रायपुरम्, २५ अगस्तमासः (हि.स.)। परिश्रमेण, लग्नतया प्रतिभया च सफलतां प्राप्तवन्तः कवर्धाविधानसभाक्षेत्रस्य १७१ प्रतिभाशालिनां विद्यार्थिनां कृते अयं दिवसः विशेषः स्मरणीयश्च अभवत्।

कवर्धास्थिते पीजी-महाविद्यालयस्य सभागारे आयोजिते प्रतिभाशालीविद्यार्थी-सम्मानसमारोहे उपमुख्यमन्त्री तथा कवर्धाविधानसभाक्षेत्रस्य विधायकः विजयशर्मा मङ्गलवासरे कक्षादशम्यां द्वादश्यां च ९० प्रतिशतं वा ततोऽधिकं वा अङ्कान् प्राप्तवद्भ्यः विद्यार्थिभ्यः प्रोत्साहनराशेः धनादेशान् प्रतीकचिह्नानि च प्रदाय सम्मानितवान्।

कवर्धायां प्रथमवारम् एतादृशे बृहद्स्तरे आयोजिते अस्मिन् समारोहे वनाञ्चल-क्षेत्रस्य विद्यालयेषु अध्ययनरताः प्रतिभाशालिनः विद्यार्थिनः अपि सम्मानिताः। अनेन प्रयत्नेन ग्रामीण-वनाञ्चलक्षेत्रेषु अध्ययनरतबालकानां प्रतिभायाः परिचयं प्रोत्साहनं च दातुं सन्देशः प्रदत्तः।

समारोहे उपमुख्यमन्त्री विजयशर्मा विद्यार्थिभिः सह आत्मीयतया प्रत्यक्षं संवादं कृतवान्। सः बालकैः सह समयं व्यतीतवान्, तेषां अध्ययनस्य रुचिनां च विषये ज्ञातवान् तथा तेषां प्रश्नानां जिज्ञासानां च विषये चर्चां कृतवान्। सः विद्यार्थिभ्यः प्रेरणाप्रदानि पुस्तकानि अपि प्रदत्तवान्, येन तेषु पठनस्य शिक्षणस्य च प्रवृत्तिः अधिकं वर्धेत। अस्मिन् अवसरे सः विद्यार्थिभिः सह स्वचित्राणि गृहीत्वा तैः सह हर्षमपि सहभागं कृतवान्।

कार्यक्रमस्य सञ्चालिका अनुराधादुबे अपि स्वस्य प्रेरणाप्रदाभिः उत्साहवर्धकाभिश्च उक्तिभिः विद्यार्थिनाम् उत्साहं वर्धितवती। सम्पूर्णे समारोहे विद्यार्थिषु उत्साहस्य हर्षस्य च वातावरणम् आसीत्। सम्माननेन, संवादेन प्रोत्साहनेन च परिपूर्णेन अस्य आयोजनस्य माध्यमेन प्रतिभाशालिनां विद्यार्थिनां स्वप्रतिभां अधिकं विकसितुं तथा भविष्ये महतीः उपलब्धीः प्राप्तुं नूतना ऊर्जा प्राप्ता।

उपमुख्यमन्त्री विजयशर्मा उक्तवान् यत् कवर्धायाः भूमिः प्रतिभाभिः परिपूर्णा अस्ति। अद्य सम्मानिताः एते प्रतिभाशालिनः विद्यार्थी स्वस्य परिश्रमेण, लग्नतया प्रतिभया च अग्रिमकाले नूतनानि शिखराणि प्राप्स्यन्ति। कवर्धायाः एषा प्रतिभा भविष्ये न केवलं जनपदस्य प्रदेशस्य च नाम उज्ज्वलं करिष्यति, अपितु एकदा देशस्य गौरवं भविष्यति।

प्रतिभाशालीविद्यार्थिसम्मानसमारोहे कक्षादशम्यां ९० प्रतिशतं वा ततोऽधिकं वा अङ्कान् प्राप्तवद्भ्यः विद्यार्थिभ्यः पञ्च-पञ्चसहस्ररूप्यकाणां तथा कक्षाद्वादश्यां ९० प्रतिशतं वा ततोऽधिकं वा अङ्कान् प्राप्तवद्भ्यः विद्यार्थिभ्यः दश-दशसहस्ररूप्यकाणां प्रोत्साहनराशेः धनादेशाः प्रदत्ताः। तेन सह सर्वे चयनिताः विद्यार्थिन: प्रतीकचिह्नानि प्रदाय सम्मानिताः।

अस्मिन् अवसरे कृषककल्याणपरिषदः अध्यक्षः सुरेशचन्द्रवंशी, जिलापञ्चायत्-अध्यक्षा ईश्वरीसाहू, उपाध्यक्षा कैलाश-चन्द्रवंशी, जनपदपञ्चायत्सदस्यः राम-कुमारभट्टः, रामकिङ्करवर्मा, निर्मल-द्विवेदी, हरीशलुनिया, जनपदाधिकारी तुलिकाप्रजापतिः, डीएफओ निखिल-अग्रवालः, जनपदपञ्चायतस्य मुख्यकार्य-पालनाधिकारी अभिषेकअग्रवालः इत्येतै: सह जनप्रतिनिधयः, विद्यालयीयविद्यार्थिनः, पालकाः, शिक्षकाः, शालाप्रबन्धसमित्याः अध्यक्षाः च उपस्थिताः आसन्।

Hindusthan Samachar / Divya Ranjan