च कृत्वा आह्लादिताः सन्ति। सम्पूर्णं धामपरिसरं श्रद्धालूनां “हर हर महादेव”, “काशीविश्वनाथ शम्भो” इति गगनभेदीभिः कालजयीभिः घोषणाभिः गुंजायमानम् अस्ति।

मन्दिरन्यासस्य पक्षतः सम्पूर्णः परिसरः पुष्पैः पल्लवैश्च सह रुद्राक्षबीजैः आकर्षकरूपेण सज्जितः अस्ति। मन्दिरस्य गर्भगृहे सायंकाले बाबास्य पावनस्य ज्योतिर्लिङ्गस्य रुद्राक्षशृङ्गारः भविष्यति। तस्मात् पूर्वं दरबारे दर्शनपूजनाय लक्षशः शिवभक्ताः रविवासरस्य मध्याह्नादेव अवरोधकव्यवस्थायां पङ्क्तिबद्धाः भवितुम् आरब्धवन्तः। प्रातःकाले मन्दिरस्य गर्भगृहे मङ्गलारत्यनन्तरं मन्दिरस्य कपाटे उद्घाटिते सति पङ्क्तिबद्धेषु श्रद्धालुषु मन्दिरन्यासस्य मुख्यकार्यपालकाधिकारी डॉ. विश्वभूषणमिश्रः अन्ये च अधिकारिणः गुलाबपुष्पदलानि वृष्टवन्तः। सम्मानभावेन आह्लादिताः शिवभक्ताः रक्तवर्णीयवस्त्रे आच्छादिते मार्गे गत्वा बाबास्य पूजनाय दरबारं प्राप्तवन्तः। अयं क्रमः सम्पूर्णदिवसं विलम्बितसायंकालपर्यन्तं निरन्तरं भविष्यति।

मन्दिरन्यासस्य अनुसारं प्रातः सप्तवादनपर्यन्तं एकलक्षाधिकाः श्रद्धालवः बाबास्य पावनस्य ज्योतिर्लिङ्गस्य झाङ्कीदर्शनं कृतवन्तः। दरबारे ज्योतिर्लिङ्गे बहिः स्थापितेन पात्रेण जलाभिषेकं कृत्वा आह्लादितभावेन श्रद्धालवः बाबास्य झाङ्कीदर्शनानन्तरं काशीविश्वनाथधाम्नः भव्यं नूतनं विस्तारितं स्वरूपं दृष्ट्वा मुक्तकण्ठेन तस्य प्रशंसां कृतवन्तः।

मन्दिरे जिला प्रशासनस्य मन्दिरप्रबन्धनस्य च पक्षतः श्रद्धालूनां सुविधायै चिकित्सकाः, रुग्णवाहिकाः एनडीआरएफ-दलश्च नियुक्ताः सन्ति। पेयजलव्यवस्थातः आरभ्य लब्धवस्तुकेन्द्रं सार्वजनिकघोषणाव्यवस्था च स्थापिताः सन्ति। मन्दिरस्य गर्भगृहात् पूर्वमेव श्रद्धालवः एलईडी-पटलस्य माध्यमेन श्रीकाशीविश्वनाथस्य दर्शनं कुर्वन्ति। दरबारं गन्तुं लौहवेष्टनयोर्मध्ये विस्तारितेन कार्पेटमार्गेण श्रद्धालवः क्रमबद्धां वक्राकारां पङ्क्तिं कृत्वा दरबारं प्राप्नुवन्ति।

बाबादरबारं प्रति आगच्छतां श्रद्धालूनां पङ्क्तिः एकस्मिन् पार्श्वे गोदौलियातः बाबादरबारपर्यन्तं, अपरस्मिन् पार्श्वे गङ्गातः बाबादरबारपर्यन्तं च विस्तृता आसीत्। शिवमयीभूतायां नगर्यां गङ्गाघाटात् बाबादरबारपर्यन्तं श्रद्धायाः एकात्मभावः दृश्यते। केसरियवस्त्रधारिणां बाबाभक्तानां कांवडियानां उत्साहः दर्शनीयः अस्ति। धामपरिसरात् मन्दिरपरिसरस्य बहिः पर्यन्तमपि पुलिसाधिकारिणः सुरक्षाव्यवस्थां सुदृढां कर्तुं निरन्तरं परिभ्रमन्तः सन्ति।

