पाटलिपुत्रम्, २५ अगस्तमासः (हि.स.)। बिहारसर्वकारस्य सूचनाजनसम्पर्क-विभागस्य सचिवः नवीनकुमारः मङ्गलवासरे नवदिल्ल्यां विज्ञानभवने आयोजिते राज्येषु केन्द्रशासितप्रदेशेषु च सूचनाजनसम्पर्क-सचिवानां राष्ट्रीय-सम्मेलने बिहारस्य प्रतिनिधित्वं कृतवान्। सम्मेलने भारतसर्वकारस्य सूचना-प्रसारण-मन्त्रालयस्य सचिवेन चञ्चल-कुमारेण सह केन्द्रसर्वकारस्य विभिन्नराज्यानां केन्द्रशासितप्रदेशानां च वरिष्ठाः अधिकारिणः उपस्थिताः आसन्।

सम्मेलनस्य उद्देश्यम् केन्द्रस्य राज्यैश्च मध्ये सूचनाजनसञ्चारव्यवस्थां अधिक-प्रभावीकरणम्, परिवर्तमान-माध्यम-परिदृश्यानुरूपं नवीनव्यवस्थानां स्वीकरणम् तथा परस्परसमन्वयस्य सुदृढीकरणम् आसीत्। सम्मेलने सूचनाप्रसारणक्षेत्रसम्बद्धेषु विविधेषु नीतिगतव्यावहारिकविषयेषु च विस्तरेण विचारविमर्शः कृतः।

उपवेशने प्रेससूचनाब्यूरो-संस्थानस्य राज्येषु केन्द्रशासितप्रदेशेषु च सूचनाजनसम्पर्कविभागैः सह सहभागितां सुदृढीकर्तुं विशेषरूपेण चर्चा कृता। तदनन्तरं सूचनाजनसम्पर्काधिकारिणां क्षमतानिर्माणाय भारतीयजनसञ्चार-संस्थानस्य प्रशिक्षणसुविधानां उपयोगस्य विषये अपि विचारः कृतः।

सम्मेलने वेव्स-२०२७ इत्यस्य रूपरेखा, वेव्स-विपणस्य माध्यमेन विपण्यां प्रवेशं सुदृढीकर्तुम्, सार्वजनिकसेवाप्रसारणस्य आधारभूतसंरचनायाः विस्तारः तथा राज्यविशिष्टकार्यक्रमानां जनसम्पर्कस्य च प्रभावीकरणम् इत्यादिषु विषयेष्वपि चर्चा कृता। चलचित्रनिर्माणस्य प्रत्यक्षकार्यक्रमस्य च अनुमत्यर्थम् इण्डिया-सिने-हब् इत्यस्य एकल-प्रवेश-पटलस्य स्वीकरणे तथा सार्वजनिकसेवाप्रसारणे राज्यस्य सह-भागितां वर्धयितुं विचारः कृतः।

तदतिरिक्तं प्रेस्-एण्ड्-रजिस्ट्रेशन-ऑफ्-पेरिऑडिकल्स (पीआरपी) अधिनियमः, २०२३ इत्यस्य अन्तर्गतं प्रेससेवा-पटलस्य माध्यमेन डिजिटलव्यवस्थां प्रति संक्रमणम्, ग्रामीणवञ्चितक्षेत्रेषु न्यूनव्ययस्य चलचित्राणां प्रोत्साहनम्, चलचित्रगृहेषु सुगम्यतामानकानां कार्यान्वयनम् तथा वेव्स्-एक्स्-स्टेट्-इकोसिस्टम इत्यस्य प्रभावीकरणम् इत्यादयः विषयाः अपि सम्मेलनस्य कार्यसूच्यां सम्मिलिताः आसन्।

बिहारस्य पक्षतः सम्मेलने सहभागिता राज्यस्य सूचनाजनसम्पर्कव्यवस्थां राष्ट्रीयस्तरे विकसिताभिः नवीन-प्रौद्योगिकीभिः, डिजिटलमाध्यमैः संस्थागत-व्यवस्थाभिश्च अधिक-प्रभावीरीत्या संयोजयितुं दिशि महत्त्वपूर्णा आसीत्। सम्मेलने केन्द्रस्य राज्यानां च मध्ये अनुभवानां कार्यप्रणालीना च आदानप्रदानस्य माध्यमेन उत्तमसमन्वयाय क्षमतानिर्माणाय च साझा-मञ्चः प्रदत्तः।

Hindusthan Samachar / Divya Ranjan