नवदिल्ली, २६ अगस्तमासः (हि.स.)। भारतीयजनतापार्टी इत्यस्याः सांसद् बांसुरी स्वराजः विपक्षनेता राहुलगान्धिनः “पितृसत्तां भङ्क्त” इति वक्तव्यं प्रति काङ्ग्रेस्-पक्षं तीव्रतया लक्ष्यीकृतवती। भाजपया आरोपितं यत् राहुलगान्धी महिलानां सम्मानस्य विषये द्वैधवृत्तिम् आश्रयन्ति तथा तस्य वक्तव्यं केवलं राजनैतिकाडम्बरम् अस्ति।

भाजपया बुधवासरे आयोजितायां पत्रकारवार्तायां सांसद् बांसुरी स्वराजः उक्तवती यत् राहुलगान्धिना अगस्त-मासस्य २२ दिनाङ्के पुणेनगरस्य मञ्चात् “पितृसत्तां भङ्क्त” इति घोषः कृतः, किन्तु स्वकीयायामेव पक्षमध्ये विद्यमानायां “राजनैतिक-पितृसत्तायाम्” कदापि प्रश्नः न उत्थापितः। सा उक्तवती यत् राहुलगान्धिनः समीपे न कश्चित् दूरदर्शी दृष्टिकोणः अस्ति, न च कश्चित् सकारात्मकः कार्यसूची-विषयः; अतः ते केवलं सामाजिकमाध्यमेषु वक्तव्यानि प्रयच्छन्ति।

सा काङ्ग्रेस्-पक्षस्य महिलाविरोधी-मानसिकतायाः आरोपं कुर्वती उक्तवती यत् यदा भाजपासांसदायै कङ्गनारनौत इत्यस्यै मण्डीतः निर्वाचनस्य टिकटं प्राप्तम्, तदा काङ्ग्रेस-नेत्री सुप्रिया श्रीनेत् इत्यस्याः सामाजिकमाध्यमतः तस्याः विरुद्धम् अभद्रा टिप्पणी कृता, किन्तु राहुलगान्धिना तस्यां विषये कापि आपत्तिः न प्रकटिता। तथैव रणदीपसुरजेवाला-द्वारा हेमामालिनीं प्रति कृता टिप्पणी तथा अधीररञ्जनचौधरी-द्वारा राष्ट्रपतिं द्रौपदीमुर्मुं ‘राष्ट्रपत्नी’ इति सम्बोधनं प्रति अपि काङ्ग्रेस-नेतृत्वं मौनमेव आसीत्।

भाजपासांसदा प्रश्नं कृतवती यत् यदि राहुलगान्धी वास्तवमेव पितृसत्तां समाप्तुं इच्छन्ति, तर्हि काङ्ग्रेस-शासितयोः कर्णाटक-हिमाचलप्रदेशयोः मन्त्री-मण्डलयोः एकापि महिला-मन्त्री किमर्थं नास्ति। सा आरोपितवती यत् महिला-सशक्तीकरणं काङ्ग्रेस्-पक्षस्य कृते केवलं राजनैतिकघोषणामात्रम् अस्ति तथा च एतस्याः एव मानसिकतायाः कारणात् तेन ‘नारीशक्तिवन्दन-अधिनियमस्य’ विरोधः कृतः।

बांसुरी स्वराजः शाहबानो-प्रकरणस्य त्रितलाक-न्यायस्य च उल्लेखं कृत्वा उक्तवती यत् काङ्ग्रेस-पक्षेण सदैव महिलानाम् अधिकाराणाम् अपेक्षया तुष्टीकरणस्य राजनीतिः प्राथमिकतया स्वीकृता। सा राहुलगान्धिनः अपृच्छत् यत् यदि ते वास्तवमेव महिलानाम् अधिकाराणां समर्थकाः सन्ति, तर्हि एतेषु विषयेषु काङ्ग्रेस्-पक्षस्य पक्षः कः आसीत्।

सा काङ्ग्रेस्-पक्षस्य ‘वन्देमातरम्’ इत्यस्य विषये स्वीकृतं निर्णयमपि लक्ष्यीकृतवती तथा उक्तवती यत् यदि राहुलगान्धी वास्तवमेव सर्वप्रकारस्य पितृसत्तायाः विरोधं कर्तुम् इच्छन्ति, तर्हि ते सम्पूर्णं ‘वन्देमातरम्’ गीतं गेयं कुर्वन्तु। बांसुरी स्वराजः आरोपितवती यत् काङ्ग्रेस-पक्षेण तुष्टीकरणस्य राजनीतेः कारणात् ‘वन्देमातरम्’ इत्यस्य गौरवं त्यक्तम्।

Hindusthan Samachar / Divya Ranjan