Enter your Email Address to subscribe to our newsletters
पूर्वसिंहभूमिः, २५ अगस्तमासः (हि.स.)। श्रावणमासस्य अन्तिमे सोमवासरे जमशेदपुरनगरे श्रद्धायाः भक्तेश्च अद्भुतं दृश्यं दृष्टम्। हर हर महादेव सङ्घस्य पक्षतः आयोजितायां भव्यायां भजनसन्ध्यायां नगरस्य विभिन्नेभ्यः क्षेत्रेभ्यः बहुसंख्यकाः श्रद्धालवः समागताः। रात्रेः विलम्बपर्यन्तं भक्तिगीतैः भगवतः भोलेनाथस्य जयघोषैश्च सम्पूर्णं वातावरणं भक्तिमयं जातम्।
कार्यक्रमे प्रसिद्धः भोजपुरीगायकः सांसदश्च मनोजतिवारी मुख्याकर्षणम् आसीत्। मञ्चे आगमनमात्रेण श्रद्धालुभिः तस्य भव्यं स्वागतं कृतम्। मनोजतिवारी भगवतः शिवस्य आराधनासम्बद्धानां भजनानां प्रस्तुतिं कृतवान्, तानि श्रुत्वा श्रद्धालवः दीर्घकालं यावत् आनन्देन नृत्यन्तः आसन्। तस्य गीतानां मध्ये सम्पूर्णः परिसरः “हर हर महादेव”, “बोल बम्” इति जयघोषैः गुञ्जायमानः अभवत्।
श्रावणमासस्य अन्तिमः सोमवासरः इति कारणेन कार्यक्रमं प्रति श्रद्धालूनां विशेषः उत्साहः आसीत्। भजनसन्ध्यायाः समये महिलाः पुरुषाः युवानश्च शिवभजनेषु भक्तिभावेन नृत्यन्तः दृश्यन्ते स्म। अनेके श्रद्धालवः भगवन्तं भोलेनाथं स्मरन्तः सुखस्य, शान्तेः समृद्धेश्च कामनां कृतवन्तः।हर हर महादेव सङ्घस्य सदस्याः अवदन् यत् श्रावणमासस्य अन्तिमे सोमवासरे प्रतिवर्षं श्रद्धालूनां कृते एतादृशाः धार्मिकाः कार्यक्रमाः आयोज्यन्ते। अस्मिन् वर्षेऽपि कार्यक्रमस्य कृते विशेषाः सज्जताः कृताः आसन्। आयोजनस्य समये सुरक्षां व्यवस्थां च निर्वोढुं सङ्घस्य सदस्यैः महत्त्वपूर्णं योगदानं दत्तम्।
भजनसन्ध्यायाः समाप्तिपर्यन्तं श्रद्धालूनाम् उत्साहः अक्षुण्णः अभवत्।
Hindusthan Samachar / Divya Ranjan