श्रीनगरम्, २८ अगस्तमासः (हि.स.)। वार्षिकी अमरनाथयात्रा आध्यात्मिक-समापनस्य दिशि अग्रसरति। शुक्रवासरे पवित्रा छडीमुबारक् (पवित्रा गदा) पञ्चतरिणीतः पवित्रगुहां प्रति प्रस्थिता। अयं तीर्थयात्रायाः अन्तिमः सर्वाधिकपवित्रश्च चरणः अस्ति। छडीमुबारक्या सह राज्यविपदाप्रतिसाद-बलस्य, जम्मू-कश्मीर-सशस्त्र-आरक्षक-बलस्य, राष्ट्रीयविपदाप्रतिसाद-बलस्य, केन्द्रीया-रक्षितारक्षकबलस्य, भारत-तिब्बतसीमा-आरक्षक-बलस्य च पर्वत-उद्धारदलानि गच्छन्ति। विशेषोद्धार-दलानां संयुक्त-नियोजनस्य कारणेन तीर्थयात्रायाः अन्तिमः चरणः सुरक्षितरूपेण सु-व्यवस्थितरूपेण च सम्पन्नः भवेत् इति सुनिश्चितं क्रियते, यतः मार्गे उच्चप्रदेशीयानि दुर्गमानि च क्षेत्राणि सन्ति।

पवित्रगुहायां वार्षिकतीर्थयात्रायाः समापन-सम्बद्धाः पारम्परिकाः धार्मिकाः विधयः सम्पादयिष्यन्ते। ततः सामूहिक-प्रार्थना भक्तिभावपूर्णाः च कार्यक्रमाः भविष्यन्ति। पवित्रगुहायां छडीमुबारक्-गदायाः आगमनस्य महत् धार्मिकं महत्त्वम् अस्ति। पारम्परिकरूपेण च तत् वार्षिक-श्रीअमरनाथतीर्थयात्रायाः समापनस्य प्रतीकम् अस्ति।

अनेन लक्षाधिकतीर्थयात्रिणां सप्ताहपर्यन्तं प्रवृत्ता भक्तिः, श्रद्धा, आध्यात्मिकयात्रा च पूर्णतां प्राप्नोति। पवित्रगदायाः पवित्रगुहां प्रति प्रस्थानस्य सहैव श्रीअमरनाथ-यात्रा-२०२६ भव्यस्य आध्यात्मिक-समापनस्य दिशि अग्रसरति। सुरक्षाबलानि, उद्धारकर्मचारिणः नागरिकप्रशासनं च अन्तिमधार्मिकविधीनां सुरक्षितरूपेण सम्पादनाय परस्परं समन्वयेन कार्यं कुर्वन्ति।

Hindusthan Samachar / Divya Ranjan