रामगढ़म्, 29 अगस्तमासः (हि.स.)।

रामगढे शनिवासरे राष्ट्रियक्रीडादिवसस्य शुभावसरे जिलाप्रशासनेन ‘मुक्तक्रासकण्ट्रीप्रतियोगिता २०२६’ इत्यस्य आयोजनं कृतम्। अस्यां प्रतियोगितायां जिलाधिकारी ऋतुराजः स्वयमेव धावित्वा क्रीडकानाम् उत्साहं वर्धितवान्।

प्रतियोगितायाः औपचारिकः शुभारम्भः पुरुषवर्गस्य कृते पटेलचौकतः, महिलावर्गस्य कृते छावणी-फुटबाल-क्रीडाङ्गणतः जिलाधिकारी ऋतुराजेन हरितध्वजं प्रदर्श्य कृतः। अस्मिन् अवसरे जिलाधिकारी केवलं हरितध्वजं न प्रदर्शितवान्, अपितु स्वयं धावकैः सह धावने भागमपि गृहीतवान् तथा क्रीडकानां मनोबलं उत्साहं च वर्धितवान्।

अवसरे जिलाधिकारी ऋतुराजः अवदत् यत् क्रीडाः अस्माकं शारीरिकमानसिकविकासाय अत्यन्तम् आवश्यकाः सन्ति। रामगढजनपदे प्रतिभानां कापि न्यूनता नास्ति। जिलाप्रशासनं युवभ्यः क्रीडाक्षेत्रे सर्वसम्भवसुविधां मञ्चं च प्रदातुं प्रतिबद्धम् अस्ति। अद्य आयोजितस्य सफलकार्यक्रमस्य कृते सर्वे प्रतिभागिनः विजेतारः क्रीडकाः च अभिनन्दनार्हाः सन्ति।

समारोहस्य समये जिलाप्रशासनस्य वरिष्ठाः अधिकारीगणाः, क्रीडाधिकारी, पुलिसबलस्य जवानाः तथा बहुसंख्याकाः क्रीडाप्रेमिणः सामान्यनागरिकाश्च उपस्थिताः आसन्।

---------------

Hindusthan Samachar / Dheeraj Maithani