कोलकाता, २८ अगस्तमासः (हि.स.)। संस्कृतदिवसस्य अवसरे पश्चिमबङ्गस्य मुख्यमन्त्री शुभेन्दु-अधिकारी सामाजिकसन्देशमाध्यमस्य ‘एक्स’-मञ्चे संस्कृतभाषायाः महत्त्वं रेखाङ्कयन् विशेषं सन्देशं लिखितवान्। तेन संस्कृतं केवलं भाषा न, अपि तु भारतीयसंस्कृतेः, सभ्यतायाः, दर्शनस्य, ज्ञानस्य च समृद्धा परम्परा इति प्रतिपादितम्।

मुख्यमन्त्री स्वकीयसन्देशे अवदत् यत् वेदेभ्यः, उपनिषत्सु, रामायणात् महाभारतात् च आरभ्य गणितं, ज्योतिषविज्ञानं, चिकित्साशास्त्रं च यावत् भारतीयज्ञानपरम्परायाः विविधेषु क्षेत्रेषु संस्कृतस्य महत्त्वपूर्णं योगदानम् अस्ति।

तेन संस्कृतस्य प्रसिद्धस्य वाक्यस्य “यत्र विश्वं भवत्येकनीडम्” इत्यस्य उल्लेखं कृत्वा तस्य अर्थः अपि प्रतिपादितः— यत्र सम्पूर्णं विश्वम् एकस्मिन् नीडे, अर्थात् एकस्मिन् परिवारे आश्रये वा, परिणमति। मुख्यमन्त्री अवदत् यत् संस्कृतभाषया प्रसारितः अयं विचारः अद्यापि प्रतिध्वन्यते।

शुभेन्दु-अधिकारी संस्कृतदिवसस्य अवसरे नववंशं प्राचीनभाषया अनया सह संयोजयितुम् आह्वानं कृतवान्। सः अवदत् यत् अद्यस्मिन् विशेषे दिने सर्वैः अस्याः प्राचीनायाः, समृद्धायाः, ज्ञानप्रधानायाश्च भाषायाः नववंशं प्रति प्रसारणस्य सङ्कल्पः करणीयः।

Hindusthan Samachar / Divya Ranjan