लोकमाता-अहल्याबाई-मातृशक्तियात्रायोजनायाः शुभारम्भः, षष्टिवर्षाधिकवयस्काभ्यः महिलाभ्यः आजीवनं निःशुल्कबसयात्रासुविधा

प्रयागराजः, २६ अगस्तमासः। “नारीणां सम्मानः केवलं घोषवाक्यं न, अपितु अस्माकं सर्वोच्चा प्राथमिकता प्रतिबद्धता च अस्ति।” इति औद्योगिकविकासमन्त्री नन्दगोपालगुप्तः नन्दी बुधवासरे जिलापञ्चायतसभागारे लोकमाता-अहल्याबाई-मातृशक्तियात्रायोजनायाः शुभारम्भावसरे उक्तवान्। सः उक्तवान् यत् रक्षाबन्धनस्य पावने पर्वणि प्रदेशस्य मातृभ्यः भगिनीभ्यश्च एतां सुविधां प्रदाय तासां सम्मानस्य स्वाभिमानस्य च नूतना उन्नतिः कृता अस्ति।

जिलापञ्चायतसभागारे मुख्यमन्त्री योगी आदित्यनाथस्य लखनऊनगरे आयोजितस्य कार्यक्रमस्य सजीवप्रसारणं कृतम्। अस्मिन् अवसरे जलशक्तिविभागस्य प्रभारीमन्त्री स्वतन्त्रदेवसिंहः, औद्योगिकविकासमन्त्री नन्दगोपालगुप्तः नन्दी, महापौरः गणेशकिशोरवानी, नगरोत्तरीयविधायकः हर्षवर्धनवाजपेयी, भाजपामहानगराध्यक्षः सञ्जयगुप्तः, गङ्गापाराध्यक्षः निर्मलापासवानः, यमुनापाराध्यक्षः राजेशशुक्लः, जिलाधिकारी मनीषकुमारवर्मा, मुख्यविकासाधिकारी हर्षिकासिंहः इत्यादयः बहुसंख्याकाः मातरः भगिन्यश्च उपस्थिताः आसन्।

अद्य आरभ्य आजीवनं प्राप्स्यते निःशुल्कयात्रासुविधा

प्रभारीमन्त्री स्वतन्त्रदेवसिंहः उक्तवान् यत् अयं दिवसः उत्तरप्रदेशाय ऐतिहासिकः अस्ति। मुख्यमन्त्री योगी आदित्यनाथेन लोकमाता-अहल्याबाई-मातृशक्तियात्रायोजनायाः शुभारम्भं कृत्वा सा प्रदेशस्य मातृभ्यः भगिनीभ्यश्च समर्पिता अस्ति। सः उक्तवान् यत् षष्टिवर्षाधिकवयस्काभ्यः महिलाभ्यः उत्तरप्रदेशपरिवहननिगमस्य बसयानेषु आजीवनं निःशुल्कयात्रासुविधा प्राप्स्यते।

सः उक्तवान् यत् एतया सुविधया वृद्धाः महिलाः तीर्थाटनस्य साथमेव स्वकीयैः नातिभिः ज्ञातिभिश्च मिलितुं सुगमतया यात्रां कर्तुं शक्नुवन्ति। निःशुल्कयात्रायै आधारपत्रं, मतदातृपरिचयपत्रं अथवा परिवहननिगमेन प्रदीयमानं स्मार्टपत्रं प्रयोजयितुं शक्यते।

रक्षाबन्धनपर्वणि त्रिदिनं सहयात्रिणा सहापि निःशुल्कयात्रा

रक्षाबन्धनस्य अवसरे २७ अगस्ततः २९ अगस्तपर्यन्तं मातरः, भगिन्यः, दुहितरश्च एकेन सहयात्रिणा सह उत्तरप्रदेशपरिवहननिगमस्य बसयानेषु निःशुल्कं यात्रां कर्तुं शक्नुवन्ति। अस्याः विशेषसुविधायाः उद्देश्यं पर्वणः समये महिलाः स्वकीयैः मातृगृहस्थैः नातिभिः च सुगमतया सम्पर्कं कर्तुं स्वस्थानात् तत्र गन्तुं च समर्थाः भवन्तु इति अस्ति।

लोकमाता-अहल्याबाईनाम्ना योजनायाः प्रारम्भः गौरवस्य विषयः : नन्दी

मन्त्री नन्दगोपालगुप्तः नन्दी उक्तवान् यत् लोकमाता अहल्याबाई होल्करेन सेवायाः सुशासनस्य लोककल्याणस्य च अनेकानि उदाहरणानि स्थापितानि। तस्याः नाम्ना प्रारब्धा इयं योजना ज्येष्ठानां मातॄणां भगिनीनां च सम्मानाय समर्पिता अस्ति। सः उक्तवान् यत् एषा सुविधा केवलं कस्यचित् पर्वणः यावत् सीमिता नास्ति, अपितु षष्टिवर्षाधिकवयस्काभ्यः महिलाभ्यः प्रतिदिनं आजीवनं च उपलब्धा भविष्यति।

सर्वकारस्य उद्देश्यम् अस्ति यत् मातृशक्तेः सम्मानं कृत्वा ताः आर्थिकरूपेण अपि सशक्ताः क्रियन्ताम्। सः उक्तवान् यत् सर्वकारः “सर्वेषां सहकारः, सर्वेषां विकासः, सर्वेषां विश्वासः” इति सिद्धान्तेन कार्यं करोति।

मन्त्री नन्दी प्रभारीमन्त्रिणश्च मनिबन्धे महिलाभिः रक्षासूत्रं बन्धितम्

कार्यक्रमस्य समये महिलाभिः प्रभारीमन्त्रिणः स्वतन्त्रदेवसिंहस्य औद्योगिकविकासमन्त्रिणः नन्दगोपालगुप्तस्य नन्दिनश्च मनिबन्धयोः रक्षासूत्रं बन्धितम्। मन्त्रिभ्यामपि मातृशक्तेः सम्मानं कुर्वद्भ्यां रक्षाबन्धनस्य शुभकामनाः प्रदत्ताः।

कार्यक्रमे क्षेत्रीयप्रबन्धकः मार्गपरिवहनस्य रवीन्द्रकुमारसिंहः, अपरजिलाधिकारी आपूर्तिविभागस्य सञ्जीवकुमारशाक्यः, जिलाविकासाधिकारी जीपीकुशवाहः, श्रमरोजगारस्य उपायुक्तः, सिविललाइन्सस्य सहायकक्षेत्रीयप्रबन्धकः जयकरणप्रसादः इत्यादयः परिवहनविभागस्य अधिकारिणः कर्मचारिणश्च बहुसंख्याकाः महिलाश्च उपस्थिताः आसन्।

Hindusthan Samachar / Dheeraj Maithani