Enter your Email Address to subscribe to our newsletters
देहरादूनम्, 27 अगस्तमासः (हि.स.)। राज्यपालः लेफ्टिनेन्ट् जनरल् गुरमीतसिंहः (सेवानिवृत्तः) तथा मुख्यमन्त्री पुष्करसिंहधामी च प्रदेशवासिभ्यः रक्षाबन्धनपर्वणः शुभकामनाः प्रदत्तवन्तौ।
रक्षाबन्धनपर्वणः पूर्वसन्ध्यायां राज्यपालः स्वसन्देशे अवदत् यत् रक्षाबन्धनं भ्रातृभगिन्योः पवित्रसम्बन्धस्य, अखण्डस्नेहस्य विश्वासस्य च प्रतीकं पर्व अस्ति। एतत् पर्व पारिवारिकसम्बन्धान् सुदृढान् कर्तुं सहैव समाजे प्रेम्णः, सौहार्दस्य परस्परभ्रातृत्वस्य च भावनामपि सुदृढं करोति।
सः अवदत् यत् रक्षाबन्धनं मातृशक्तेः सम्मानस्य स्नेहस्य च पर्व अपि अस्ति। भगिन्यः परिवारे स्नेहस्य, संस्कारस्य संवेदनानां च दृढं आधारभूतं भवन्ति। तासां स्नेहः, आशीर्वादः आत्मीयता च परिवाराय समाजाय च नूतनां शक्तिं दिशां च प्रददाति। राज्यपालः अस्मिन् अवसरे प्रदेशवासिनां सुखस्य, समृद्धेः कल्याणस्य च कामनां कृतवान्।
मुख्यमन्त्रिणा प्रेषिते स्वसन्देशे उक्तं यत् एतत् भ्रातृभगिन्योः अखण्डप्रेम्णः, विश्वासस्य, स्नेहस्य, समर्पणस्य सुरक्षासङ्कल्पस्य च पावनं पर्व अस्ति। एतत् पर्व समृद्धाभिः सांस्कृतिकपरम्पराभिः सह नारीसम्मानस्य सामाजिकसौहार्दस्य च भावनामपि सुदृढीकरोति।
धामी अवदत् यत् रक्षाबन्धनं महिलासु आदरस्य सुरक्षाभावनायाः च सुदृढीकरणेन सह तासां सम्मानसम्बद्धं पर्व अपि अस्ति। महिलानां सशक्तीकरणं विना समृद्धस्य उत्तराखण्डस्य कल्पना पूर्णा भवितुं न शक्नोति। सः प्रदेशवासिभ्यः महिलानां सशक्तीकरणाय तासां प्रगत्यै च आदर्शसमाजस्य निर्माणे सहयोगं कर्तुम् आह्वानं कृतवान्।
सः अवदत् यत् मातृशक्तेः सम्मानः सशक्तीकरणं च राज्यसर्वकारस्य सर्वोच्चप्राथमिकतासु अन्तर्भवति। प्रधानमन्त्री नरेन्द्रमोदिनः मार्गदर्शने महिलानां सम्मानस्य, सुरक्षायाः आत्मनिर्भरतायाश्च कृते अनेकाः महत्त्वपूर्णाः पहलाः कृताः सन्ति। उत्तराखण्डे महिलाभ्यः स्वरोजगारस्य, उद्यमितायाः रोजगारस्य च अवसरान् प्रदाय शासकीयसेवासु त्रिंशत्प्रतिशतं क्षैतिजआरक्षणं प्रदत्तम् अस्ति। प्रदेशस्य लक्षशः महिलाः स्वयं सहायता समूहैः सह सम्बद्धाः भूत्वा आत्मनिर्भरतायाः दिशि अग्रे वर्धन्ते।
मुख्यमन्त्री अवदत् यत् रक्षाबन्धनस्य अवसरे अष्टाविंशतितमे नवविंशतितमे च अगस्तमासस्य दिने प्रदेशस्य महिलाभ्यः उत्तराखण्डपरिवहननिगमस्य बसयानेषु निःशुल्कयात्रायाः सुविधा प्रदत्ता अस्ति। सः प्रदेशवासिभ्यः महिलानां सम्मानस्य, सुरक्षायाः सशक्तीकरणस्य च कृते मिलित्वा कार्यं कर्तुम् आह्वानं कृतवान्।
-----------------
Hindusthan Samachar / Dheeraj Maithani