भुवनेश्वरम्, अगस्तमासस्य २९ दिनाङ्कः (हि.स.)। ओडिशाराज्यस्य विपक्षनेता बीजूजनतादलस्य अध्यक्षश्च नवीन-पटनायकः राज्यस्य सर्वान् भाजपा-सांसदान् माइन्स एण्ड मिनरल्स संशोधनविधेयकम्, २०२६ इत्यस्य विषये स्वकीयं मतं पुनर्विचारयितुं तथा च संशोधनं प्रत्याहर्तुं आग्रहं कर्तुं प्रार्थितवान्।शनिवासरे ओडिशाराज्यस्य भाजपा-सांसदेभ्यः लिखिते पत्रे पटनायकः अगस्तमासस्य १३ दिनाङ्कं लोकसभायां विधेयकस्य पारितस्य दिनं “ओडिशायै कृष्णदिवसः” इति निरूपितवान्। सः उक्तवान् यत् भाजपासांसदानां समर्थनात् एतत् विधेयकं लोकसभायां पारितम्, यद्यपि अस्य प्रावधानानां राज्ये तत्रत्यजनानां च उपरि दूरगामी प्रभावः भवितुं शक्नोति।

पटनायकः उक्तवान् यत् संसदः भारतीयलोकतन्त्रस्य सर्वोच्चं मन्दिरम् अस्ति तथा च संसद्सदस्यत्वेन ओडिशाराज्यस्य सांसदानां दायित्वम् अस्ति यत् ते राज्यजनानां हितानां स्वररूपेण कार्यं कुर्युः। भाजपासांसदैः विधेयकस्य पक्षे मतदानं कृतमिति विषये चिन्तां प्रकटयन् सः उक्तवान् यत् जनाः तेषु विश्वासं कृत्वा तान् संसदं प्रेषितवन्तः।

बीजद-अध्यक्षः लोकसभायां विधेयकस्य पारितीकरणस्य प्रक्रियायाः विषये अपि प्रश्नम् उत्थापितवान्। सः कथनम् अकरोत् यत् दूरगामीप्रभावयुक्तानि प्रावधानानि सन्ति तथापि विधेयकस्य विषये लोकसभायां दश निमेषेभ्यः अपि न्यूनकालपर्यन्तं चर्चा अभवत्।

पटनायकः उक्तवान् यत् एतेन विधिना ओडिशाराज्यं सर्वाधिकं प्रभावितेषु राज्येषु अन्यतमं भविष्यति। सः उक्तवान् यत् देशस्य समग्रे खनिजभण्डारे ओडिशा-राज्यस्य भागः प्रायः चतुश्चत्वारिंशत् प्रतिशतं अस्ति तथा च राज्यं दशकेभ्यः देशस्य इस्पात-विद्युत्-खनन-मूलभूत-संरचनाविकासेषु स्वकीयानां खनिज-संसाधनानां माध्यमेन महत्त्वपूर्णं योगदानं ददाति स्म।

सः कथनम् अकरोत् यत् एतेन संशोधनेन ओडिशाराज्यस्य प्रतिवर्षं भवितुमर्हत् अनुमानितं हानिः द्वादशसहस्रकोटि-रूप्यकेभ्यः अधिका भवितुं शक्नोति, या कालेन सह लक्षकोटि-रूप्यकपर्यन्तं प्राप्तुं शक्नोति। पटनायकः एतदपि आरोपितवान् यत् एतेन संशोधनेन राज्यस्य स्वकीयेषु खनिजसंसाधनेषु खनिजसमृद्धासु भूमिषु च राज्यसर्वकारस्य नियन्त्रणं दुर्बलं कृतम् अस्ति।

सः उक्तवान् यत् अस्य विधेः प्रभावः ओडिशाराज्यस्य बालकानां यूनां च भविष्ये अपि भविष्यति, यतः तेषां भविष्यं राज्यस्य संसाधनैः तेभ्यः उत्पद्यमानैः अवसरैश्च सम्बद्धम् अस्ति। तेन सह खननकारणात् प्रदूषणं, विस्थापनम्, पर्यावरणस्य क्षयम् अन्याः कठिनताश्च अनुभवन्तां जनानां हितानामपि उल्लेखः कृतः।

पटनायकः भाजपासांसदान् प्रार्थितवान् यत् ते स्वान्तरात्मनः वाणीं शृण्वन्तु तथा च ओडिशाराज्यस्य भाविवंशानां हितानां विषये विचारं कुर्वन्तु। सः तान् एएमडीआर-अधिनियमस्य तादृशं संशोधनं प्रत्याहर्तुं तथा च तस्य विरोधं कर्तुम् आग्रहं कृतवान्, येन तस्य मते राज्यसर्वकारस्य शक्तयः प्रभाविताः भवन्ति।

सः उक्तवान् यत् इतिहासः तानेव जनान् स्मरति सम्मानयति च, ये स्वजनैः तेषां संसाधनैः सह कृतस्य अन्यायस्य विरुद्धं स्वरम् उत्थापयन्ति। पटनायकः भाजपासांसदेभ्यः उक्तवान् यत् एषः तेषां कृते ऐतिहासिकः निर्णायकक्षणः अस्ति, यत्र तैः एतत् निर्णेतव्यं यत् ते तस्य राज्यस्य जनतायाश्च हिताय स्थिताः भविष्यन्ति अथवा न, यया तेषु विश्वासं कृत्वा ते स्वप्रतिनिधित्वाय लोकसभां प्रेषिताः।

पत्रस्य अन्ते पटनायकः उक्तवान्— “अहं एतत् निर्णयं भवतां विवेकस्य उपरि त्यजामि।”

Hindusthan Samachar / Divya Ranjan