ताशकन्द:, २९ अगस्तमासः (हि.स.)। प्रधानमन्त्री नरेन्द्रमोदी शनिवासरे उज़्बेकिस्तानस्य राजधानीं ताशकन्दं प्राप्तवान्, यत्र राष्ट्रपतिना शौकत-मिर्जियोयेवेन तस्य उष्णतया स्वागतं कृतम्। प्रधानमन्त्री स्वागताय राष्ट्रपतिं मिर्जियोयेवं प्रति कृतज्ञतां प्रकटयन् अवदत् यत् उज़्बेकिस्तानस्य तस्य एषा चतुर्था यात्रा उभयोः देशयोः द्विपक्षीय-सम्बन्धानां गभीरतां तेषु च निरन्तरवर्धमानां गतिं प्रदर्शयति।

ताशकन्दं प्राप्त्यानन्तरं प्रधानमन्त्री मोदी ‘एक्स्’-इत्यत्र छायाचित्राणि साझीकृत्य लिखितवान्— ‘‘ताशकन्दं प्राप्तवान्, यत्र राष्ट्रपतिना शौकत-मिर्जियोयेवेन मम उष्णतया स्वागतं कृतम्। अस्य विशेषस्य भावस्य कृते अहं तं प्रति कृतज्ञः अस्मि।’’ सः उज़्बेकभाषायामपि स्वीयं सन्देशं सहभागं कृतवान्।

तदनन्तरं प्रधानमन्त्री मोदी याङ्गी-उज़्बेकिस्तान-उद्याने स्थिते स्वातन्त्र्य-स्मारके पुष्पचक्रं समर्पितवान्। अस्मिन् अवसरे राष्ट्रपतिः मिर्जियोयेवः अपि उपस्थितः आसीत्। सैन्यसम्मानेन आयोजिते औपचारिककार्यक्रमे प्रधान-मन्त्री स्मारकस्य पुरतः कतिपय-क्षणानि स्थित्वा सम्मानं प्रकटितवान्। अनन्तरं सः राष्ट्रपतिना मिर्जियोयेवेन अन्यैः अधिकारिभिश्च सह वार्तालापं कृतवान्।

प्रधानमन्त्रिणः अगस्तमासस्य २९-३० दिनाङ्कयोः उज़्बेकिस्तानयात्रा अस्मिन् देशे तस्य चतुर्था यात्रा अस्ति। यात्रायाः अवधौ उभयोः देशयोः मध्ये व्यापारः, रक्षा, ऊर्जा, अङ्कीयसम्पर्कः, विकासस्य विविधक्षेत्रेषु च सहयोगः अधिकं सुदृढः कथं भवेत् इति विषये चर्चा भविष्यति। उभे पक्षे भारतस्य ‘विकसितभारत’स्य उज़्बेकि-स्तानस्य ‘याङ्गी उज़्बेकिस्तान’स्य च सहभाग-विकासलक्ष्याणि अग्रे नेतुं उपायानामपि विचारं करिष्यतः।

प्रधानमन्त्रिणः यात्रा तस्मिन् समये भवति यदा भारत-उज़्बेकिस्तानयोः सम्बन्धेषु सहयोगस्य नूतनक्षेत्राणां विस्तारः भवति। उभे देशे राजनैतिक-आर्थिक-सुरक्षात्मक-ऊर्जासम्बद्ध-अङ्कीय तथा सांस्कृतिक-क्षेत्रेषु स्वसम्बन्धान् अधिकं गतिशीलान् कर्तुं बलं दत्तम् अस्ति।

Hindusthan Samachar / Divya Ranjan