नव दिल्ली, 29 अगस्तमासः(हि.स.)। राष्ट्रियक्रीडादिवसस्यावसरे नेतृभिः देशवासिभ्यः शुभकामनाः, मेजर् ध्यानचन्दस्य योगदानं स्मृतम्

नवदेहली, अगस्तमासस्य २९ दिनाङ्कः। राष्ट्रियक्रीडादिवसस्यावसरे शनिवासरे उपराष्ट्रपतिना सी.पी. राधाकृष्णनेन, लोकसभाध्यक्षेण ओमबिरलामहोदयेन च सह बहुभिः केन्द्रीयमन्त्रिभिः नेतृभिश्च देशवासिभ्यः शुभकामनाः प्रदत्ताः। नेतृभिः हॉकीक्रीडायाः महान् क्रीडकः मेजर् ध्यानचन्दः तस्य जन्मजयन्त्यां श्रद्धया स्मृतः तथा च क्रीडाक्षेत्रे तेन कृतं महत्त्वपूर्णं योगदानं स्मारितम्।

उपराष्ट्रपतिः सी.पी. राधाकृष्णन् सामाजिकसञ्चारमाध्यमस्य एक्स् इत्याख्ये मञ्चे देशवासिभ्यः राष्ट्रियक्रीडादिवसस्य शुभकामनाः अयच्छत्। सः अवदत् यत् मेजर् ध्यानचन्दस्य महान् विरासत् देशे संकल्पस्य, अनुशासनस्य, उत्कृष्टतायाश्च भावनां प्रेरयति। सः अवदत् यत् भारतस्य द्रुतगत्या सुदृढ्यमानं क्रीडातन्त्रं सर्वेषु स्तरेषु प्रतिभानां परिष्काराय स्वीकृतं संकल्पं प्रतिबिम्बयति। भारतीयाः क्रीडकाः वैश्विके मञ्चे निरन्तरं उत्कृष्टं प्रदर्शनं कुर्वन्तः सन्ति तथा च देशस्य गौरवं वर्धयन्ति।

राधाकृष्णन् जनान् स्वास्थ्यसुदृढतां प्रोत्साहयितुं, क्रीडासु अधिकाधिकं सहभागित्वं सुनिश्चितं कर्तुं तथा च युवजनान् परिश्रमेण दृढसंकल्पेन च उत्कृष्टतां प्राप्तुं प्रेरयितुं आह्वयत्।

लोकसभाध्यक्षः ओमबिरला मेजर् ध्यानचन्दं स्मरन् अवदत् यत् तस्य अद्भुतप्रतिभा, अनुशासनम्, समर्पणं राष्ट्राय क्रीडितुं च भावना भारतीयहॉकीक्रीडायै विश्वपटलस्य गौरवपूर्णां प्रतिष्ठां प्रदत्तवती। सः अवदत् यत् ‘हॉकीजादूगरस्य’ विरासत् अद्यापि देशस्य कोटिशः युवजनान् प्रेरयति। मेजर् ध्यानचन्देन सिद्धं कृतं यत् प्रतिभां परिश्रमेण, अनुशासनेन दृढसंकल्पेन च असाधारणासु उपलब्धिषु परिणमयितुं शक्यते।

केन्द्रीयगृहमन्त्री अमितशाहः अवदत् यत् मेजर् ध्यानचन्दः स्वस्य असाधारणप्रतिभया भारतीयहॉकीक्रीडां विश्वस्तरे नवीनानि शिखराणि प्रापयितवान्। सः अवदत् यत् मेजर् ध्यानचन्दस्य क्रीडकौशलम् एतादृशम् आसीत् यत् सम्पूर्णं विश्वं तस्य हॉकीक्रीडायाः प्रशंसकम् आसीत्। देशस्य स्वातन्त्र्यप्राप्तेः पूर्वस्मिन् कालेऽपि सः स्वक्रीडया भारतस्य गौरवं वर्धितवान्। शाहः तस्य अनुशासनं, परिश्रमं, राष्ट्रस्य प्रति समर्पणं च भारतीयक्रीडाक्षेत्रस्य अमूल्यां विरासतं निरूपितवान्।

केन्द्रीयसडकपरिवहनराजमार्गमन्त्री नितिनगडकरी अपि हॉकीक्रीडायाः महान् क्रीडकस्य मेजर् ध्यानचन्दस्य जन्मजयन्त्यां तस्मै श्रद्धाञ्जलिं समर्पितवान्। सः पद्मभूषणसम्मानेन सम्मानिताय मेजर् ध्यानचन्दाय विनम्रं नमनम् अर्पितवान्।

केन्द्रीयारक्षामन्त्री राजनाथसिंहः अवदत् यत् मेजर् ध्यानचन्दस्य अद्वितीयं कौशलं, समर्पणं, हॉकीक्रीडायाः प्रति तस्य प्रेम च भारतीयानां बह्वीः पीढीः प्रेरयन्ति स्म। सः अवदत् यत् प्रधानमन्त्रिणः नरेन्द्रमोदिनः नेतृत्वे क्रीडकान् सशक्तीकर्तुं, युवप्रतिभानां परिष्कारं कर्तुं तथा च क्रीडासम्बद्धाः आकाङ्क्षाः राष्ट्रियसफलतासु परिणमयितुं सुदृढं क्रीडातन्त्रं निर्मीयते।

केन्द्रीयस्वास्थ्यमन्त्री जे.पी. नड्डा अवदत् यत् मेजर् ध्यानचन्दस्य अद्भुतक्रीडाप्रतिभा, अनुशासनं, देशभक्तिश्च भारतं अन्तर्राष्ट्रीयमञ्चे गौरवान्वितवन्तः। सः अवदत् यत् मेजर् ध्यानचन्दस्य जीवनं योगदानं च भावीसंंततीनां कृते क्रीडासु समर्पणस्य उत्कृष्टताप्राप्तेः च प्रेरणां निरन्तरं दास्यति। सः महान् हॉकीक्रीडकस्य विरासतं देशस्य क्रीडकानां कृते सदैव प्रेरणास्रोतः इति निरूपितवान्।

---------------

Hindusthan Samachar / Dheeraj Maithani