कानपुरम्, 26 अगस्तमासः (हि.स.)।रक्षाबन्धनपर्वे भगिनीभ्यः निःशुल्का बसयात्रा, ‘लोकमाता अहिल्याबाई मातृशक्तियात्रा’ योजनायाः शुभारम्भः।

रक्षाबन्धनपर्वणि भगिनीनां भ्रातृगृहं प्रति गमनागमने कष्टं न भवेत्, इति उद्दिश्य निःशुल्कबसयात्रायाः सुविधा प्रदत्ता अस्ति। षष्टिवर्षाधिकवयस्कानां मातॄणां भगिनीनां च कृते ‘लोकमाता अहिल्याबाई मातृशक्तियात्रा’ इति योजनायाः प्रारम्भः अपि मातृशक्तेः सम्मानस्य दिशि महत्त्वपूर्णं पदम् अस्ति। एताः उक्तयः बुधवासरे सीएसए-संस्थाने आयोजिते कार्यक्रमे मन्त्रिमण्डलस्य मन्त्री राकेशसचानः उक्तवान्।

रक्षाबन्धनस्य अवसरं दृष्ट्वा प्रदेशसर्वकारस्य पक्षतः महिलाभ्यः प्रदीयमानायाः निःशुल्कबसयात्रायाः सुविधायाः तथा ‘लोकमाता अहिल्याबाई मातृशक्तियात्रा’ योजनायाः शुभारम्भस्य सम्बन्धे अद्य सीएसए-संस्थानस्य सभागारे कार्यक्रमः आयोजितः। अस्मिन् कार्यक्रमे बहुसंख्याकाः महिलाः सहभागितां कृतवत्यः। लखनऊ-नगरे आयोजितस्य मुख्यमन्त्रिणः योगी आदित्यनाथस्य कार्यक्रमस्य सजीवप्रसारणम् अपि कृतम्।

रक्षाबन्धनस्य दृष्ट्या प्रदेशसर्वकारस्य बसयानेषु मातॄणां भगिनीनां पुत्रीणां च सहयात्रिणा सह निःशुल्कयात्रायाः सुविधा अगस्तमासस्य २७ दिनाङ्के प्रातः षड्वादनात् अगस्तमासस्य २९ दिनाङ्कस्य मध्यरात्रौ द्वादशवादनपर्यन्तं प्राप्स्यते।

मन्त्री राकेशसचानः उक्तवान् यत् षष्टिवर्षाधिकवयस्काः महिलाः ‘लोकमाता अहिल्याबाई मातृशक्तियात्रा’ योजनायाः अन्तर्गतं प्रदेशे सञ्चाल्यमानेषु सर्वकारीयेषु बसयानेषु निःशुल्कयात्रां कर्तुं शक्नुवन्ति। सः उक्तवान् यत् महिलानां सुविधा, सुरक्षा, सम्मानः स्वावलम्बनं च ध्यायित्वा सर्वकारः निरन्तरं निर्णयान् स्वीकरोति।

कार्यक्रमे महिलाभिः मन्त्री राकेशसचानस्य हस्ते रक्षासूत्रं बद्धम्। मन्त्री ताभ्यः साटिकां मिष्टान्नं च उपाहरूपेण प्रदत्तवान्। कार्यक्रमे सम्मिलितेभ्यः प्रायः ११०० महिलाभ्यः अपि साटिका मिष्टान्नं च प्रदत्तम्। महिलाभिः निःशुल्कबसयात्रायाः सुविधां तथा उपहारं प्राप्त्वा सर्वकारस्य प्रति कृतज्ञता प्रकटिता।

कार्यक्रमे कल्याणपुरस्य विधायिका नीलिमा कटियार, विधानपरिषदः सदस्यः अरुण पाठकः, जिलापञ्चायतस्य अध्यक्षः/प्रशासकः स्वप्निल वरुणः, जिलाधिकारी जितेन्द्रप्रतापसिंहः, मुख्यविकासाधिकारी अभिनव जे. जैनः इत्यादयः अधिकारीणः उपस्थिताः आसन्।

------------------

Hindusthan Samachar / Dheeraj Maithani