धर्मशाला, 29 अगस्तमासः (हि.स.)।

मुख्यमन्त्री ठाकुरसुखविन्दरसिंहसुक्खुः अवदत् यत् जनानां कृते स्वच्छं सुरक्षितं च पेयजलं उपलब्धं कर्तुं देहराक्षेत्रे हिमाचलप्रदेशस्य प्रथमां ओजोन-आधारितां पेयजल-शोधनपरियोजनां स्थापयितुं कार्यं प्रचलति। राज्यशासनेन अस्यै परियोजनायै ४६ कोटिरूप्यकाणां धनराशिः आवण्टिता अस्ति। शनिवासरे काङ्गडाजनपदे देहराविधानसभाक्षेत्रस्य बड्डलथोरे जनसभां सम्बोधयन् मुख्यमन्त्री एतां सूचनां दत्तवान्।

सः अवदत् यत् जनानां कृते सुरक्षितं पेयजलं प्रदातुम् उद्दिश्य भविष्ये प्रदेशस्य अन्येषु क्षेत्रेषु अपि एतादृश्यः ओजोन-आधारिताः जलशोधनपरियोजनाः स्थापयिष्यन्ते। सः अवदत् यत् दूषितजलस्य सेवनात् विविधरोगाणां सम्भावना वर्तते, अतः जनानां कृते स्वच्छं सुरक्षितं च पेयजलं उपलब्धं करणम् आवश्यकम् अस्ति। क्षेत्रे पशुचिकित्सासेवाः सुदृढीकर्तुं बड्डलथोरे पशुचिकित्सालयस्य स्थापनायाः घोषणामपि मुख्यमन्त्रिणा कृता।

मुख्यमन्त्री अवदत् यत् राज्यशासनेन ‘मुख्यमन्त्रिणः स्वकीयः परिवारः सुखी परिवारः योजना’ इत्यस्य अन्तर्गतं जनानां लाभप्रदानस्य प्रक्रिया प्रारब्धा अस्ति, यस्याः कृते पञ्चायतेषु सर्वेक्षणं क्रियते। समाजस्य अन्तिमपङ्क्तौ स्थितः व्यक्तिरपि राज्यस्य संसाधनेषु स्वस्य उचितं अधिकारं प्राप्तुं शक्नुयात् इति सुनिश्चितं कर्तुं शासनं प्रतिबद्धम् अस्ति। सः अवदत् यत् प्रदेशे काङ्ग्रेसशासनस्य सत्तायाम् आगमनानन्तरं हिमाचलं आत्मनिर्भरं कर्तुं बहवः महत्त्वपूर्णाः उपक्रमाः कृताः सन्ति तथा एतेषां प्रयासानां सकारात्मकाः परिणामाः अधुना दृश्यन्ते।

मुख्यमन्त्री अवदत् यत् युवानां तथा महिला-मण्डलानां वृक्षारोपणेन वनसंरक्षणेन च संयोजनस्य उद्देश्यम् अनुसृत्य राजीवगान्धीवनसंवर्धनयोजना प्रारब्धा अस्ति। अस्याः योजनायाः अन्तर्गतं स्वयंसहायतासमूहेभ्यः १.२० लक्षरूप्यकाणां वित्तीयसहायता प्रदीयते। तदतिरिक्तं रोपितानां वृक्षाणां जीवितत्वस्य आधारेण प्रोत्साहनराशिरपि प्रदीयते।

सः अवदत् यत् राज्यशासनं शिक्षाक्षेत्रं सुदृढीकर्तुं बहूनि पदानि स्वीकरोति। प्रदेशे सीबीएसईविद्यालयाः उद्घाटिताः सन्ति तथा आगामिकाले अधिकाः सीबीएसईविद्यालयाः स्थापिताः भविष्यन्ति, येन विद्यार्थिभ्यः गुणवत्तापूर्णा शिक्षा उपलब्धा भवेत्।

मुख्यमन्त्री अवदत् यत् देहराविधानसभाक्षेत्रे विविधविकासकार्येभ्यः पर्याप्ता धनराशिः व्ययिता अस्ति तथा भविष्ये अपि विकासकार्येभ्यः धनस्य कापि न्यूनता न भविष्यति।

एतस्मात् पूर्वं देहराविधानसभाक्षेत्रस्य बड्डलथोर-हेलीपैड्-स्थले प्राप्ते मुख्यमन्त्रिणि स्थानीयजनैः हार्दिकं स्वागतं कृतम्। अस्मिन् अवसरे स्थानीयविधायिका कमलेशठाकुरः तथा अन्ये काङ्ग्रेसप्रतिनिधयः मुख्यमन्त्रिणः सम्मानम् अकुर्वन्।

लक्ष्मीनारायणमन्दिरे पूजाऽर्चना

मुख्यमन्त्री चनौरे स्थिते लक्ष्मीनारायणमन्दिरे पूजामर्चनां कृत्वा प्रदेशस्य जनानां शान्तेः, समृद्धेः, सुखकल्याणस्य च कृते प्रार्थनां कृतवान्।

Hindusthan Samachar / Dheeraj Maithani