गुवाहाटी, २८ अगस्तमासः (हि.स.)। राष्ट्रियस्वयंसेवकसङ्घस्य द्वारा पाण्डुनगरस्य सनातनदेवालये हर्षोल्ला-सेन रक्षाबन्धनोत्सवः समाचरितः। अस्मिन् पावने अवसरे सनातनसंस्कृतेः भ्रातृत्वस्य च अनन्यः सन्देशः प्रदत्तः। तत्र उपस्थितैः जनैः परस्परं मनिबन्धे रक्षासूत्रं बन्धयित्वा परस्परप्रेम सौहार्दं च सुदृढीकृतम्।

कार्यक्रमे मुख्यातिथिरूपेण गौहाटी-उच्चन्यायालयस्य अधिवक्ता हितेशसैकिया उपस्थितः आसीत्।

कार्यक्रमस्य समये सः रक्षाबन्धनस्य ऐतिहासिकं सामाजिकं च महत्त्वं प्रकाशयन् समाजे एकतां स्थापयितुं आह्वानं कृतवान्। सः अवदत् यत् एतादृशाः उत्सवाः अस्माकं प्राचीनान् सांस्कृतिक-मूल्यान् जीवन्तं स्थापयितुं सहैव समाजं सङ्गठितं कर्तुं महत्त्वपूर्णां भूमिकां निर्वहन्ति।

अस्मिन् कार्यक्रमे महानगरस्य बालकप्रमुखः रातुलडेकः, चन्दनपालः तथा अन्ये अनेकाः गणमान्यजनाः उपस्थिताः आसन्। अस्मिन् अवसरे विभिन्न-वयोगटानां जनाः उत्साहेन सहभागितां कृतवन्तः।

Hindusthan Samachar / Divya Ranjan