अन्तिमसोमवासरे मैदागिनतः गोदौलियापर्यन्तं, सोनारपुराचतुष्पथात् गुरुबागमार्गेण रामापुराबेनियाबागतिराहापर्यन्तं, ब्राडवेतिराहातः सोनारपुरामार्गेण गोदौलियापर्यन्तं, भेलूपुरतः रामापुराचतुष्पथपर्यन्तं पदयात्रिणः विहाय सर्वेषां वाहनानां प्रवेशः प्रतिबन्धितः कृतः अस्ति।

श्रद्धालूनां सेवायां संलग्नाः सामाजिकसङ्गठनानि

चतुर्थे अन्तिमे च सोमवासरे दरबारे मार्गेषु च पङ्क्तिबद्धानां कांवडियानां शिवभक्तानां च सेवायै सामाजिकसङ्गठनैः, नागरिकसुरक्षासङ्गठनेन सह समाजवादीदलस्य भारतीयजनतादलस्य च कार्यकर्तृभिः विभिन्नेषु स्थानेषु शिविराणि स्थापितानि सन्ति।

नगरे स्थितेषु अन्येषु प्रमुखेषु शिवालयेषु ओंकारेश्वरमहादेवः, महामृत्युञ्जयः, शूलटङ्केश्वरमहादेवः, तिलभाण्डेश्वरमहादेवः, गौरीकेदारेश्वरः, त्रिलोचनमहादेवः, रामेश्वरमहादेवः, कर्मदेश्वरमहादेवः, सारङ्गनाथः, गौतमेश्वरमहादेवः, जागेश्वरमहादेवः इत्यादिषु सर्वेषु लघुमहदाकारशिवालयेषु जलाभिषेकाय श्रद्धालूनां महाप्रवाहः समुपस्थितः अस्ति।

गङ्गायाः जलस्तरस्य वृद्धिं दृष्ट्वा दशाश्वमेधघाटे अतिरिक्तसतर्कता वर्तते। काशीविश्वनाथधाम्नि सुरक्षाकारणात् गङ्गाद्वारं पिहितम् अस्ति। दशाश्वमेधघाटसहितेषु सर्वेषु प्रमुखेषु गङ्गाघाटेषु गन्तुं मार्गेषु पुलिसबलं सतर्कं नियुक्तम् अस्ति। श्रद्धालूनां ध्वनिविस्तारकयन्त्रेण सावधानता सूच्यते यत् ते गङ्गायां स्नानसमये विशेषतया सतर्काः भवन्तु। नौकायानं पूर्णतया प्रतिबन्धितम् अस्ति। गङ्गायां जलपुलिसस्य एनडीआरएफस्य एकादशस्य वाहिन्याः च जवानाः गस्तं कुर्वन्ति।

अस्यैव क्रमे चौबेपुरकैथीस्थिते मार्कण्डेयमहादेवधाम्नि श्रावणमासस्य अन्तिमे सोमवासरे जलाभिषेकाय श्रद्धालूनाम् अखण्डा पङ्क्तिः दृश्यते। रविवासरस्य सायंकालादेव श्रद्धालवः दरबारं प्राप्तवन्तः आसन्। श्रद्धालूनां सुरक्षायै सुगमदर्शनाय च जिला प्रशासनस्य पक्षतः विभिन्नेषु स्थानेषु अवरोधकव्यवस्था कृता अस्ति। धामात् त्रिकिलोमीटरपूर्वं कैथीतिराहे एव सर्वविधानां वाहनानां प्रवेशः निरुद्धः क्रियते। श्रद्धालवः गङ्गागोमतीसङ्गमे स्नानं कृत्वा मार्कण्डेयमहादेवधाम्नि दर्शनपूजनं जलाभिषेकं च कर्तुं गच्छन्ति। अन्तिमे सोमवासरे श्रीकाशीविश्वनाथस्य दरबारे स्थानीयशिवभक्तानां संख्या अधिका वर्तते।

Hindusthan Samachar / Dheeraj Maithani