Enter your Email Address to subscribe to our newsletters
रायपुरम्, 28 अगस्तमासः (हि.स.)।
छत्तीसगढप्रदेशस्य काङ्ग्रेस-अध्यक्षः दीपकबैजः शुक्रवासरे समाननागरिकसंहितायाः अर्थात् यूसीसी-इत्यस्य तीव्रं विरोधं कुर्वन् आरोपितवान् यत् एषा संहिता आदिवासीसमुदायस्य विरुद्धा अस्ति। अनया आदिवासिनां हितानां अधिकाराणां च हननं भविष्यति। सः समाननागरिकसंहितां आदिवासिनां विरुद्धं क्रियमाणं षड्यन्त्रम् इति वर्णितवान्।
तत्रैव सः आरोपितवान् यत् भाजपासर्वकारः विद्युत्-व्यवस्थां निजी-कम्पनीनां हस्तेषु समर्पयितुं प्रयतते। उल्लेखनीयमस्ति यत् छत्तीसगढे समाननागरिकसंहितायाः कार्यान्वयनाय प्रक्रिया तीव्रतया प्रचलति, किन्तु मुख्यविपक्षीदलं काङ्ग्रेसः समाननागरिकसंहितायाः विरोधे अस्ति। काङ्ग्रेसदलं समाननागरिकसंहितां न स्वीकुरुते।
तत्रैव प्रदेशे विद्युत्-वितरणे निजी-सहभागितायाः वार्तया अपि राजनीतिकवातावरणं उष्णं जातम् अस्ति। काङ्ग्रेसस्य आरोपः अस्ति यत् सर्वकारः विद्युत्-कम्पनीं निजी-हस्तेषु विक्रेतुं प्रयतते।
उल्लेखनीयमस्ति यत् सर्वकारस्य पक्षतः प्रदेशे समाननागरिकसंहितायाः कार्यान्वयनाय उच्चस्तरीयसमितिः गठिता अस्ति। समित्या राजधानीनगरे समाजप्रमुखैः प्रबुद्धजनैः च सह अस्मिन् विषये महत्त्वपूर्णा बैठकः कृता। तत्रैव सर्वकारस्य पक्षतः इदमपि स्पष्टं कृतम् अस्ति यत् आदिवासीवर्गः समाननागरिकसंहितायाः परिधेः बहिः स्थापितः भविष्यति।
छत्तीसगढे विद्युत्-वितरणे निजी-सहभागितायाः विषये दीपकबैजः उक्तवान् यत् एका निजी-कम्पनी राजधानीनगरे विद्युत्-वितरणाय अनुज्ञापत्रं याचितवती अस्ति। अनेन स्पष्टं भवति यत् सर्वकारः निजी-कम्पनीभ्यः अनुज्ञापत्रं प्रदाय विद्युत्-वितरणस्य माध्यमेन उपभोक्तृभ्यः महतीं धनराशिं वसूलयितुं प्रयतते। काङ्ग्रेसः अस्य सर्वेषु मोर्चेषु विरोधं करिष्यति।
टाटा-कम्पन्या राजधानीक्षेत्रे विद्युत्-वितरणाय अनुज्ञापत्रस्य अनुमतिः याचिता अस्ति।
---------------
Hindusthan Samachar / Dheeraj Maithani