Enter your Email Address to subscribe to our newsletters
नाहनम्, 25 अगस्तमासः (हि.स.)।
राज्यस्तरीयस्य वामनद्वादशीमेलापकस्य सफलायोजनस्य विषये अद्य उपायुक्तायाः तथा राज्यस्तरीयवामनद्वादशीमेलसमित्याः अध्यक्षायाः प्रियङ्का वर्मा-महोदयायाः अध्यक्षतायां सभा आयोजिताऽभवत्। सभायां मेलायाः आयोजनसम्बन्धिनीषु विविधव्यवस्थासु विस्तृततया चर्चा कृता।
सभायाः अध्यक्षतां कुर्वती उपायुक्ता तथा मेलासमित्याः अध्यक्षा प्रियङ्का वर्मा-महोदया अवदत् यत् राज्यस्तरीयः वामनद्वादशीमेला सितम्बर-मासस्य २३ दिनाङ्कतः २५ दिनाङ्कपर्यन्तं सराहानगरे आयोजयिष्यते। सा अवदत् यत् मेलायां श्रीवामनभगवतः भव्यशोभायात्रा, क्रीडाप्रतियोगिताः, दङ्गलः तथा सांस्कृतिककार्यक्रमाः मुख्याकर्षणानि भविष्यन्ति।
सा मेलायाः सफलस्य सुचारोश्च आयोजनाय समितीनां गठनस्य निर्देशान् अदात् तथा विभिन्नेभ्यः विभागेभ्यः आवश्यकनिर्देशान् अपि प्रदत्तवती। मेलाकाले विधिव्यवस्थायाः संरक्षणं, विद्युत्-पेयजलव्यवस्थाः, परिवहनं बससेवाश्च, स्वच्छता, अग्निशमनव्यवस्था तथा चिकित्सासुविधाः सुनिश्चितुं सम्बन्धितेभ्यः विभागेभ्यः समयबद्धरूपेण सज्जताः पूर्णाः कर्तुं निर्देशाः प्रदत्ताः।
उपायुक्ता अवदत् यत् मेलायां बहुसंख्यकाः श्रद्धालवः जनाश्च आगमिष्यन्तीति सम्भावनां दृष्ट्वा सर्वे विभागाः परस्परसमन्वयेन कार्यं कुर्वन्तु तथा जनानां सुविधा सुरक्षा च सर्वोच्चप्राथमिकतां प्राप्नुयाताम्।
---------------
Hindusthan Samachar / Dheeraj Maithani